Ye Anɔkwale Lɛ He Odase
1 Yesu fee lɛ faŋŋ akɛ eba jalɛ mli ni ebaye anɔkwale lɛ he odase. Ekɛɛ: “Mi lɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.”—Yoh. 18:37.
2 Yesu wo Yehowa gbɛi lɛ hiɛ nyam kɛtsɔ ekaa ni ekɛshiɛ lɛ nɔ. Etsɔɔ anɔkwa suɔmɔ ni eyɔɔ kɛha gbɔmɛi lɛ hu yɛ yoomɔ ni eyoo amɛmumɔŋ shihilɛ ni yɔɔ mɔbɔ lɛ hewɔ. Mateo ŋma yɛ enitsumɔ lɛ he akɛ: “Ni Yesu kpa maji kɛ akrowai lɛ fɛɛ nɔ, ni etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ, . . . Shi beni ena mɛi babaoo lɛ, emusuŋ tsɔ lɛ yɛ amɛhewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mat. 9:35, 36) Esa akɛ wɔ hetuu-kɛhamɔ kɛha Yehowa kɛ suɔmɔ ni wɔyɔɔ kɛha mɛi krokomɛi lɛ atsirɛ wɔ ni wɔshiɛ, taakɛ Yesu fee lɛ.
Wɔ Nitsumɔ Ni He Hiaa Lɛ
3 Anɔkwa suɔmɔ ni wɔyɔɔ kɛha gbɔmɛi kɛ Yehowa lɛ tsirɛɔ wɔ koni wɔŋɔ hegbɛ fɛɛ hegbɛ ni wɔnaa lɛ ni wɔkɛtsɔɔ mɛi lɛ anɔkwale ni kɔɔ Yehowa kɛ enaakpɛɛ nitsumɔi ahe lɛ he nii. (Lala 96:2, 3; 145:10-13) Shi kɛlɛ, daa gbi shihilɛ mli nɔnyɛɛ, shihilɛ mli naagbai, kɛ mɛi anifeemɔi gbohii yɛ naatsii nɛɛ hewɔ lɛ kɛ nibii babaoo ni gbalaa wɔ jwɛŋmɔ lɛ baanyɛ agbala wɔ kɛjɛ shiɛmɔ nitsumɔ lɛ he. No hewɔ lɛ, ehe miihia ni wɔha bɔ ni ehe hiaa ni wɔye anɔkwale ni kɔɔ Nyɔŋmɔ kɛ e-Maŋtsɛyeli lɛ he lɛ he odase lɛ ahi wɔjwɛŋmɔ mli. Esaaa ni wɔŋmɛɔ gbɛ ni nibii gbalaa wɔ kɛjɛɔ yiwalaheremɔ nitsumɔ ni he hiaa waa ni akɛha wɔ ni wɔtsu nɛɛ he. (Mat. 24:14; 28:19, 20) Nii ni wɔɔtsu be fɛɛ be yɛ Yehowa sɔɔmɔ mli lɛ buɔ wɔhe, ni ebaanyɛ ekɛ naanɔ sɛɛnamɔi aha mɛi ni ehe hiaa ni amɛnu anɔkwale lɛ he shɛɛsane lɛ.—1 Kor. 15:58.
4 Ani obaanyɛ osɔmɔ akɛ daa gbɛgbalɔ loo gbɛgbalɔi awalɔ? Mɛni hewɔ osusuuu oshihilɛi ahe ni okwɛ kɛji obaanyɛ olɛɛ osɔɔmɔ lɛ mli yɛ nɛkɛ gbɛ nɔ. Kɛji oji daa gbɛgbalɔ momo po lɛ, ani ootsu nii waa diɛŋtsɛ ni onine ashɛ ŋmɛlɛtswai 90 nɔ yɛ daa nyɔŋ nɔ? Ani oba hejɔɔmɔ kwraa kɛjɛ onitsumɔ mli? Mɛni hewɔ okɛ obe tsuuu nii babaoo yɛ shiɛmɔ mli? Obalaŋtai babaoo ni yɔɔ skul lolo lɛ kɛ amɛhe woɔ gbɛgbalɔi awamɔ sɔɔmɔ lɛ mli be fɛɛ be. Mɛnɛɛmɛi ena akɛ enɛ haa amɛnaa hejɔɔmɔ yɛ mumɔŋ kɛ helooŋ fɛɛ, ni ehaa amɛtsui nyaa.
5 Kɛ wɔɔye anɔkwale lɛ he odase ni emɔ shi lɛ, belɛ ebiɔ ni wɔto wɔbe he gbɛjianɔ jogbaŋŋ diɛŋtsɛ. (Efes. 5:15, 16) Gbɛgbalɔi awamɔ sɔɔmɔ lɛ biɔ ni kɛ aja mli lɛ, ana ŋmɛlɛtswai 2 yɛ gbi kome mli yɛ nyɔŋ lɛ mli. Mɛi komɛi halaa akɛ amɛaate shi mra aaafee ŋmɛlɛtswaa kome fe bɔ ni amɛteɔ shi daa lɛ koni amɛnyɛ amɛya shiɛmɔ dani amɛya skul loo nitsumɔ. Eyɛ mli akɛ wɔmiitsu nii yɛ naatsii shishi moŋ, shi kɛ okɛ mɛi ni ebɔ mɔdɛŋ amɛto amɛbe he gbɛjianɔ ni amɛfee gbɛgbalɔi awalɔi lɛ gba sane lɛ, amɛbaawo bo hewalɛ ni amɛbaaha bo ŋaawoi ni yeɔ ebuaa.
6 Yehowa Nyɔŋmɔ jieɔ mlihilɛ kpo etsɔɔ etsuji yɛ bei fɛɛ mli. Mɛi ni sɔmɔɔ lɛ yɛ anɔkwayeli mli lɛ anine eshɛ jɔɔmɔi babaoo nɔ. Yehowa yaa nɔ ejieɔ emlihilɛ lɛ kpo yɛ mɛi ni sumɔɔ lɛ lɛ anɔ. Enaa he miishɛɛ akɛ eeekpɛlɛ nɔ fɛɛ nɔ ni wɔshihilɛi ŋmɛɔ wɔ gbɛ ni wɔtsu yɛ be mli ni wɔyeɔ anɔkwale lɛ odase lɛ nɔ.—Heb. 6:10.