Shiɛmɔ Sanekpakpa Lɛ Daa
1 Famɔ akɛ ashiɛ ni atsɔɔ Maŋtsɛyeli lɛ he sanekpakpa lɛ kɛ gbɛnaa nii fɔɔ Kristofoi ni amɛjɔɔ amɛhe nɔ lɛ fɛɛ nɔ. Ejeee sane ni ji, ‘kɛ hegbɛ lɛ ba . . . ’ Dabi. Eji famɔ ni akɛha tɛɛ, nɔ ni esa akɛ Yesu Kristo anɔkwa kaselɔi fɛɛ abo toi.—Marko 13:10; Mateo 28:19, 20.
2 Mra be mli Kristofoi lɛ kɛ amɛheyeli fɔ oshara mli kɛ amɛwala tete po ni amɛbo nakai famɔ lɛ toi. Yɛ be ko mli lɛ afa bɔfoi lɛ akɛ amɛbapue yɛ nɔyelɔi lɛ ahiɛ. ‘Ayi amɛ ni afa amɛ ni amɛkpa Yesu gbɛi lɛ shiɛmɔ.’ Ani amɛkpa? Wɔkaneɔ akɛ: “Amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we kɛ shiai be fɛɛ be.” (Bɔfoi 5:40-42) Enɛ ji sɔɔmɔ nitsumɔ ni akɛ he woɔ mli daa yɛ famɔ ni jɛ nɔyelɔi lɛ aŋɔɔ aka akpa nitsumɔ lɛ fɛɛ sɛɛ.—Bɔfoi 5:29.
Yɛ Haomɔ Ni Wɔkɛkpɛɔ Nɛɛ Naa
3 June 14, 1989 mli ni nɔyelɔi lɛ tsi wɔnitsumɔi anaa. Taakɛ wɔ fɛɛ wɔle lɛ, enɛ ha wɔkɛ kaai kɛ saji ni mli wawai kpe. Wolo ni ji, Organized to Accomplish Our Ministry lɛ yɛ ŋaawoo ni sa jogbaŋŋ kɛha wɔ ni ejajeɔ enɛ yɛ baafa 168 akɛ:
‘Shihilɛi komɛi baanyɛ ate shi ni haŋ wɔnyɛ wɔkpe kutuu yɛ asafoŋ kpeei ashishi. Wɔnine shɛŋ nitsumɔ he nine lɛ nɔ yɛ be kukuoo ko mli. Ekolɛ kpokpaa nɔkwɛlɔi asaramɔ mli baafolɔ. Woji heei baŋ. Kɛ nibii nɛɛ ekomɛi nina bo lɛ, mɛni esa akɛ ofee?
‘Hetoo lɛ ji: “Feemɔ bɔ fɛɛ bɔ ni ooonyɛ yɛ anɔkwa jamɔ he yɛ shihilɛ lɛ shishi. Esa akɛ anyɛ akase nii yɛ teemɔŋ. Yɛ bei babaoo mli lɛ nyɛmimɛi baanyɛ akpe yɛ kui bibii amli ni amɛkase nii yɛ shiai. . . .
‘Shi kɛji akɛ ona akɛ oyaje he ko banee ni okɛ onyɛmimɛi Kristofoi lɛ ateŋ jɛkɛ po lɛ, ha ahi ojwɛŋmɔ mli akɛ okɛ Yehowa kɛ e-Bi Yesu Kristo teŋ jɛkɛɛɛ. . . . Kaimɔ akɛ oji Yehowa tsulɔ kɛ Yesu Kristo kaselɔ, ni yɛ be mli ni hegbɛi ni okɛaaye mɛi krokomɛi odase baa lɛ, okɛtsu nii jogbaŋŋ. Yehowa baajɔɔ omɔdɛŋbɔi anɔ.’
Enɛ ji ŋaawoo ni akɛhaa koni akase nii yɛ teemɔŋ daa ni akɛ he awo sɔɔmɔ nitsumɔ lɛ mli, yɛ haomɔi ashishi po.
4 Kɛ wɔkwɛ sɔɔmɔ nitsumɔ lɛ akɔntaabuu lɛ kɛjɛ June kɛbaa lɛ wɔnaa akɛ mɛi pii efee mɛi ni eyaaa shiɛmɔ daa kɛjɛ be mli ni atsi wɔnaa nɛɛ. Amaniɛbɔi ni jɛɔ kpokpaa nɔkwɛlɔi aŋɔɔ baa lɛ maa enɛ nɔ mi. Asafoi komɛi yɛ ni shiɛlɔi lɛ fa kpotoo efee mɛi ni eyaaa shiɛmɔ daa. Fioo ko yɛ ni kɛjɛ be mli ni atswa adafi akɛ atsi wɔnaa nɛɛ, amɛyako shiɛmɔ kwraa da ni tsɔɔ akɛ amɛbafee mɛi ni amɛkpa shiɛmɔ yaa. Mɛni abaanyɛ afee?
Hii Shi Akɛ Mɔ Ni Yɔɔ Ekaa
5 Ŋaawoo ni jɛ mumɔŋ lɛ woɔ wɔ hewalɛ akɛ: “Nyɛtsɔɔa nuufeemɔ yɛ nyɛhemɔkɛyeli lɛ mli; shi nuufeemɔ lɛ mli hu, nyɛtsɔɔɔ nilee; ni nilee lɛ mli hu lɛ, hiɛshikamɔ; ni hiɛshikamɔ mli lɛ. tsuishitoo; ni tsuishitoo mli lɛ, Nyɔŋmɔ jamɔ, . . . ejaakɛ kɛji nɛkɛ nii nɛɛ yɛ nyɛmli ni efa lɛ, ehaŋ nyɛfee hejɔlɔi aloo mɛi ni wooo yibii yɛ wɔ Nuŋtsɔ Yesu Kristo he nilee lɛ gbɛfaŋ.”—2 Pet. 1:5-8.
6 Ŋaawoo nɛɛ jieɔ nɔ ko ni esa akɛ onukpai lɛ ale jogbaŋŋ lɛ kpo. Mɔ ko ni “wooo yibii yɛ wɔ Nuŋtsɔ Yesu Kristo he nilee lɛ gbɛfaŋ” ni yɛ enɛ hewɔ lɛ efɔɔɔ shiɛmɔ yaa ni ekaseee nii yɛ teemɔŋ lɛ bɛ nibii ni atsi ta akɛ Kristofoi asui yɛ yiteŋgbɛ nɛɛ ekome loo babaoo. Mɛni onukpai lɛ baanyɛ afee? Efaaa kɛkɛ akɛ aaaya mɔ ni eyaaa shiɛmɔ daa lɛ ŋɔɔ ni ayabi ni ekɛ esɔɔmɔ nitsumɔ he akɔntaabuu aha. Mɛni ji enaagbai? Ani gbɔmɔ he gbeyeishemɔ eye enɔ? Ani eleee bɔ ni eeefee ni etee hegbɛi ashi kɛha trukaa odaseyeli? Ani ekɛ kuu ni ekɛbɔɔ lɛ tɛŋ jɛkɛ? Ani eyeɔ mumɔŋ niyenii lɛ daa? Nibii pii yɛ ni kɛ enɛ baa. Esa akɛ onukpai kɛ Kristofoi ni amɛdara yɛ mumuŋ lɛ fɛɛ abɛŋkɛ gbɔmɛi ni tamɔ nɛkɛ ni amɛye amɛbua amɛ ni amɛye amɛnaagbai nɛɛ anɔ kunim.
Yɛ Obua Amɛ Bo Diɛŋtsɛ
7 Taakɛ nitsumɔ he nine lɛ etsi ta etsɔɔ onukpai lɛ kɛtsɔ wolo ko ni aŋma amɛ momo lɛ nɔ lɛ. aha shiɛlɔ fɛɛ shiɛlɔ kɛ ehe abɔ kuu ko he bianɛ. Mɛi ni kwɛɔ kui lɛ anɔ lɛ ale shiɛlɔi fɛɛ ni yɔɔ amɛkui lɛ amli lɛ. Esa akɛ amɛbɔ mɔdɛŋ fɛɛ ni amɛaanyɛ, kɛ shiɛlɔi krokomɛi ni yɔɔ mli ni amɛdara yɛ mumɔŋ lɛ ayelikɛbuamɔ ni amɛnine ashɛ mɛi fɛɛ ni yɔɔ kuu lɛ mli lɛ anɔ ni amɛye amɛbua amɛteŋ mɔ fɛɛ mɔ taakɛ bɔ ni amɛshihilɛ lɛ ŋmɛɔ gbɛ, koni amɛna shiɛmɔ nitsumɔ lɛ mli gbɛfaŋnɔ daa nyɔŋ nɔ. Mɔ ni kwɛɔ kuu lɛ nɔ lɛ baasumɔ ni ena akɛ mɛi fɛɛ ni yɔɔ ekuu lɛ mli lɛ kɛ amɛsɔɔmɔ nitsumɔ he akɔntaabuu eha yɛ nyɔŋ lɛ naagbee.
8 Enɛ jeee be ni akɛfeɔ mɔ ni eyaaa shiɛmɔ daa loo mɔ ni ekpa shiɛmɔ yaa. Paulo kɛɛ: “Ni miwala hu mibuuu akɛ ejara wa yɛ mihiɛ, bɔni afee ni mikɛ miishɛɛ agbe migbɛnyiɛmɔ lɛ kɛ sɔɔmɔ ni mina yɛ Nuŋtsɔ Yesu dɛŋ . . . lɛ naa.” (Bɔfoi 20:24) Mɛni hewɔ enu he nakai? Etsɔɔ mli akɛ: “Ejaakɛ aŋɔfi minɔ akɛ mijaje ejaakɛ kɛji mijajeee sanekpakpa lɛ. kpoo ha mi!” Atsi wɔnaa jio, aŋmɛɛ wɔhe jio. Yehowa baajɔɔ bo taakɛ ejɔɔ Paulo lɛ kɛ hewalɛ ni tekeɔ ni kɛji akɛ otswa ofai shi akɛ Obaashiɛ sanekpakpa lɛ daa lɛ.—1 Kor. 9:16; 2 Kor. 4:7; Fil. 4:13.