Wɔ Hesaa Akɛ Sɔɔlɔi Lɛ Ni Wɔɔha Aya Hiɛ
1 Akɛni Maŋtsɛyeli lɛ he nibii baa klɛŋklɛŋ yɛ wɔshihilɛ mii hewɔ lɛ, esa akɛ ekanya wɔ koni wɔteke nɔ yɛ sɔɔmɔ nitsumɔ lɛ ni wɔhala akɛ wɔshihilɛ mli nitsumɔ lɛ mli. (Mar. 13:10.) Bɔ fɛɛ bɔ ni wɔtsɛ yɛ shiɛmɔ nitsumɔ lɛ mli wɔha lɛ, wɔmiisumɔ ni wɔ hesaa akɛ sɔɔlɔi lɛ aya hiɛ. Mɛɛ gbɛ nɔ wɔɔtsɔ wɔfee enɛ yɛ?
2 Gbɔmɛi pii ni amɛye omanye yɛ amɛ heloo gbɛfaŋ nitsumɔi amli lɛ yaa nɔ amɛtaoɔ ni amɛya amɛhiɛ lolo yɛ amɛnilee kɛ hesaai amli. Ekolɛ amɛ daaŋ ŋmaa damɔ enɛ nɔ. Akɛ sɔɔlɔi ni kɛ henilee tsuɔ nii lɛ, ehe miihia ni wɔmia wɔhiɛ ni wɔha wɔ hesaa ni wɔkɛfeɔ kaselɔi, ni wɔkɛtsɔɔ amɛ nibii ni kɔɔ Nyɔŋmɔ Maŋtsɛyeli lɛ he lɛ aya hiɛ. Esa akɛ wɔtao gbɛi heei ni baaŋɔɔ gbɔmɛi sɔrɔtoi fɛɛ naa—Mateo 28:19, 20.
Kpeemɔ Hiamɔ Lɛ Naa
3 Amrɔ nɛɛ ni Yehowa ewo gbɔmɛi ni tamɔ gwantɛŋi lɛ anaabuamɔ lɛ foi lɛ, wɔteŋ mɛi pii yaa wɔ akutseiaŋbii lɛ aŋɔɔ shii abɔ. Odaseyeli nitsumɔi ni yaa hiɛ ni shiɛlɔi kɛ gbɛgbalɔi babaoo kɛ amɛhe woɔ mli lɛ miikanya jeŋ muu nitsumɔ lɛ. Akɛni wɔnitsumɔ lɛ etee hiɛ hewɔ lɛ, gbɛ ni wɔtsɔɔ nɔ wɔyeɔ odase loo wɔkɛ wolo ko haa yɛ be ko ni eho lɛ mli lɛ efeŋ nɔ ni baaŋɔɔ gbɔmɛi ni wɔkɛkpeɔ lɛ anaa dɔŋŋ. Yɛ Ghana lɛ, yɛ shihilɛ ni wɔnaa wɔhe yɛ mli nɛɛ hewɔ lɛ, ehe miihia ni wɔ fɛɛ wɔfee mɛi ni bɔɔ mɔdɛŋ diɛŋtsɛ koni wɔkɛ mɛi krokomɛi aja sanekpakpa lɛ yɛ gbɛ ni mɔɔ shi nɔ. Ehe miihia ni wɔha wɔ sɔɔmɔ nitsumɔ lɛ hilɛ aya hiɛ.
4 Ehe miihia ni wɔna jwɛŋmɔ kpakpa yɛ be mli ni wɔkɛ gbɔmɛi lɛ wieɔ lɛ bɔni afee ni wɔhe asa diɛŋtsɛ yɛ wɔnitsumɔ lɛ mli. Kɛ wɔkɛ ŋaawoo ni anyɛɔ atsuɔ he nii ni akɛha yɛ September 1, 1988 Buu-Mɔɔ lɛ mli lɛ tsu nii lɛ, ebaanyɛ eye ebua wɔ yɛ enɛ gbɛfaŋ. Akɛ nɔkwɛmɔ nɔ lɛ, baafa 14, kuku 6 wieɔ gbɛ ni oootsɔ nɔ ojie ohe kpo yɛ gbɛ ni miishɛɛ yɔɔ mli nɔ kɛ jwɛŋmɔ kpakpa hu yɛ shikpɔŋkuku ni otsuɔ nii yɛ mli daa otsi ni ele bo jogbaŋŋ yɛ mli lɛ. Gbɛ ni oootsɔ nɔ oya mɔ ko ni kɛɛ bo nyɛsɛɛ otsi lɛ mli akɛ “Miyaa mi diɛŋtsɛ mi-sɔlemɔ, ni etsuɔ mimumɔŋ hiamɔ nibii fɛɛ he nii” lɛ ŋɔɔ lɛ, anaa enɛ hu yɛ baafa 14, kuku 5.
5 Ani otsu oshikpɔŋkuku lɛ mli nii kɛ yiŋtoo akɛ oosumɔ ni okɛ amɛ afee shia Biblia mli nikasemɔ yaka? Ani otsuɔ nii yɛ osafo lɛ shikpɔŋkuku ni nitsumɔ hei wuji yɔɔ mli lɛ mli? Ani obaanyɛ oye odase yɛ gbɛjegbɛi anɔ yɛ be ni sa mli kɛ agbɛnɛ yɛ ŋmɛlɛtswai ni hi mli? Bɔ fɛɛ bɔ ni eji lɛ, tii ŋaawoo kpakpai ni akɛha yɛ September 1, 1988 Buu-Mɔɔ lɛ mli lɛ mli. Ŋaawoo ni tamɔ nɛkɛ kɛ nitsumɔ lɛ baaye abua wɔ ni wɔ hesaa akɛ sɔɔlɔi lɛ aya hiɛ.
6 Ni ohe aaasa hu lɛ kɔɔ ni ooofee nɔ fɛɛ nɔ kɛyi shi hu he. (Efe. 6:13) Ha ohiɛ ahi nɔ ni oyoo kɛji akɛ wekui fe ekome yɔɔ shia lɛ mli. Mɛi komɛi hiɔ he ni atsɛɔ lɛ boys’ quarters loo tsui bihii ni yɔɔ shia lɛ sɛɛ lɛ amli, tsui ni afee ni kulɛ akɛ kar amamɔ mli aloo hei krokomɛi ni amɛshinai bɛ shia lɛ mligbɛ. Taomɔ wekui sɔrɔtoi lɛ amlibii lɛ—ekolɛ onukpa ko ni nyɛŋ aba shinaa lɛ naa kɛ mɔ ko eba jɛmɛ aloo mɔ ko ni miitsu nii yɛ shia lɛ mli yɛ be ni oba jɛmɛ lɛ nɛkɛ. Ekolɛ kɛ otee jɛmɛ yɛ ŋmɛlɛtswai krokomɛi amli lɛ onine baashɛ weku lɛ mlibii krokomɛi lɛ anɔ. Gbɛkɛnaashi odaseyeli kɛ hegbɛi ni tamɔ nɛkɛ haa.
Nyɛhaa Wɔkɛfea Oti Ni Ma Wɔhiɛ
7 Wɔ hesaa yɛ sɔɔmɔ lɛ mli lɛ ni wɔɔha aya hiɛ lɛ ji oti ko ni sa ni wɔteŋ mɛi pii anine baanyɛ ashɛ nɔ. Ebiɔ sɔlemɔ ni je tsuiŋ kɛ hesaamɔ ni atsɔɔ hiɛ afeɔ. Yɛ be mli ni wɔ hesaa yɛ sɔɔmɔ nitsumɔ lɛ mli lɛ yaa hiɛ lɛ, wɔbaanyɛ wɔye wɔbua mɔ kroko hu ni mɔ lɛ ashwere nakai.—Gal. 6:6
8 Kaimɔ akɛ, wɔ nitsɔɔmɔ nitsumɔ lɛ baŋ naagbee yɛ be mli ni “amanehulu kpeteŋkpele” lɛ eba lɛ. (Mateo 24:21) Wɔmiikpa gbɛ akɛ wɔbaana afii babaoo ni wɔkɛbaaye wɔbua mɛi ni atee amɛ shi kɛjɛ gbohii ateŋ lɛ ni amɛkase Yehowa gbɛi lɛ. Miishɛɛ ni wɔbaana yɛ Afii Akpe lɛ mli lɛ baafa babaoo diɛŋtsɛ yɛ be mli ni wɔnaa ni mɛi ni atsɔɔ amɛ nii lɛ kɛ anɔkwayeli baa amɛhe shi amɛhaa Kristo nɔyeli lɛ. Kɛ wɔha wɔ hesaa yɛ shiɛmɔ kɛ nitsɔɔmɔ nitsumɔ lɛ mli lɛ tee hiɛ lɛ, wɔbaanyɛ wɔfee babaoo yɛ wɔ sɔɔmɔ nitsumɔ lɛ mli—ni wɔkɛwo Yehowa hiɛ nyam ni wɔkɛjie eyi.