Ani Kristofoi ‘Shiɔ Kpe’ Amɛhaa Gbohii?
1 Yɛ be mli ni wɔsusuɔ sane ni yɔɔ yiteŋgbɛ nɛɛ he lɛ, shishinumɔ kɛ yiŋtoo ni yɔɔ kpe ni ashiɔ ahaa gbohii lɛ he lɛ he miihia. Akɛni nɛkɛ kusum ni ji “kpeshii” kɛha gbohii nɛɛ egbɛ eshwa babaoo hewɔ lɛ, bɔ ni afeɔ lɛ ahaa lɛ hu yɛ sɔrɔtoi yɛ jeŋ lɛŋ hei sɔrɔtoi fɛɛ. Shi kɛlɛ, yiŋtoi ahewɔ ni ashiɔ kpe ahaa gbohii lɛ je amɛhe.
2 Yiŋtoi sɔrɔtoi babaoo ni ahiɛ yɛ je lɛŋ he komɛi nɛɛ ateŋ ekome ji hemɔkɛyeli ni ayɔɔ akɛ kɛji ashi gbonyo lɛ afɔ shi lɛ ekolɛ mumɔi fɔji baaye lɛ awui loo amɛbaawo kɛya lɛ. No hewɔ lɛ, ashiɔ kpe ni akɛkwɛɔ gbonyo lɛ koni akɛshwie mumɔi fɔji lɛ kɛya. Hemɔkɛyeli ni tamɔ nɛkɛ lɛ damɔ Babilonbii amale tsɔɔmɔ nɔ ni ejeee Kristofoi anɔ.—Jaj. 9:5, 10; Lala 146:3, 4.
3 Shi kɛlɛ, enɛ etsɔɔɔ akɛ Kristofoi efuuu amɛ mɛi ni gboiɔ lɛ aloo amɛyaaa amɛsuɔlɔ ko yara nɔ. Kristofoi tamɔ gbɔmɛi krokomɛi fɛɛ, ni amɛnuɔ nii ahe hu tamɔ mɛi krokomɛi ji lɛ. Shi kɛlɛ, amɛkwɛɔ jogbaŋŋ akɛ amɛkɛ amɛhe wooo nifeemɔi ni baaha efee tamɔ nɔ ni amɛkɛ amɛhe miiwo Babilonbii amale hemɔkɛyeli mli lɛ amli yɛ gbɛ ko kwraa nɔ. No hewɔ lɛ, amɛyasaraa weku lɛ mlibii ni nɔ enyɔ amɛhiŋmɛiaŋ lɛ koni amɛkɛ gbohiiashitee he hiɛnɔkamɔ lɛ ashɛje amɛmii ni amɛye amɛbua amɛ yɛ gbɛ fɛɛ gbɛ ni amɛaanyɛ nɔ yɛ be mli ni gbonyo lɛ yɔɔ shia lolo lɛ aloo yɛ be mli ni afu lɛ sɛɛ.—Jaj. 7:2.
Wiemɔ Ni Ji “Kpe-Shii” Lɛ Kɛ Nitsumɔ
4 Eji nɔ ko ni afɔɔ feemɔ yɛ maŋ nɛɛ mli hei babaoo akɛ asaa mɔ ni egbo lɛ afɔɔ shi gbɛkɛ ni afuɔ lɛ enɔ jetsɛremɔ. Kɛ afee nakai lɛ, nanemɛi kɛ mɛi krokomɛi ni le lɛ lɛ naa hegbɛ ni amɛyaa mɛi ni agbo yɛ amɛnɔ lɛ aŋɔɔ ni amɛyaŋaa amɛ. Asafoi komɛi toɔ Ŋmalɛ mli wiemɔ he gbɛjianɔ koni amɛkɛshɛje weku ni nɔ enyɔ amɛhiŋmɛiaŋ lɛ amii ni amɛtsɔɔ nɔ amɛkɛ mɛi ni ebabua amɛhe naa lɛ wieɔ gbohiiashitee he hiɛnɔkamɔ lɛ.
5 Eyɛ mli akɛ tɔmɔ ko bɛ ya ni aaaya henaabuamɔ ni tamɔ nɛkɛ shishi yɛ be mli ni asaa gbonyo lɛ afɔ shi lɛ he moŋ, shi wɔsumɔŋ ni wɔkɛ wiemɔ ni ji “kpeshii” lɛ atsu nii kɛkɛ tamɔ nɔ ni wɔhemɔkɛyeli tamɔ jeŋbii ni ‘shiɔ kpe’ amɛhaa gbohii lɛ anɔ lɛ nɔŋŋ. Ebaahi jogbaŋŋ akɛ wɔɔkɛɛ akɛ wɔmiiya “yara nɔ,” moŋ fe ni wɔɔkɛɛ akɛ wɔmiiya “kpe-shii.” Ni yɛ wiemɔ “Abaashi kpe yɛ . . .,” lɛ gbɛfaŋ lɛ, ebaahi akɛ wɔɔkɛɛ: “Abaasaa gbonyo lɛ afɔ . . . ”
Woji Ni Aŋmalaa Yɛ Mɛi Ni Egboi Ahe
6 Ni nɔ ko hu ni afɔɔ feemɔ ni ji woji ni aŋmalaa ayahaa asafoi ni akɛtswaa amɛ adafi akɛ asafo lɛ mli mɔ ko egbo lɛ hu? Enɛ he ehiaaa. Akɛ nɔkwɛmɔ nɔ lɛ, kɛji asafo ko edaaa, ni no hewɔ lɛ ebɛ mɛi ni he esa ni baanyɛ amɛtsu hiamɔ nii titrii komɛi ahe nii, ni amɛmiitao amɛbi yelikɛbuamɔ kɛjɛ asafo ko ni bɛŋkɛ amɛ lɛ mli lɛ, no lɛ esa akɛ ashi aha amɛ ni amɛto he gbɛjianɔ. Shi eka shi faŋŋ akɛ ehe ehiaaa ni aŋmala woji aloo ni atsu mɛi kɛya asafoi babaoo amli ni aje gbɛ akɛtswa amɛ adafi. Bei babaoo lɛ, gbele lɛ diɛŋtsɛ he adafitswaa gbɛɔ eshwaa oyayaayai.
7 Le ni wɔle anɔkwale ni kɔɔ shihilɛ diɛŋtsɛ ni gbohii lɛ yɔɔ mli lɛ he lɛ eha wɔye wɔhe kɛjɛ apasa jamɔ mli nifeemɔi ahe. (Yoh. 8:32) Wɔhiɛ sɔɔ nilee ni wɔna yɛ Nyɔŋmɔ Wiemɔ lɛ mli lɛ waa, no hewɔ lɛ esa akɛ wɔbɔ mɔdɛŋ be fɛɛ be ni wɔha anɔkwale lɛ mli atse keŋkeŋ ni wɔkɛ nɔ ko kwraa akafutu mli.