Ya Ni Wɔɔya Nɔ Yɛ Wɔ Sɔɔmɔ Iɛ Mli Ni Wɔkpaaa
1 Shihilɛ ni yɔɔ je nɛɛ mli lɛ miitsake kɛ foi yɛ be mli ni wɔboteɔ naagbee be lɛ mli vii lɛ. (1 Kor. 7:31) Saji ni hosoɔ je lɛ miiya nɔ ni eeha Biblia gbalɛ miiba mli. Yɛ be mli ni wɔsusuɔ nibii ni yaa nɔ yɛ jeŋ ni ebɔle wɔ lɛ mli kɛ teokrase gbɛjianɔtoo lɛ mli lɛ he lɛ, wɔyɔseɔ bɔ ni ehe hiaa waa akɛ wɔɔshiɛ Maŋtsɛyeli lɛ he “sanekpakpa lɛ.”—Marko 13:10.
2 Wo Hiɛnyiɛlɔ kɛ Nɔkwɛmɔ nɔ Feelɔ, Yesu Kristo, ji mɔ ni kɛ famɔ akɛ wɔfee kaselɔi lɛ ha. Yɛ nakai feemɔ mli lɛ, emaa omanye ni nakai nitsumɔ lɛ baaye lɛ nɔ mi kɛtsɔɔ eshiwoo nɛɛ nɔ, “mikɛnyɛ yɛ daa kɛyashi jeŋ naagbee lɛ.” (Mat. 28:19, 20) Yesu kaselɔi lɛ kɛ hiɛdɔɔ tsu ewiemɔ lɛ he nii, ni yɛ be mli ni amɛkɛ shiteekɛ-woo ni mli wa po kpeɔ lɛ. “amɛfɔɔɔ nitsɔɔmɔ kɛ Yesu Kristo shiɛmɔ.” (Bɔfoi 5:42) Mɛɛ nɔkwɛmɔ nɔ kpakpa po amɛfee amɛfɔ shi amɛha wɔ nɛkɛ!
3 Yɛ be mli ni wɔkaneɔ 1990 Yearbook lɛ, wɔnaa akɛ Yehowa ejɔɔ wɔ sɔɔmɔ lɛ nɔ ejaakɛ eha nɔyaa babaoo eba yɛ kaselɔi heei lɛ amli. Shikpɔji komɛi yɛ ni nɔyaa ni abɔ he amaniɛ yɛ jɛmɛ lɛ yɛ naakpɛɛ diɛŋtsɛ. Nɔyaa ni tee nɔ ye jeŋ fɛɛ lɛ fe bɔ ni wɔteŋ mɔ ko baanyɛ asusu he yɛ afii fioo ko ni eho lɛ amli. (Yes. 60:22) Shi wɔ diɛŋtsɛ wɔ shikpɔŋkuku lɛ hu? Ni wɔ aŋkroaŋkro sɔɔmɔ nitsumɔ lɛ hu? Ani wɔmiinya yɛ gbɛfaŋnɔ ni wɔna yɛ sɔɔmɔ lɛ mli lɛ kɛ nɔ ni wɔnanemɛi nitsulɔi lɛ tsu yɛ he fɛɛ he lɛ he? Ani akɛ aŋkroaŋkroi lɛ wɔmiiya wɔhiɛ yɛ wɔsɔɔmɔ nitsumɔ lɛ mli ni wɔkpaaa?
Wɔ Gbɛfaŋnɔ Akɛ Aŋkroaŋkroi
4 Eka shi faŋŋ akɛ jeee shikpɔŋkukuji lɛ fɛɛ woɔ yibii pɛpɛɛpɛ. (Okɛto Mateo 13:23 he.) Eji anɔkwale hu akɛ shikpɔŋkukuji komɛi, tamɔ Ireland kɛ Quebec bafee he ni woɔ yibii yɛ afii pii tɔlɛ nitsumɔ ni sɔɔlɔi ekaalɔi tsu lɛ hewɔ. Shitee-kɛ-wolɔi babaoo yɛ hei pii, ni hei komɛi hu yɛ ni gbɔmɛi lɛ efee shikpilikpii ni amɛbuuu Maŋtsɛyeli lɛ he sane lɛ. Yɛ gbɛ kroko nɔ lɛ, maji kɛ akrowai komɛi yɛ ni etamɔ nɔ ni gbɔmɛi lɛ ahiɛ ekpa naatsii lɛ nɔ aloo kɛ naatsii ko yɛ loo eko bɛ lɛ jeee amɛhe sane ko dɔŋŋ. Anɔkwa sane lɛ ji akɛ, yɛ bɔ ni wɔ shikpɔŋkuku lɛ ji lɛ fɛɛ sɛɛ lɛ, esaaa akɛ ekaa ni wɔyɔɔ lɛ naa baa shi. Bɔfo Paulo ŋma akɛ, “Nyɛkahaa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” (Gal. 6:9) Eŋaawoo wiemɔi lɛ kɔɔ Kristofoi fɛɛ he. Mɛɛ gbɛ nɔ wɔɔtsɔ wɔfee nakai yɛ? Mɛni baanyɛ aye abua wɔ ni wɔya nɔ yɛ sɔɔmɔ lɛ mli ni wɔkpaaa?
5 Wɔbaanyɛ wɔfee ekaa ni wɔha wɔ sɔɔmɔ lɛ aye omanye kɛ wɔkɛ wɔhiɛ fɔ Yehowa kɛ ehewalɛ nɔ koni ewaje wɔ. Ha ahi ojwɛŋmɔ mli yɛ be fɛɛ mli akɛ Yehowa ji mɔ ni haa shiɛmɔ lɛ woɔ yibii. (1 Kor. 3:6) Yɛ wɔsɔlemɔi kɛha yelikɛbuamɔ lɛ hetoo hamɔ mli lɛ. Yehowa kɛ ŋaawoo, gbɛtsɔɔmɔ ni anyɛɔ atsuɔ he nii, kɛ Biblia kasemɔ he woji babaoo ni wɔ diɛŋtsɛ lɛ wɔbaanyɛ wɔkɛtsu nii ni wɔkɛye wɔbua mɛi krokomɛi ni amɛbale lɛ haa wɔ. Ani wɔkɛ gbɛjianɔtoo nɛɛ fɛɛ miitsu nii?
Hiɛmɔ Jwɛŋmɔ Kpakpa Mli
6 Kɛ wɔhiɛ jwɛŋmɔ ni ejaaa lɛ, enɛ baanyɛ atsi sɔɔmɔ ni woɔ yibii lɛ gbɛ. Kɛ wɔhiɛ gbɔmɛi ni yɔɔ shikpɔŋkuku lɛ mli lɛ ahe jwɛŋmɔ gbonyo yɛ bɔ ni tsutsu lɛ amɛbooo sane lɛ toi hewɔ lɛ, nakai su lɛ baaje kpo yɛ wɔgbee, wɔhiɛ su, kɛ hesaamɔ ni wɔfeee yɛ sɔɔmɔ lɛ mli lɛ mli. Wɔnine eshɛ nitsumɔ akɛ wɔshiɛ ni wɔtsɔɔ nii lɛ nɔ, ni akɛko wɔ akɛ nitsumɔ lɛ eba naagbee. No hewɔ ni wɔbɔɔ mɔdɛŋ ni wɔkɛ ŋaa atsu nii yɛ naatsii lɛ mli po lɛ. Shi sane ni yɔɔ mɔbɔ ji akɛ,‘kɛjɛ be mli ni naatsii lɛ ba nɛɛ, wɔlaaje shiɛlɔi aaafee 3,000 ni amɛbuuu amɛ sɔɔmɔ nitsumɔ he akɔntaa dɔŋŋ. Jwɛŋmɔ gbonyo ni ahiɛ fata nɛkɛ naagba nɛɛ he. Esa akɛ suɔmɔ ni wɔyɔɔ akɛ wɔɔfee toiboo ni wɔba wɔhe shi wɔha ŋwɛi gbɛtsɔɔmɔ lɛ atsirɛ wɔ ni wɔya wɔhiɛ yɛ wɔsɔɔmɔ lɛ mli ni wɔkpaaa, naatsii yɛ jio, naatsii bɛ jio.
7 Yehowa yiŋtoo ni kɔɔ kɔkɔ ni aaabɔ efɔŋfeelɔi lɛ ahe lɛ kɛ kaselɔi anaabuamɔ lɛ baaba naagbee dani hiɛkpatamɔ lɛ baaba. Wɔbaanyɛ wɔna sɔɔmɔ lɛ mli miishɛɛ lɛ mli gbɛfaŋnɔ bianɛ, ni wɔbaakpa naanɔ jɔɔmɔi yɛ Yehowa webii ateŋ lɛ gbɛ kɛ wɔjie wɔhemɔkɛyeli kɛ suɔmɔ lɛ kpo kɛtsɔ ya ni wɔɔya nɔ yɛ wɔsɔɔmɔ lɛ mli ni wɔkpaaa lɛ nɔ.