Na Hemɔkɛyeli yɛ Nyɔŋmɔ Wiemɔ lɛ Mli

¹ Kɛ be ko eshɛ ni hemɔkɛyeli ni mli wa waa he miihia lɛ, belɛ no ji bianɛ. Mɛi pii bɛ hemɔkɛyeli ko kwraa ni amɛbɛ hiɛnɔkamɔ ko hu kɛha wɔsɛɛ be. Bɔ ni jamɔ mli kɛ maŋkwramɔŋ hiɛnyiɛlɔi etee apasa hiɛnɔkamɔi ashi yɛ be babaoo mli amɛha hewɔ lɛ, gbɔmɛi pii anijiaŋ eje wui ni amɛjieɔ enɛ kpo yɛ faŋŋ. Yɛ anɔkwale mli lɛ taakɛ bɔfo Paulo jaje lɛ: “Jeee mɛi fɛɛ yɔɔ hemɔkɛyeli.” (2 Tes. 3:⁠2) Shi Yehowa Odasefoi yɛ hemɔkɛyeli. Wɔyɛ hekɛnɔfɔɔ kwraa akɛ shiwooi ni anaa yɛ Nyɔŋmɔ Wiemɔ lɛ mli lɛ baaba mli.

² Hemɔkɛyeli ni mli wa haa Yehowa Odasefoi feɔ gbɔmɛi sɔrɔtoi yɛ mɛi krokomɛi fɛɛ he. Ekanyaa nitsumɔi kpakpai ni he baa sɛɛnamɔ kɛhaa mɛi krokomɛi kɛ wɔ hu, ni ewoɔ Nyɔŋmɔ hiɛ nyam. Hemɔkɛyeli ni tamɔ nɛkɛ jɛɔ Nyɔŋmɔ Wiemɔ lɛ gbɛ ni wɔŋmɛɔ koni ena hewalɛ yɛ wɔshihilɛ nɔ lɛ hewɔ. Ŋmɛnɛŋmɛnɛ beaŋ anɔkwa Kristofoi anyɛmifeemɔ ni yɔɔ jeŋ fɛɛ lɛ feɔ sɛɛnamɔ ni jɛɔ hemɔkɛyeli ni anaa yɛ Biblia lɛ mli akɛ Nyɔŋmɔ Wiemɔ ni jɛ mumɔŋ lɛ he nɔkwɛmɔ nɔ.​—2 Tim. 3:⁠16.

Nɔ Hewɔ Ni Esa Akɛ Oye Obua Mɛi Krokomɛi Ni Amɛna Hemɔkɛyeli

³ Akɛni oshara eba wala he hewɔ lɛ, wɔyɛ yiŋtoo ni mli wa ni wɔɔdamɔ nɔ wɔye wɔbua mɛi krokomɛi ni amɛna hemɔkɛyeli. Akɛni enɛ yɔɔ wɔjwɛŋmɔ mli hewɔ lɛ, wɔkɛ Buu-Mɔɔ lɛ baaha yɛ May kɛ June koni ashɛ. Wɔye wɔ-Nuŋtsɔ Yesu Kristo gbele lɛ kaimɔ lɛ wɔgbe naa. Wɔ fɛɛ wɔdaa Yehowa shi akɛ kɛtsɔ Yesu afɔleshaa gbele lɛ nɔ hewɔ lɛ, wɔnaa eshaifaa ni hiɔ shi daa. No hewɔ lɛ wɔkɛ hehiamɔ miisumɔ ni wɔtsɔɔ mɛi ni kaneɔ Buu-Mɔɔ wolo tɛtrɛɛ lɛ akɛ Buu-Mɔɔ lɛ yiŋtoo, taakɛ atsɔɔ mli yɛ Blɔfo nɔ lɛ baafa 2 lɛ ji akɛ, koni ewo ‘hemɔkɛyeli yɛ Maŋtsɛ ni yeɔ nɔ bianɛ, Yesu Kristo, ni ela ni efɔse eshwie shi lɛ gbeleɔ gbɛ kɛhaa adesai koni amɛna naanɔ wala’ lɛ mli hewalɛ. Bɔɔ mɔdɛŋ ni okɛ eshɛɛ lɛ aha klɛŋklɛŋ kɛ aaahi. Kɛ anyɛɛɛ ashɛ lɛ, okɛ woji tɛtrɛbii enyɔ kɛ wolo bibioo kome aha, koni okɛtɛo anɔkwale dumɔwui lɛ.

⁴ Biblia mli nilee babaoo ni mli kwɔ ni anyɛɔ atsuɔ he nii lɛ kɛ ehewalɛ ni nyɛɔ etsakeɔ gbɔmɛi ni haa amɛfeɔ gbɔmɛi kpakpai lɛ ji odaseyeli ni tsɔɔ akɛ Biblia lɛ ji Nyɔŋmɔ Wiemɔ lɛ fa. Wɔji mɛi ni esa akɛ wɔye wɔbua gbɔmɛi koni amɛle odaseyeli nɛɛ he nɔ ko. Dani wɔɔnyɛ wɔfee enɛ lɛ, ebiɔ ni klɛŋklɛŋ lɛ wɔtsɔɔ amɛ nii ni amɛhe nɔ ni Biblia lɛ kɛɔ lɛ amɛye.

⁵ Mɛɛ gbɛ nɔ atsɔ aye abua wɔteŋ mɛi pii koni wɔna Nyɔŋmɔ Wiemɔ lɛ mli hemɔkɛyeli? Titri lɛ kɛtsɔ shia Biblia mli nikasemɔ ni mɔ ko kɛwɔ fee yɛ tsuishitoo mli lɛ nɔ. No hewɔ lɛ, eshɛɛ ni wɔɔna loo Biblia loo wolo ko ni wɔkɛaaha lɛ jeee wɔhemɔkɛyeli-hamɔ he mɔdɛŋbɔɔi lɛ anaagbee; eji eshishijee pɛ kɛkɛ. Kɛ mɔ ko ni kɛwɔ kase nii lɛ he eba sɛɛnamɔ kɛha wɔ lɛ, wɔ hu wɔbaasumɔ ni wɔfee nakai nɔŋŋ wɔha mɛi ni wɔkɛ woji haa amɛ lɛ, ni wɔkɛ amɛ akase Biblia lɛ ni wɔtswa amɛhemɔkɛyeli wɔma shi.

⁶ Yehowa jɛɔ esuɔmɔ mli etsɔɔ Biblia lɛ ni ji e-Wiemɔ lɛ nɔ ekɛ gbɛtsɔɔmɔ haa mɛi fɛɛ ni taoɔ ehebuu gbɛtsɔɔmɔ kɛmiitsɔ “amanehulu kpeteŋkpele” lɛ mli lɛ. (Mat. 24:21) Buu-Mɔɔ lɛ eye ebua wɔ ni etswa wɔ diɛŋtsɛ wɔhemɔkɛyeli yɛ Nyɔŋmɔ Wiemɔ lɛ mli ema shi. Wɔmiisumɔ ni wɔye wɔbua mɛi krokomɛi ni amɛnine ashɛ yelikɛbuamɔ ni wolo tɛtrɛɛ ni ekaaa nɛɛ kɛhaa lɛ nɔ koni amɛtswa amɛ diɛŋtsɛ amɛhemɔkɛyeli yɛ Nyɔŋmɔ Wiemɔ lɛ mli amɛma shi kɛha yibaamɔ. No hewɔ lɛ wɔkɛ ekaa baafɔ mɛi pii anine yɛ May kɛ June mli koni amɛshɛ woji tɛtrɛbii lɛ eko.