Sanebimɔ He

● Akɛni wɔmiitao ni wɔkɛ wɔwoji lɛ atsu nii yɛ nilee mli hewɔ lɛ, mɛɛ tsakemɔi komɛi wɔbaasumɔ ni wɔfee yɛ be mli ni wɔkɛ woji haa yɛ gbɛjegbɛ nɔ odaseyeli mli lɛ?

Beni wɔkɛ wolo nɛɛ yaa ni akala lɛ, no mli lɛ naatsii lɛ yɛ lolo, ni tsɔɔ akɛ wɔnyɛŋ wɔtsu gbɛjegbɛ nɔ odaseyeli he nii yɛ hei babaoo. Shi wɔbaanyɛ wɔkadi otii ni nyiɛ sɛɛ lɛ jogbaŋŋ koni kɛ ajie naatsii lɛ, ni wɔkɛtsu nii kɛmɔ shi.

Yɛ be mli ni wɔtsuɔ gbɛjegbɛ nɔ odaseyeli lɛ, esa jogbaŋŋ akɛ wɔɔbɛŋkɛ gbɔmɛi lɛ kɛ woji tɛtrɛbii loo woji krokomɛi lɛ beni wɔhiɛ yɛ wɔdɛŋ. Esa akɛ oti ni ma wɔhiɛ lɛ afee akɛ Wɔmiibɔ mɔdɛŋ ni wɔkɛ gbɔmɛi lɛ aje sanegbaa shishi. Yɛ nakai gbɛ nɔ lɛ, wɔbaanyɛ wɔna kɛji mɔ ni wɔbɛŋkɛɔ lɛ lɛ yɛ he miishɛɛ bɔ ni sa ni aaaha wɔnyɛ wɔbi lɛ he ni eyɔɔ koni wɔnyɛ wɔya eŋɔɔ. Kɛji hegbɛ yɛ ni nyɛkɛ aasusu woji tɛtrɛbii lɛ eko mli sane kome ko he lɛ. no lɛ ebaahi jogbaŋŋ diɛŋtsɛ. Yɛ shihilɛi komɛi amli lɛ, ebaabi ni shiɛlɔ lɛ kɛ mɔ lɛ anyiɛ kɛya fioo beni amɛgbaa nibii ni yɔɔ woji tɛtrɛbii lɛ amli kɛ amɛhe sɛɛnamɔi ahe sane lɛ.

Shi kɛlɛ, esa akɛ wɔna sɛɛyoomɔ ni wɔsusu amɛhe hu. Ekolɛ mɛi ni wɔkɛkpeɔ yɛ gbɛjegbɛi anɔ lɛ ateŋ mɛi pii miiye oyai waa akɛ ebaawa eha wɔ akɛ wɔɔna kɛji amɛyɛ wiemɔ lɛ he miishɛɛ. Yɛ shihilɛi ni tamɔ nɛkɛ mli lɛ, ebaahi jogbaŋŋ moŋ akɛ wɔɔha amɛ dɛhiɛmɔ woji kɛkɛ koni be kroko ni amɛkɛ wɔ aaakpe lɛ, eha amɛna wɔwoji lɛ babaoo ahe miishɛɛ, aloo kɛ jeee nakai lɛ, wɔkɛ woji tɛtrɛbii lɛ atsɔɔ amɛ kuku kɛkɛ.

Kɛ wɔtee nɔ wɔtsu gbɛjegbɛ nɔ nitsumɔ lɛ yɛ hei pɔtɛɛ kɛ bei pɔtɛɛ komɛi amli lɛ, ebaaha gbɔmɛi lɛ ale wɔ jogbaŋŋ ni ebaaha amɛna he miishɛɛ akɛ amɛkɛ wɔ aaagba nibii ahe sane kɛ amɛna hegbɛ, ni kɛtsɔ no nɔ lɛ amɛhaa wɔ be babaoo ni wɔkɛnaa miishɛɛ ni amɛyɔɔ yɛ wiemɔ lɛ he.

Wɔmiitao wɔna mɛi babaoo bɔ ni wɔɔnyɛ ni amɛkane wɔwoji lɛ. No hewɔ lɛ, esa akɛ wɔbɔ mɔdɛŋ ni wɔhala be ni sa ni wɔkɛ woji lɛ aaaha. Nakai feemɔ baaha wɔnyɛ wɔto gbɛjianɔ ni wɔyadi mɛi ni yɔɔ wiemɔ lɛ he miishɛɛ lɛ asɛɛ.