Ye Obua Kpokpaa Nɔkwɛlɔ Saramɔ Lɛ
1 Kɛjɛ October 15, 1946 kɛbaa nɛɛ ato asafoi lɛ gbɛjianɔ afee amɛ kpokpai sɔrɔtoi ni be-fɛɛ nɔkwɛlɔ gbɛfalɔ saraa amɛ. Nɔ ni miihe ashɛ afii 43 nɛ, ni aŋkroaŋkroi kɛ asafoi lɛ ena nɛkɛ teokrase gbɛjianɔtoo nɛɛ he sɛɛ. (Yes. 1:26) Ya ni wɔɔya nɔ wɔfi nɛkɛ gbɛjianɔtoo nɛɛ sɛɛ ni wɔye wɔbua lɛ kɛ jɔɔmɔi babaoo baaba abaha wɔ.—Efes. 4: 7, 8, 11.
Hesaamɔ Kɛha Saramɔ Lɛ
2 Kɛ atswa kpokpaa nɔkwɛlɔ lɛ saramɔ he adafi pɛ lɛ, wɔbaanyɛ wɔje shishi ni wɔsaa wɔhe wɔha enɛ. Wɔbaanyɛ wɔto gbɛjianɔ ni wɔtsake wɔbe he gbɛjianɔtoo mli bɔni afee ni wɔye wɔbua otsi krɛdɛɛ lɛ mli nitsumɔ lɛ. Shiɛlɔi komɛi toɔ gbɛjianɔ ni amɛkɛ be babaoo woɔ sɔɔmɔ nitsumɔ lɛ mli kɛtsɔ gbɛgbalɔi awamɔ nitsumɔ nɔ. Mɛi krokomɛi hu heɔ gbi kome loo gbii enyɔ kɛjɛɔ amɛheloo gbɛfaŋ nitsumɔ mli bɔni afee ni amɛna sɔɔmɔ nitsumɔ lɛ mli gbɛfaŋnɔ. Shiɛlɔi pii hu kɛ nɔkwɛlɔ gbɛfalɔ lɛ toɔ gbɛjianɔ ni amɛkɛ lɛ tsuɔ nii yɛ bei pɔtɛɛ komɛi amli yɛ sɔɔmɔ nitsumɔ lɛ fa ko mli. Tsui muu fɛɛ mli ni wɔɔjɛ wɔye wɔbua sɔɔmɔ nitsumɔ lɛ yɛ be ni tamɔ nɛkɛ nɔ lɛ kɛ nyɔmɔwoo babaoo baa.
3 Amaniɛbɔi ni wɔnine shɛɔ nɔ kɛjɛɔ nɔkwɛlɔi gbɛfalɔi lɛ adɛŋ lɛ tsɔɔ akɛ abaanyɛ aye abua shwane sɛɛsaramɔ kɛ Biblia kasemɔ nitsumɔ lɛ babaoo. Ani obaanyɛ oto obe he gbɛjianɔ kɛha sɛɛsaramɔ loo Biblia mli nikasemɔ yɛ shwane ko yɛ otsi lɛ mli? Kpokpaa nɔkwɛlɔ lɛ baafata ohe kɛaaya yɛ miishɛɛ mli, ni kɛji akɛ oosumɔ lɛ, ebaaa nya he hu akɛ eeekwɛ nikasemɔ lɛ nɔ.
Yelikɛbuamɔ Ni Bo Diɛŋtsɛ Okɛaaha
4 Nɔ ni kpokpaa nɔkwɛlɔ lɛ tsuɔ he nii waa ji bɔ ni ehe hiaa akɛ ekɛ tsɔsemɔ kroko aaaha mɔ fɛɛ mɔ ni miitao ni enine ashɛ sɔɔmɔ hegbɛi ni dara lɛ anɔ lɛ. (1 Tim. 3:1) Ani oyɛ sanebimɔi pɔtɛɛ komɛi ni kɔɔ osɔɔmɔ nitsumɔ loo gbɛnaa nii ahe? Ani obaasumɔ ni oya ohiɛ yɛ onyɛmɔ mli kɛ obe he gbɛjianɔtoo mli? Ani oyɛ be fɛɛ sɔɔmɔ lɛ he miishɛɛ? Ani obaasumɔ ni osɔmɔ yɛ he ni hiamɔ lɛ he hiaa waa yɛ lɛ, akɛ yɛ bo diɛŋtsɛ okpokpaa lɛ mli loo yɛ he kroko yɛ Ghana? Bɔ fɛɛ bɔ ni omumɔŋ otii lɛ ji lɛ, kpokpaa nɔkwɛlɔ lɛ kɛ bo baasusu enɛɛmɛi ahe yɛ miishɛɛ mli.
5 Kɛji akɛ okpokpaa nɔkwɛlɔ lɛ ebote gbalashihilɛ mli lɛ, belɛ eŋa lɛ hu ji Yehowa tsulɔyoo ni etuu ehe eha. Eka shi faŋŋ akɛ eji gbɛgbalɔ ni hegbɛ yɛ akɛ ebaaye ebua ni efi sɔɔmɔ nitsumɔ he gbɛjianɔtoo lɛ sɛɛ. Yɛ eniiashikpamɔ kɛ bɔ ni ekɛ ehe woɔ sɔɔmɔ nitsumɔ lɛ mli daa yɛ shikpɔŋkukuji sɔrɔtoi amli hewɔ lɛ, ebafeɔ mɔ ni he saa yɛ shiɛmɔ nitsumɔ lɛ mli. Ekɛ ehe haa koni ekɛ nyɛmimɛi yei lɛ titri atsu nii yɛ shia-kɛ-shia sɔɔmɔ lɛ mli, ni efataa amɛhe kɛyaa sɛɛsaramɔ kɛ shia Biblia mli nikasemɔi anɔ. Eji mɔ ni sa yijiemɔ ni miishɛɛ yɔɔ mli ni Paulo kɛha yɛ Foebe he lɛ.—Rom. 16:1, 2.
6 Nɔ ni esaaa akɛ wɔkuɔ wɔhiɛ wɔshwieɔ nɔ hu ji hegbɛ ni wɔnaa akɛ wɔɔjie gbɔfeemɔ su kpo wɔtsɔɔ nɔkwɛlɔ gbɛfalɔ lɛ kɛ eŋa lɛ, kɛji akɛ ebote gbalashihilɛ mli. Nyɛmimɛi pii kaiɔ hewalɛwoo ni amɛnine shɛ nɔ akɛni amɛgbele amɛshiai amɛha nɛkɛ sɔɔlɔi gbɛfalɔi nɛɛ loo amɛkɛ amɛ ye nii ni amɛkɛ amɛ na mumɔŋ naanyobɔɔ hewɔ lɛ babaoo.—3 Yoh. 5-8.
7 Saramɔ ni nɔkwɛlɔi gbɛfalɔi ni amɛdara yɛ mumɔŋ nɛɛ yaa nɔ amɛsaraa Yehowa webii daa lɛ yeɔ ebuaa amɛ. Gbɛjianɔtoo nɛɛ he ni aaaba sɛɛnamɔ babaoo aha wɔ akɛ aŋkroaŋkroi lɛ damɔ bɔ ni wɔsaa wɔhe kɛ bɔ ni wɔyeɔ wɔbuaa kpokpaa nɔkwɛlɔ lɛ saramɔ lɛ nɔ. Eba akɛ wɔ fɛɛ wɔɔtswa wɔfai shi akɛ wɔbaaye wɔbua kpokpaa nɔkwɛlɔ lɛ saramɔ ni baanyiɛ enɛ sɛɛ aba lɛ.