Ni Wɔɔkpe Daa Akɛni Gbi lɛ Bɛŋkɛɔ Nɛɛ
1 Gbɔmɛi pii yɛ je lɛŋ ni amɛlaaje hiɛsɔɔ ni amɛyɔɔ kɛha krɔŋkrɔŋ nii, no hewɔ lɛ amɛtuɔ amɛbe kɛ amɛshika fɛɛ amɛhaa heloo gbɛfaŋ nibii, gbɛihemɔ kɛ miishɛɛ ni amɛtaoɔ ni sɛɛnamɔ bɛ he lɛ. (2 Tim. 3:1-5) Bɔni afee ni anɔkwa Kristofoi akwa gbɛ ni sɛɛnamɔ ko bɛ he nɛɛ lɛ, awoɔ amɛ hewalɛ ni amɛkpe kutuu daa kɛha mumɔŋ niyeli, akɛ hetuu ni wɔkɛhaa Nyɔŋmɔ pɛ lɛ fa.—2 Mose 20:5; Mat. 6:33; Heb 10:24, 25.
2 Yɛ naatsii lɛ kɛ naagbai komɛi ni nyɛmimɛi lɛ diɛŋtsɛ kɛkpeɔ hewɔ lɛ, amɛteŋ mɛi komɛi nyɛɛɛ afee enɛ daa. Te wɔɔfee tɛŋŋ wɔye wɔbua wɔhe ni wɔya asafoŋ kpeei kɛ mɛi komɛi eje gbɛ amɛmiikwɛ nɔ ni wɔfeɔ lɛ po? Mɛni aŋkroaŋkroi, wekui, onukpai kɛ asafoŋ sɔɔlɔi baanyɛ afee ni amɛha asafoŋ kpeei ni ayaa lɛ aya hiɛ?
Weku Mlibii Anitsumɔ
3 Kɛ weku lɛ esaa ehe jogbaŋŋ kɛha kpeei, ni amɛkase nɔ ni abaatsu henii lɛ, amɛ fɛɛ amɛkɛ miishɛɛ kpaa kpeei lɛ agbɛ. Awoɔ tsɛ lɛ, ni ji yitso lɛ hewalɛ koni eto gbɛjianɔ ni weku lɛ asusu nii ni asafo lɛ baakase kɛha otsi lɛ he. Ebaato gbɛjianɔ hu koni eye ebua eŋa kɛ ebii yɛ nii ni aha amɛ akɛ amɛfee yɛ Teokrase Sɔɔmɔ Skul lɛ mli lɛ mli.—5 Mose 6:6, 7; Okɛto 1 Mose 8:18, 20 he.
4 Kɛfata kwɛ ni eeekwɛ akɛ weku lɛ mlibii lɛ fɛɛ esaa amɛhe jogbaŋŋ yɛ mumɔŋ lɛ he lɛ, tsɛ lɛ kɛ gbɛtsɔɔmɔi baaha koni weku lɛ mlibii lɛ fɛɛ aya asafoŋ kpeei lɛ. Kɛ fɔlɔi lɛ fɛɛ loo amɛteŋ mɔ kome tsuɔ lɛ diɛŋtsɛ enitsumɔ lɛ, amɛbaanyɛ ni amɛto gbɛjianɔ ni amɛkpa mra koni amɛnyɛ amɛtsu shia lɛ mli nitsumɔi lɛ ni amɛnyɛ amɛya kpeei lɛ fɛɛ yɛ amɛbe naa pɛpɛɛpɛ hu. Gbekɛbii ni amɛdara lɛ baanyɛ aye abuɔ yɛ shia nitsumɔi amli koni ekatsii yɛ nyɛ lɛ nɔ tsɔ. Bɔni afee ni amɛye amɛbua yɛ enɛ mli lɛ, wekui komɛi kɛ “niyenii ni amɛhoomɔ waaa” toɔ nɔ ni amɛhoomɔ tsɛɔ lɛ najiaŋ yɛ kpeei gbii anɔ. Sɛɛnamɔ ko ni fata enɛ he ji akɛ, “niyenii ni amɛhoomɔ waaa” ni etsiii yɛ musuŋ lɛ haaa weku lɛ awɔ yɛ kpeei ashishi.
Asafo lɛ Nitsumɔ
5 Wɔbaanyɛ wɔkai nyɛmimɛi lɛ, titri lɛ mɛi ni efɔɔɔ kpeei baa lɛ ni amɛle gbi, be, kɛ he ni abaafee asafoŋ kpeei lɛ yɛ. Kɛ wɔkpa kpeei ni wɔmiiya shia lɛ, wɔbaanyɛ wɔsara nyɛmimɛi ni baaa lɛ, aloo wɔfee nakai yɛ be kroko ni sa mli, koni wɔgba amɛ wiemɔi lɛ ekomɛi kɛ adafi ni atswa. Kɛ oosaa ohe kɛha kpeei lɛ, ani obaanyɛ ofɔ nine otsɛ shiɛlɔ hee ko loo otsɛ shiɛlɔ ko ni egbɔjɔ akɛ ebafata ohe? Nyɛmimɛi oshijafoi komɛi toɔ gbɛjianɔ ni amɛsaa amɛhe kɛhaa asafoŋ kpeei yɛ nyɛmimɛi ni nyɛɛɛ anyiɛ lɛ ashiai amli koni amɛna mli gbɛfaŋnɔ.
6 Onukpai kɛ asafoŋ sɔɔlɔi baanyɛ aye abua babaoo ni amɛha mɛi ni baa kpeei lɛ ayifalɛ aya hiɛ kɛtsɔ daa saramɔ nɔ. (Yer. 23:4) Nikasemɔ nɔkwɛlɔ ko kɛ mɔ ni yeɔ buaa lɛ lɛ kɛfee amɛnitsumɔ akɛ amɛbaasara nyɛmi fɛɛ nyɛmi ni baaa kuu lɛ nikasemɔ lɛ yɛ nakai gbɛkɛ lɛ nɔŋŋ. Nɔ ni jɛ mli ba ji akɛ ewo kuu lɛ mlibii lɛ fɛɛ hewalɛ koni amɛba daa, ni etsɛɛɛ ni kuu lɛ na amɛ kpeebaa yifalɛ ni fe fɛɛ. Nikasemɔ nɔkwɛlɔi komɛi hu yasaraa mɛi ni efɔɔɔ kpeeibaa lɛ dani kpeei lɛ jeɔ shishi, koni ekɛwo amɛ hewalɛ ni amɛba. Enɛ kɛ nɔyaa ni anaa diɛŋtsɛ baa.
7 Asafo ko mumɔŋ nɔyaa he okadi ji bɔ ni amɛnitsɔɔmɔ kɛ kpeei ni abaa lɛ yɔɔ ha. Bɔni afee ni amɛbaa nii ni jara wa ni akɛwo amɛdɛŋ nɛɛ yi lɛ, onukpai ni yɔɔ asafo lɛ mli lɛ kɛ asafoŋ sɔɔlɔi lɛ tsuɔ nii waa koni amɛha wiemɔ ni asaa he jogbaŋŋ yɛ mli, ni amɛtsuɔ nitsumɔi krokomɛi ahe nii yɛ kui lɛ fɛɛ mli daa otsi. Agbɛnɛ hu, asafoi pii amli onukpai akuu lɛ kpeɔ shikome yɛ daa nyɔŋ nɔ koni amɛsusu asafo lɛ mumɔŋ shihilɛ he. Amɛsusuɔ yibɔ ni ba asafoŋ kpeei yɛ nyɔŋ ni tsɔ hiɛ lɛ he kɛfataa saji krokomɛi ahe yɛ nɛkɛ kpeei nɛɛ ashishi. Kɛ ayoo akɛ mɛi ni baa kpeei enumɔ lɛ eko shishi lɛ anɔ egbɔ lɛ, amɛbɔɔ mɔdɛŋ ni amɛle nɔ ni ha ebalɛ nakai, ni amɛtoɔ gbɛjianɔ koni amɛkɛye nɔ kunim.—Bɔfoi 20:28; 1 Pet. 5:2.
Okɛ Ohe Afɔ Yehowa Nɔ
8 Kɛji akɛ wɔnu amaniɛbɔɔi akɛ aje gbɛ aakwɛ wɔ po lɛ, nyɛhaa ehia wɔjwɛŋmɔ mli akɛ “Yehowa . . . kwaaa emɛi krɔŋkrɔŋi lɛ.” (Lala 37:28) Hemɔkɛyeli ni yeɔ emuu ni wɔɔna yɛ emli kɛ daa sɔlemɔ baawo wɔ hewalɛ ni wɔŋmɛ wɔtsui shi ni wɔbaŋ kpeei ni wɔyaa lɛ shi.—Luka 21:19; Yak. 1:2-6.
9 Yɛ aharabata bei amli lɛ, anaa akɛ tsei ni atɛo yɛ faai atoi lɛ nyɛɔ amɛdamɔɔ kɔɔyɔŋ tsakemɔ ni naa wa lɛ naa ni amɛwoɔ yibii hu. (Lala 1:1-3) Abaanyɛ awo wɔ fɛɛ hewalɛ ni wɔŋmɛ wɔtsui shi yɛ wɔhemɔkɛyeli he kaai ni yaa nɔ bianɛ yɛ yiwaa nɛɛ mli lɛ shishi, kɛ wɔkwaaa wɔhe naabuamɔ. Bɔni afee ni wɔye suɔmɔ ni wɔyɔɔ lɛ he odase ekoŋŋ lɛ, nyɛhaa wɔkɛfea oti ni ma wɔhiɛ akɛ wɔɔye wɔbua wɔhe yɛ nakai feemɔ mli.—Yoh. 13:34, 35.