Nyɛkahaa Wɔnijiaŋ Miije Wui
1 1991 Yearbook lɛ gbaa wɔ nitsumɔ lɛ mlilɛɛmɔ ni yɔɔ miishɛɛ ni yaa nɔ yɛ shikpɔŋ muu lɛ fɛɛ nɔ lɛ he sane. Shiɛlɔi ayifalɛ heei miiya nɔ yɛ he fɛɛ he.
2 Shi te oshikpɔŋkuku lɛ yɔɔ tɛŋŋ? Ani okɛ shikpilikpii-feemɔ kpeɔ? Ani Maŋtsɛyeli lɛ he sane lɛ kɔɔɔ gbɔmɛi lɛ ahe nɔ ko? Ani mɛi komɛi sheɔ gbeyei akɛ amɛaabo toi yɛ naatsii lɛ hewɔ? Kɛ nakai ni lɛ, belɛ Paulo ŋaawoo ni yɔɔ Galatabii 6:9 lɛ baawo bo hewalɛ: “Nyɛkahaa ekpakpa-feemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” Eka shi faŋŋ akɛ nɔ ni fata ekpakpa ni wɔɔfee lɛ he ji Maŋtsɛyeli sanekpakpa lɛ ni wɔɔshiɛ yɛ shia kɛ shia. Esa akɛ wɔya nɔ ni wɔkɛ hehiamɔ ashiɛ kɛyashi be mli ni Yehowa aaakɛɛ akɛ agbe nitsumɔ lɛ naa. (Yes. 6:8) Aana gwantɛŋi lɛ lolo yɛ shikpɔŋkukuji ni mli nitsumɔ wa lɛ amli.
3 Mɛni wɔbaanyɛ wɔfee koni wɔnijiaŋ akaje wui yɛ sɔɔmɔ nitsumɔ lɛ mli?Wɔsanegbaa shishijee lɛ tsakemɔ baanyɛ aye abua. Anaa ŋaawoi ni hi fe fɛɛ yɛ Reasoning wolo lɛ mli. Ani oka amɛ okwɛ? Hiɛkpamɔ wiemɔ kuku ni yɔɔ tɛ̃ɛ baanyɛ agbala shiatsɛmɛi pii ajwɛŋmɔ. Ha gbɔmɛi lɛ ale akɛ amɛ kɛ amɛhilɛ-kɛhamɔ he miishɛɛ ni oyɔɔ hewɔ ni oba jɛmɛ lɛ.
Okɛ “Kingdom Come” Wolo Lɛ Aha
4 Wɔkɛ woji memeji ni hiɛ baafai 192 lɛ eko fɛɛ eko baaha yɛ February mli. Kɛ enɛɛmɛi eko bɛ lɛ, wɔbaanyɛ wɔtsɔɔ akɛ wɔsusuɔ mɛi krokomɛi ahe kɛtsɔ “Let Your Kingdom Come” wolo lɛ ni wɔkɛaaha nɔ. Wɔ diɛŋtsɛ lɛ wɔjieɔ Nyɔŋmɔ Maŋtsɛyeli lɛ yi wɔtsɔɔ ni wɔfiɔ sɛɛ kɛtsɔɔ sanekpakpa lɛ shiɛmɔ nɔ. “Kingdom Come” wolo lɛ ji dɛŋdade fɛfɛo ni hi ni baaye abua mɛi krokomɛi ni amɛkase babaoo yɛ Maŋtsɛyeli ni amɛtsiɔ ta babaoo yɛ sɔlemɔ mli, ni kɛlɛ nɔ ko fioo ko pɛ amɛle yɛ he lɛ he.
5 Wolo nɛɛ mli yitso fɛɛ yitso yɛ saji otii ni abaanyɛ awie he. Obaana akɛ yitso 1 kɛ mfoniri ni yɔɔ baafai 4 kɛ 5 lɛ baaye abua oshiɛmɔ wiemɔ lɛ. Namɔ sumɔŋ ni ehi Paradeiso shihilɛ ni afee he mfoniri yɛ jɛmɛ lɛ mli? Yitso 1 lɛ mli klɛŋklɛŋ wiemɔi kukuji enyɔ lɛ kɔɔ sɔlemɔ ni mɛi ni yɔɔ Kristendom lɛ eti mli amɛkɛɛ aahu lɛ he. Shi obaana saji krokomɛi ni sa kɛha oshiɛmɔ wiemɔ lɛ hu, tamiɔ yitso 18 ni yɔɔ baafa 174 lɛ klɛŋklɛŋ wiemɔi enyɔ lɛ. Agbɛnɛ akrabatsa ni ji “What God’s Kingdom Will Do” (Nɔ Ni Nyɔŋmɔ Maŋtsɛyeli lɛ Baafee) ni yɔɔ baafa 25 lɛ kɛ wɔ Saneyitso Kɛha Sanegbaa ni wɔkɛtsuɔ nii bianɛ lɛ yaa waa. Kɛ okɛ woji memeji lɛ miitsu nii hu lɛ, obaanyɛ okɛ hiɛkpamɔ wiemɔi titrii ni tamɔ nɛkɛ atsu nii. Nɔkwɛmɔ nii komɛi ji: Good News to Make You Happy yitso 16, baafai 141, 142; yitso 17, baafai 155, 157. Life Does Have a purpose, baafai 160, 167, kukuji 1, 2. Choosing the Best Way of Life, yitso 11, baafa 177, kukuji 1, 2.
6 Yɛ anɔkwale mli lɛ Maŋtsɛyelishiɛmɔ lɛ ni wɔkɛ wɔhe aaawo mli daa otsi lɛ baawo wɔ hewalɛ ni ewaje wɔ hu. Kɛfata he lɛ, wɔmumɔŋ shidaamɔ baaya hiɛ kɛtsɔ Nyɔŋmɔ Wiemɔ lɛ kasemɔ daa kɛ asafoŋ kpeei ni wɔkɛ wɔhe aaawo mli lɛ nɔ.—Heb. 10:23-25.
Wo Mɛi Krokomɛi Ahewalɛ Ni Amɛhe Awa
7 Obaanyɛ oye obua bo diɛŋtsɛ ohe ni owo mɛi krokomɛi hewalɛ kɛtsɔ nii ni okɛ amɛ aaatsu yɛ shiɛmɔ mli lɛ nɔ. (Gal. 6:10) Mɛni hewɔ obiii gbɛgbalɔi lɛ kɛ onukpai lɛ kɛji obaanyɛ ni ofata amɛhe kɛya shiɛmɔ? Agbɛnɛ hu miishɛɛ ni ooona yɛ mɛi ni efɔɔɔ shiɛmɔyaa loo amɛkpa kwraa lɛ amumɔŋ hilɛ-kɛhamɔ he lɛ baawo amɛ hewalɛ.
8 Ehe miihia ni wɔ fɛɛ wɔŋmɛ wɔtsui shi yɛ Yehowa sɔɔmɔ mli ni wɔnijiaŋ akaje wui yɛ nɛkɛ naagbee gbii ni mli wawai nɛɛ amli. Tsuishiŋmɛɛ ni tamɔ nɛkɛ baaha wɔnyɛ wɔhiɛ ekaa ni wɔfeɔ akɛ Kristofoi lɛ mli yɛ saji ni mli wawai loo shikpilikpii ni mɛi krokomɛi feɔ lɛ fɛɛ sɛɛ. (Heb. 10:36-39) Sɔlemɔ oha Yehowa ni ewɔ bo hewalɛ. (Yes. 40:29-31) Bi ni eye ebua bo ni oŋmɛ otsui shi, ni ohiɛ jwɛŋmɔ kpakpa. Kaimɔ akɛ, wɔmiitsu Nyɔŋmɔ nitsumɔ. Enaa nɔ ni wɔfeɔ yɛ esɔɔmɔ mli lɛ, ni ehiɛ kpaaa nɔ. (Heb. 6:10) No hewɔ lɛ nyɛkahaa wɔnijiaŋ miije wui! Shi moŋ, “nyɛtekea nɔ yɛ Nuntsɔ lɛ nitsumɔ lɛ mli daa nɛɛ,” ni nyɛkɛ nyɛhe afɔa Yehowa nɔ ni ewo wɔ hewalɛ kɛha ‘enitsumɔ kpakpa’ lɛ.—1 Kor. 15:58; Gal. 6:9.