Okɛ Hegbe Fɛɛ Hegbɛ ni Onaa Iɛ Aye Odase—Fa 1
1 Beni eŋmaa wolo eyaha Hebri Kristofoi lɛ, bɔfo Paulo wo ŋaa akɛ: “Nyɛhaa wɔtsɔa enɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.” (Heb. 13:15) Gbɛ kome ni wɔɔtsɔ nɔ wɔfee enɛ ji ni wɔɔfi wɔ asafoŋ sɔɔmɔ nitsumɔ he gbɛjianɔtoo lɛ sɛɛ be fɛɛ be. Gbɛ kroko ni mɔɔ shi jogbaŋŋ ni wɔtsɔɔ nɔ wɔkɛ yijiemɔ afɔle bahaa Nyɔŋmɔ ji kɛtsɔ hegbɛi ni wɔŋɔɔ koni wɔye odase trukaa lɛ nɔ.
2 Yɛ wɔ daa gbi nitsumɔ be mli lɛ, wɔteŋ mɛi pii kɛ gbɔmɛi krokomɛi kpeɔ. Kɛ wɔhiɛ hi wɔhe nɔ ni wɔyoo hegbɛi lɛ ni wɔbɔ he mɔdɛŋ lɛ, wɔbaanyɛ wɔtɛo Maŋtsɛyeli anɔkwale dumɔ wui lɛ babaoo kɛtsɔ trukaa odaseyeli nɔ. Ehe ehiaaa babaoo fe ekolɛ wiemɔ kuku ko loo sanebimɔ ko ni kɔɔ jeŋ shihilɛi loo nɔ ni yaa nɔ yɛ maŋ lɛ mli lɛ he baanyɛ atee sanegbaa shi ni ebaagbele gbɛ kɛha odaseyeli. Ni fɛɛ damɔ gbɔmɔ lɛ shihilɛ kɛ nifeemɔ nɔ, ni ekolɛ enɛ po baanyɛ aha ni wɔkɛ wolo ko aha.
Feemɔ Mɔ Ni Esaa Ehe
3 Trukaa odaseyeli ni yeɔ omanye lɛ biɔ hesaamɔ ni atsɔɔ hiɛ afeɔ. Ani wɔmiisumɔ ni wɔbɔ mɔdɛŋ nakai? Kɛji wɔsusu nɔ ni wɔbaafee yɛ gbi lɛ mli lɛ he, wɔsusu gbɔmɛi ni ekolɛ wɔkɛ amɛ baakpe, ni wɔsusu nɔ ni wɔbaakɛɛ kɛje sanegbaa shishi lɛ he lɛ, belɛ wɔtsɔmɔ mɛi ni wɔsaa wɔhe yɛ jwɛŋmɔŋ ni ebaafee mlɛo aha wɔ akɛ wɔɔje odaseyeli shishi trukaa. Bɔɔ mɔdɛŋ ni ohiɛ dɛhiɛmɔ woji bibii lɛ eko, woji tɛtrɛbii aloo woji krokomɛi ni obaanyɛ okɛha mɛi ni boɔ toi lɛ. Ni Biblia lɛ hu? Biblia ni anyɛɔ akɛwoɔ kotoku mli lɛ sa jogbaŋŋ kɛha shika kotoku loo ŋwɛi gbɛ atade kotoku mli ni akɛaawo, ni abaanyɛ akɛtsu nii kɛ hegbɛ lɛ kɛ ehe ha nɔŋŋ. Ani nɔ kroko hu yɛ ni wɔbaanyɛ wɔfee ni wɔkɛsaa wɔhe jogbaŋŋ?
4 Esa akɛ wɔle saji ni yaa nɔ ni kɔɔ Biblia mli gbalɛ he lɛ ni wɔfee mɛi ni wɔsaa wɔhe akɛ wɔɔwie Biblia mli saneyitso kɛha sanegbaa sɔrɔtoi ni baaŋɔɔ mɛi ni anɔkwale lɛ he hɔmɔ yeɔ amɛ ŋmɛnɛ lɛ anaa lɛ ahe. “Watching the World” lɛ kɛ “Saji lɛ Asɛɛkɔmɔ” ni yɔɔ wɔwoji tɛtrɛbii lɛ amli lɛ ji nibii ni yeɔ buaa yɛ enɛ gbɛfaŋ. Kɛ nɛkɛ saji nɛɛ yɛ wɔjwɛŋmɔ mli lɛ, wɔbaanyɛ wɔkpa sane lɛ hiɛ koni eŋɔɔ mɛi pii anaa.
ŊƆƆ HEGBƐ LƐ
5 Be fɛɛ be ni wɔkɛ gbɔmɛi aaakpe lɛ haa wɔnaa hegbɛ koni wɔye odase. Shiɛlɔi ni ka helatsamɔ hei po eŋɔ hegbɛ lɛ ni amɛkɛwie anɔkwale lɛ he amɛha datrɛfoi, helatsɛmɛi akwɛlɔi, mɛi ni tsuɔ nii yɛ helatsamɔ hei, mɛi ni basaraa amɛ kɛ helatsɛmɛi krokomɛi. Shiɛlɔi krokomɛi kɛ beni amɛkpa yɛ shwane loo skul be ni amɛnaa kɛ be mli ni amɛmɛɔ mɔ ko lɛ tsuɔ nii. Hegbɛ baanyɛ aba ni aye odase yɛ be mli ni aheɔ nii yɛ shwapoi wuji amli, beni atee gbɛhamɔ aloo beni akɛ bɔs, kɔɔyɔŋ lɛlɛ loo oketeke faa gbɛ. Shiɛlɔi komɛi hu yeɔ trukaa odase jogbaŋŋ yɛ amɛ diɛŋtsɛ amɛshia beni nihɔɔlɔi, akutseiaŋbii, wekumɛi kɛ mɛi krokomɛi eba amɛŋɔɔ lɛ.—Kwɛmɔ 1970 Yearbook lɛ baafai 97-8, 231-2, kɛ 263-4.
6 “Nyɔŋmɔ Jamɔ Hetuu-Kɛhamɔ” Kpokpaa Wulu nɔ Kpeei lɛ kɛ hegbɛi kpakpai baaha wɔ koni wɔye odase trukaa. Lapel badge ni akɛtsɛɔ tsitsi naa lɛ haa gbɔmɛi biɔ wɔ mɛi ni wɔji kɛ he ni wɔyaa. Wɔbaanyɛ wɔje sanegbaa shishi ni wɔkɛɛ gbɔmɛi lɛ akɛ wɔji gbɔmɛi ni wɔba kpee ni wɔtsɔɔ nɔ hewɔ ni wɔyaa kpee lɛ mli. Kɛ wɔwa yɛ gbɛ he koni wɔhe pɛtrol, wɔye nii yɛ niyeli hei, wɔwɔ yɛ gbɔiatoohei loo wɔyahe nibii yɛ jara nɔ loo wɔmiishɛra shi kɛkɛ lɛ, wɔtao hegbɛi ni baaha wɔnyɛ wɔye odase trukaa.—Jaj. 11:6.
7 Tsuiŋ hiɛsɔɔ ni wɔyɔɔ kɛha anɔkwale lɛ kɛ wɔhiɛ ni aaahi wɔhe nɔ yɛ bɔ ni wɔbe nɛɛ he hiaa ha lɛ baanyɛ akanya wɔ koni wɔŋɔ hegbɛ fɛɛ hegbɛ ni wɔɔna ni wɔwie naakpɛɛ hiɛnɔkamɔ lɛ he sane lɛ he wɔtsɔɔ mɛi krokomɛi. Eba akɛ wɔɔya nɔ wɔŋɔ hegbɛ fɛɛ hegbɛ ni wɔɔna lɛ ni wɔkɛtɛo Maŋtsɛyeli anɔkwale dumɔ wui lɛ kɛtsɔ trukaa odaseyeli nɔ.—Mat. 24:14.