“Okɛ Mɛi Krokomɛi Aja Mumɔŋ Ninamɔ”
1 Taakɛ anɔkwafo Mose ji lɛ. Yehowa Odasefoi ni yɔɔ ŋmɛnɛŋmɛnɛ beaŋ lɛ le akɛ anyɛŋ akɛ je nɛŋ heloonaa ninamɔ ato jara ni mumɔŋ ninamɔ hiɛ lɛ he. (Heb. 11:26) Shika baanyɛ ahe shiai, kar sɔrɔtoi, kɛ nibii krokomɛi, shi enyɛŋ ehe wala, jwɛŋmɔŋ toiŋjɔlɛ, aloo Yehowa Nyɔŋmɔ nɔkpɛlɛmɔ kɛ jɔɔmɔ ni ekɛhaa lɛ.
2 Nyɔŋmɔ Wiemɔ lɛ kɛ eyiŋtoi ahe nilee kɛ shishinumɔ ji anɔkwa mumɔŋ ninamɔ diɛŋtsɛ. (Kol. 2:3) Nɛkɛ ninamɔ ni ekaaa nɛɛ baanyɛ ekɛ anɔkwa miishɛɛ aba amrɔ nɛɛ, kɛ hiɛnɔkamɔ ni ma shi shiŋŋ kɛha wɔsɛɛ. Kwɛ bɔ ni ajɔɔ wɔ babaoo aha akɛ wɔnine eshɛ mumɔŋ ninamɔ ni tamɔ nɛkɛ nɔ!
Bɔ Ni Wɔɔfee Wɔha Mɛi Krokomɛi Ana Nii
3 Wɔbaanyɛ wɔye wɔbua ni mɛi krokomɛi ana nii yɛ mumɔŋ kɛtsɔ Buu-Mɔɔ lɛ ni wɔkɛaaha amɛ, akɛni no baanyɛ anyiɛ amɛhiɛ kɛya ‘jwetrii ni aŋɔtee’ ni ji Nyɔŋmɔ he nilee mli lɛ hewɔ. (Abɛi 2:4) Wɔkɛ Buu-Mɔɔ lɛ shɛɛ baaha yɛ hegbɛ fɛɛ hegbɛ ni sa ni wɔɔna lɛ mli yɛ June. Kɛ wɔha bɔ ni Buu-Mɔɔ lɛ eha wɔtsɔmɔ niiatsɛmɛi lɛ hi wɔjwɛŋmɔ mli lɛ, wɔtsiŋ naa, shi moŋ wɔɔtao gbɛi sɔrɔtoi anɔ ni wɔɔtsɔ ni wɔkɛha mɛi babaoo bɔ ni wɔɔnyɛ. (Abɛi 3:27) Kadimɔ mɛi ni he woji tɛtrɛbii lɛ loo woji bibii Iɛ eko lɛ adrɛs, kɛ yiŋtoo akɛ obaaya amɛŋɔɔ ekoŋŋ ni oyaha amɛ woji tɛtrɛbii lɛ daa yɛ bo diɛŋtsɛ ogbɛ ni ooohala nɔ.
4 Mɛɛ gbɛ nɔ wɔɔnyɛ wɔtamɔ nuu ni sheɔ Nyɔŋmɔ gbeyei ni awie ehe yɛ Lala 112 akɛ eja enibii ni jara wawai lɛ eha mɛi babaoo lɛ, yɛ mumɔŋ shishinumɔ naa? (Lala 112:1, 3, 9) Ehe miihia ni wɔtao mɛi ni tamɔ gwantɛŋi lɛ ni wɔye wɔbua amɛ ni amɛna amɛ mumɔŋ hiamɔ nii. (Mat. 5:3) Enɛ biɔ ni wɔŋɔ hegbɛi fɛɛ ni wɔnaa lɛ ni wɔkɛye odase trukaa aloo yɛ gbɛ ni yɔɔ tɛɛ nɔ.
5 Ni wɔye odase tɛɛ yɛ naatsii nɛɛ mli? Oh, hɛɛ. Shiɛlɔi kɛ gbɛgbalɔi babaoo miifee nakai yɛ omanyeyeli mli. Nɔ ni etsɔɔ ji, kɛfata hegbɛi ni wɔɔŋɔ ni wɔkɛye odase trukaa lɛ he lɛ, obaato be pɔtɛɛ ko he gbɛjianɔ ni okɛ ohe awo shiɛmɔ nitsumɔ lɛ mli yɛ otsi lɛ mli. Obaashi shia yɛ be pɔtɛɛ ko mli, ni osaa ohe akɛ oyaafee Biblia mli nikasemɔ, aloo oyaafee sɛɛsaramɔ, aloo okɛ woji tɛtrɛbii yaaha mɛi ni heɔ eko daa lɛ, aloo oya shia ko mli ni oyawie Nyɔŋmɔ Maŋtsɛyeli lɛ he. Yɛ maji bibii lɛ babaoo mli, hei ni eji nɔ ni mɛi fɔɔ feemɔ akɛ amɛaawa amɛdamɔ shi ni amɛŋɔ amɛhe loo amɛgba sane lɛ, sanegbaa ni tamɔ nɛkɛ baafee nɔ ni oshara ko baŋ he kwraa.
6 Ani obaanyɛ ona bei nibi ni okɛye odase yɛ onitsumɔ he? Kɛji onanemɛi nitsulɔi lɛ le bo akɛ Yehowa Odasefonyo ni amɛbuɔ bo hu yɛ no hewɔ lɛ, obaana akɛ yɛ be kɛ bei amli lɛ amɛbaabibii bo sanebimɔi babaoo kɛha niiamlitsɔɔmɔ aloo ŋaawoo. Obaanyɛ ogbala amɛ jwɛŋmɔ kɛya wolo ni wieɔ nakai sanebimɔ lɛ he lɛ nɔ. Atsiko onaa akɛ okahi bo diɛŋtsɛ owoji loo okakane woji nɛɛ eko. Woji nɛɛ ateŋ eko ni oookane yɛ nyɛniyeli be mli lɛ baanyɛ agbala onanemɛi nitsulɔi lɛ eko ewo sanegbaa mli. No hu baanyɛ agbele gbɛ aha bo kɛha odaseyeli fɛfɛo ni ekolɛ ni okɛ woji nɛɛ eko po aha, kɛkɛ lɛ yɛ no sɛɛ lɛ sɛɛsaramɔ ni woɔ yibii.
7 Anyɛŋ akɛ jwiɛtɛi, shika, kɛ heloonaa jwetrii krokomɛi lɛ eko eko ato mumɔŋ ninamɔ ni ji nilee kɛ niiashishinumɔ ni wɔna kɛtsɔ Yehowa gbɛjianɔtoo lɛ nɔ kɛ Biblia lɛ ni wɔkaseɔ lɛ nɔ lɛ he kɔkɔɔkɔ. Anɔkwa miishɛɛ, gbɛi fɛfɛji, toiŋjɔlɛ, “gbii asɛɛjɛkɛmɔ”—naanɔ wala po—mɛi ni taoɔ mumɔŋ ninamɔ lɛ anine shɛɔ enɛɛmɛi fɛɛ nɔ. (Abɛi 3:13-18) Kɛ wɔkɛ mɛi krokomɛi ja wɔ mumɔŋ ninamɔ lɛ, wɔtsɔɔ hiɛsɔɔ ni wɔyɔɔ kɛha nɔ ni wɔnine eshɛ nɔ lɛ, ni wɔnaa Yehowa jɔɔmɔi daa.—Abɛi 19:17.