Nyɛjea kpeei Ashishi Ni Nyɛkpaa Yɛ Be Naa Pɛpɛɛpɛ
1 Esa akɛ aje asafoŋ kpeei fɛɛ, kɛ kpeei kɛha shiɛmɔyaa lɛ hu shishi yɛ be naa ni akpa yɛ be naa hu. Mɛni hewɔ? Ni aaaye be nɔ pɛpɛɛpɛ lɛ tsɔɔ gbɛjianɔtoo kpakpa kɛ bɔ ni asusuɔ mɛi fɛɛ ni baa ni amɛkɛ amɛhe woɔ mli lɛ hu ahe jogbaŋŋ. (Jaj. 3:17b; 1 Kor. 14:33) Wɔbaanyɛ wɔtsɔɔ bɔ ni wɔsusuɔ mɛi krokomɛi ahe lɛ kɛtsɔ gbɛtsɔɔmɔi ni nyiɛ sɛɛ nɛɛ ni baaye abua wɔ ni wɔje kpeei ashishi ni wɔkpa yɛ be naa hu lɛ kɛ nitsumɔ nɔ. (Shi kɛlɛ, wɔle akɛ yɛ asafoi komɛi agbɛfaŋ lɛ, kɛ ajie naatsii ni yɔɔ amrɔ nɛɛ, ebaaha amɛnyɛ amɛnyiɛ gbɛtsɔɔmɔi ni atsɔɔ nɛɛ asɛɛ jogbaŋŋ.)
2 Esa akɛ wɔbɔ mɔdɛŋ ni wɔshɛ kpee lɛ shishi mra be fɛɛ be bɔni afee ni wɔnyɛ wɔsara mɛi krokomɛi, ni wɔtsu nibii ni he hiaa lɛ ahe nii, ni wɔna Lala kɛ sɔlemɔ ni akɛjeɔ shishilɛ mli gbɛfaŋnɔ. Bei pii lɛ, ahaa minitii enumɔ kɛha lala kɛ sɔlemɔ. Esa akɛ mɛi ni damɔɔ asafo lɛ najiaŋ yɛ sɔlemɔ mli lɛ ahiɛ ahi amɛhe nɔ yɛ yiŋtoo ni yɔɔ kpee lɛ sɛɛ lɛ he koni amɛha eje kpo yɛ amɛwiemɔi amli yɛ shishijee kɛ naagbee sɔlemɔi lɛ amli. Ehe ehiaaa ni sɔlemɔi nɛɛ asɛɛ kɛlɛɔ.
3 Maŋshiɛmɔ: Ato maŋshiɛmɔi lɛ ahe gbɛjianɔ ni akɛ minitii 45 aha. Kɛ aye be kɛteke nɔ lɛ, ebaasa Buu-Mɔɔ Nikasemɔi ni baanyiɛ sɛɛ lɛ he. Esa akɛ kpeei enyɔ lɛ fɛɛ, ni lalai kɛ sɔlemɔi fata he lɛ, aba naagbee yɛ ŋmɛlɛtswai enyɔ mli. Esa akɛ nyɛmimɛi ni haa maŋshiɛmɔ lɛ aye be ni atsɔɔ yɛ Asafo maŋshiɛmɔ he woji lɛ anɔ lɛ nɔ pɛpɛɛpɛ ni amɛkɛ saji krokomɛi tamɔ ŋamɔi akafata wiemɔ lɛ he. Kɛji mɔ ni baaha maŋshiɛmɔ lɛ leee he ni Maŋtsɛyeli Asa lɛ yɔɔ lɛ jogbaŋŋ lɛ, no lɛ esa akɛ ebi asafo ni eyaaha maŋshiɛmɔ lɛ yɛ mli lɛ ni amɛtsɔɔ lɛ he ni eyɔɔ kɛ be ni ebaahe kɛyashɛ jɛmɛ.
4 “Buu-Mɔɔ” Nikasemɔ: Ato ŋmɛlɛɔ tswaa kome aha Buu-Mɔɔ Nikasemɔ lɛ, ni esa akɛ akane kukuji lɛ fɛɛ ni asusu sanebimɔi ni akɛtiɔ mli lɛ fɛɛ ahe. Esa akɛ nikasemɔ nɔkwɛlɔ lɛ hiɛkpamɔ wiemɔ kuku, ni yɔɔ tɛɛ hu lɛ atee miishɛɛ shi ni eha mɛi fɛɛ kɛ amɛhe awo nikasemɔ lɛ mli. Esa akɛ ewiemɔi kɛ otii ni ekadi yɛ nikasemɔ lɛ mli lɛ afee kuku. Kɛ ejara nikasemɔ lɛ mli ewo be lɛ mli jogbaŋŋ lɛ, ebaaye ebua nɔkwɛlɔ lɛ ni ekaye be fe nine yɛ nikasemɔ lɛ klɛŋklɛŋ fa lɛ mli ni sɛɛ mli lɛ eye ehe oyai yɛ naagbee fa lɛ mli.
5 Teokrase Sɔɔmɔ Skul: Eji kpee ni akɛ minitii 45 feɔ. Eyɛ mli akɛ kɛji tsɔsemɔ wiemɔ lɛ kɛ Biblia kanemɔ lɛ mli otii ni asusuɔ he lɛ miihe be ni fe nine lɛ, ahaŋ amɛkpa wiemɔ moŋ, shi esa akɛ nyɛmimɛi ni tsuɔ fai nɛɛ ahe nii lɛ aye be lɛ nɔ pɛpɛɛpɛ. Kɛji mɔ lɛ efeee nakai lɛ, no lɛ esa akɛ awo lɛ ŋaa yɛ teemɔŋ. Agbɛnɛ hu, esa akɛ ŋaawoo kɛ wiemɔi ni skul nɔkwɛlɔ lɛ kɛbaaha lɛ ahi be ni ato lɛ mli pɛpɛɛpɛ. Kɛji nyɛmimɛi ni yɔɔ gbɛfaŋnɔ yɛ skul lɛ mli lɛ hu tara he ni bɛŋkɛ wiemɔ kpoku lɛ ni amɛteŋ mɔ fɛɛ mɔ gbe ewiemɔ naa yɛ be ni ato lɛ mli pɛpɛɛpɛ lɛ, ebaaha aye be lɛ nɔ.—Kwɛmɔ Theocratic Ministry School Schedule 1991.
6 Sɔɔmɔ kpee: Kpee ni akɛ minitii 45 hu feɔ nɛ. Kɛ efata Teokrase Sɔɔmɔ Skul lɛ kɛ lalai kɛ sɔlemɔi lɛ ahe lɛ, esaaa akɛ gbɛjianɔtoi enyɔ lɛ fɛɛ sɛɛ tsɛɔ fe ŋmɛlɛtswaa kome kɛ minitii nyɔŋmai-ejwɛ kɛ enumɔ. Esa akɛ nyɛmimɛi hii ni yɔɔ gbɛfaŋnɔ yɛ Sɔɔmɔ kpee lɛ mli lɛ aye amɛbe nɔ pɛpɛɛpɛ. Esa akɛ akɛ hiɛkpamɔ wiemɔ kuku aje fai ni atsuɔ he nii kɛtsɔ sanebimɔi kɛ hetooi anɔ lɛ shishi. Ehe ehiaaa ni akɛ saji babaoo afata hiɛkpamɔ wiemɔ lɛ he. Esa akɛ ati nɔkwɛmɔ nii lɛ amli jogbaŋŋ, ni esa akɛ mɛi ni baafee amɛtsɔɔ lɛ hu afee klalo ni amɛtara hei ni sa bɔni afee ni amɛnyɛ amɛkɛ be ni ato kɛha nakai fa lɛ atsu nii jogbaŋŋ kɛmɔ shi.
7 Asafo Woloŋ Nikasemɔ: Kpee ni akɛ ŋmɛlɛtswaa kome feɔ nɛ, ni shishijee kɛ naagbee sɔlemɔi fata he. Esa akɛ akane kukuji lɛ fɛɛ mli. Bɔni afee ni anyɛ akpa kpee lɛ yɛ be naa lɛ, nikasemɔ nɔkwɛlɔ lɛ baajara nikasemɔ lɛ ewo be lɛ mli koni ekaba akɛ abaaye ehe oyai yɛ nikasemɔ lɛ naagbee gbɛ aloo abaagbe nikasemɔ lɛ naa mra tsɔ. Esa akɛ nɔkwɛlɔ lɛ kɛ sɛɛyoomɔ atsu nii yɛ bei abɔ ni abaaye yɛ kuku fɛɛ kuku he susumɔ mli lɛ he. Esa akɛ anu emli otii titrii lɛ ashishi jogbaŋŋ. Bɔ ni nɔkwɛlɔ lɛ nyɛɔ etsɔɔ nii jogbaŋŋ ehaa lɛ baaye ebua lɛ yɛ enɛ gbɛfaŋ.—Tito 1:9.
8 Kpeei Kɛha Shiɛmɔyaa: Esaaa akɛ esɛɛ tsɛɔ fe minitii 15, ni shikpɔŋkuku mli nitsumɔ jaramɔ kɛ naagbee sɔlemɔ fɛɛ fata he. Mɛi ni baaya shiɛmɔ lɛ baasumɔ ni amɛje amɛ shiɛmɔ lɛ shishi amrɔ nɔŋŋ kɛ ebaahi. Nɔkwɛlɔ lɛ baaje kpee lɛ shishi yɛ be naa, ni emɛŋ kɛyashi mɛi babaoo aaaba da. Agbɛnɛ hu, kɛ aja shikpɔŋkuku lɛ mli nitsumɔ agbe naa ni akɛ sɔlemɔ kpa kpee lɛ, ebaaha kuu lɛ ashi oya kɛya shiɛmɔ. Enɛ he miihia waa titri kɛha gbɛgbalɔi ni baaba kpee lɛ.
9 Wɔ fɛɛ wɔbaanyɛ wɔna kpeei ni jeɔ shishi yɛ be naa ni akpaa yɛ be naa pɛpɛɛpɛ lɛ he sɛɛ jogbaŋŋ. Ni nyɛmimɛi ni amɛhefatalɔi jeee heyelilɔi, ni amɛ kpaa amɛ gbɛ ni amɛhi shia yɛ bei pɔtɛɛ komɛi amli lɛ ahiɛ sɔɔ enɛ waa. Kɛji mɛi ni yɔɔ shiai ni mli egbala lɛ amli lɛ miito tsɔne he gbɛjianɔ kɛha kpeeiyaa kɛ sɛɛkuu kɛ shiayaa, aloo amɛmiitsɔɔ be ni amɛbaaku sɛɛ amɛshɛ shia lɛ, ebaahi jogbaŋŋ akɛ amɛaasusu be ni he baahia amɛ kɛha amɛkɛ nyɛmimɛi asanegbaa, woji ahemɔ, kɛ nibii krokomɛi afeemɔ dani kpee lɛ baaje shishi kɛ be mli ni akpa sɛɛ lɛ he jogbaŋŋ. Ŋwanejee ko bɛ he akɛ, kɛ aje kpee lɛ shishi ni akpa yɛ be naa pɛpɛɛpɛ lɛ, eyeɔ ebuaa ni anyɛɔ afeɔ nibii fɛɛ “bɔ ni yɔɔ fɛo kɛ gbɛnaa gbɛnaa.”—1 Kor. 14:40.