Jiemɔ Nyɔŋmɔ Gbɛi Lɛ Yi Kɛmɔ Shi
1 Kwɛ bɔ ni wɔmli filiɔ wɔ yɛ Yehowa jɔɔmɔi babaoo lɛ hewɔ! Wɔna shiɛmɔ nitsumɔ ni yaa hiɛ woɔ mɔ hewalɛ yɛ Ghana yɛ sɔɔmɔ afi ni ba naagbee yɛ nyɛsɛɛ nɛɛ nɔŋŋ lɛ mli, yɛ naagbai ni wɔkɛkpeɔ lɛ fɛɛ sɛɛ. Mɛi 78,535 ni ba Kaimɔ lɛ shishi lɛ hu hi jogbaŋŋ. Wɔ fɛɛ wɔna mumɔŋ niyenii babaoo ni akɛha yɛ wɔ kpokpaa nɔ kpeei lɛ kɛ gbi kome kpee krɛdɛɛ ni ŋɔɔ lɛ shishi lɛ he sɛɛ. Wɔnine eshɛ jɔɔmɔi krokomɛi babaoo hu nɔ.
2 Mɛɛ gbɛ nɔ wɔɔtsɔ wɔjie hiɛsɔɔ kpo yɛ nibii fɛɛ ni Yehowa feɔ kɛhaa wɔ lɛ he? Wɔbaanyɛ wɔfee enɛ kɛtsɔ Nyɔŋmɔ gbɛi lɛ ni wɔɔjie yi kɛmɔ shi lɛ nɔ?—Lala 115:21.
Yaa Nɔ Ojie Yehowa Gbɛi lɛ Yi
3 Mɛɛ gbɛ nɔ wɔɔtsɔ wɔjie Yehowa gbɛi lɛ yi kɛmɔ shi yɛ September mli? Wɔbaaya nɔ ni wɔkɛ brochure sɔrɔtoi ni tamɔ woji tɛtrɛbii lɛ aha. Kɛ wɔsaa wɔhe jogbaŋŋ ni wɔhiɛ nɛkɛ brochure nɛɛ sɔrɔtoi abɔ yɛ sɔɔmɔ nitsumɔ lɛ mli lɛ, wɔbaafee mɛi ni wɔwula wɔhe kɛha Yehowa yijiemɔ ni wɔbaanyɛ wɔye wɔbua mɛi krokomɛi ni amɛkase bɔ ni amɛ hu amɛaanyɛ amɛjie eyi.
4 Saneyitso Kɛha Sanegbaa lɛ ji “Jeŋ Hee Ko—Kɛtsɔ Namɔ Nɔ?” Wɔbaanyɛ wɔdamɔ saji ni yɔɔ Reasoning wolo lɛ baafai 9-15 lɛ nɔ wɔkɛ hiɛkpamɔ wiemɔ ni sa asaa wɔhe. Shiatsɛmɛi komɛi kɛ bo baasusu nɔ ni je lɛŋ hiɛnyiɛlɔi lɛ kɛɔ yɛ ŋmɛnɛŋmɛnɛ beaŋ hiɛnɔkamɔi kɛha je lɛ ni aaafee lɛ ekpakpa lɛ he amrɔ nɔŋŋ. Eyɛ mli akɛ mɛi pii miishwe toiŋjɔlɛ shihilɛi moŋ, shi Yeremia 10:23 tsɔɔ akɛ gbɔmɔ nyɛŋ ana lɛ diɛŋtsɛ enaagbai anaa tsabaa. Eji miishɛɛ sane akɛ wɔɔle akɛ Nyɔŋmɔ shiwoo akɛ eeefee ŋmɛnɛŋmɛnɛ jeŋ shihilɛi lɛ ahe nɔ ko lɛ efeŋ efolo. Anaa nɛkɛ shiwoo nɛɛ yɛ 2 Petro 3:13. Kɛji akɛ shiatsɛ lɛ tamɔ mɔ ni yɔɔ wiemɔ lɛ he miishɛɛ lɛlɛŋ lɛ, no lɛ obaanyɛ okɛ brochure ni sa lɛ aha lɛ.
Saamɔ ohe Jogbaŋŋ
5 Kɛ wɔɔnyɛ wɔtsɔɔ mɛi krokomɛi anii ni emɔ shi lɛ, belɛ hesaamɔ he miihia. Mɛni hewɔ okɛ weku lɛ mlibii lɛ ateŋ mɔ ko efeee nɛkɛ hesaamɔ nɛɛ, aloo mɔ ni tsɔɔ bo anɔkwale lɛ, aloo mɔ ko ni okɛ lɛ yɔɔ akutsoŋ nikasemɔ kuu kome mli? Kɛ nyɛtĩ nyɛ hesaamɔ lɛ mli shii abɔ nyɛkwɛ lɛ, eeeha ona hekɛnɔfɔɔ babaoo ni eeeha okɛ nɔmimaa awie atsɔɔ gbɔmɛi ni yɔɔ shikpɔŋkuku lɛ mli lɛ.
6 Esa akɛ wɔwiemɔi lɛ ajie miishɛɛ ni wɔyɔɔ yɛ gbɔmɛi lɛ ahe lɛ kpo. Mɛɛ Biblia mli shiwoo ni kɔɔ jeŋ hee ni kɛ hiɛnɔkamɔ baaha mɛi ni ehao ni amɛnijiaŋ eje wui lɛ he lɛ nɔ mi. Kɛ shiatsɛ lɛ he brochure lɛ no lɛ obaanyɛ ofee wɔ Biblia kasemɔ he gbɛjianɔtoo lɛ he nɔkwɛmɔ nɔ otsɔɔ lɛ. Aloo ekolɛ obaato oyiŋ akɛ ebaahi jogbaŋŋ akɛ ooofee nakai yɛ osɛɛsaramɔ lɛ mli.
7 Mɛɛ jɔɔmɔi eji nɛkɛ akɛ wɔɔfee mɛi ni nine shɛɔ Yehowa dɛŋ jɔɔmɔi babaoo nɔ yɛ be mli ni wɔjeɔ sɔɔmɔ afi hee lɛ shishi lɛ! Eba akɛ wɔfɛɛ wɔkɛ be ni eshwɛ kɛha gbɛjianɔtoo nɛɛ aatsu nii ni wɔkɛjie Yehowa gbɛi lɛ yi kɛmɔ shi yɛ be mli ni wɔkɛ hehiamɔ kwɛɔ gbɛ akɛ wɔɔsɔmɔ Yehowa kɛya naanɔ yɛ ejeŋ hee lɛ mli lɛ.