Asafo Woloŋ Nikasemɔ he Gbɛjianɔtoo
Fa 2—Bɔ ni Ehe Hiaa akɛ Asaa He ni Akɛ He Awo Mli
1 Yehowa Wiemɔ lɛ kɛɔ akɛ miishɛɛ ji gbɔmɔ ni naa nilee kɛ sɛɛyoomɔ lɛ, ejaakɛ emli nyɔmɔwoo fa naakpa. (Abɛi 3:13, 14, 16-18) Mumɔŋ nilee jara wa ni ehereɔ mɔ yiwala. Ehaa Kristofonyo lɛ kɛ nilee ni enaa kɛjɛɔ Nyɔŋmɔ Wiemɔ lɛ mli lɛ tsuɔ nii jogbaŋŋ kɛ sɔɔmɔ ni ekaa yɔɔ mli, ni ekɛtsuɔ daa gbi shihilɛ mli naagbai ahe nii, ni ekɛkpɛɔ eyiŋ yɛ otii ni mamɔ ehiɛ yɛ shihilɛ mli lɛ ahe.
2 Ato Asafo Woloŋ Nikasemɔ lɛ he gbɛjianɔ koni eye ebua wɔ ni wɔkase Nyɔŋmɔ Wiemɔ lɛ ni wɔkɛtsu nii ni wɔdara yɛ mumɔŋ nilee kɛ shishinamɔ fɛɛ mli. No hewɔ lɛ esa akɛ Asafo Woloŋ Nikasemɔ lɛ ni wɔɔya daa lɛ afee gbɛjianɔ ni wɔ diɛŋtsɛ wɔto kɛha nilee hamɔ lɛ fa.—Abɛi 6:7-9.
Saamɔ Ohe Jogbaŋŋ
3 Mɛi ni kɛ amɛhe bɔ klɛŋklɛŋ afii oha lɛ mli asafo lɛ he lɛ ateŋ mɛi komɛi miaaa amɛhiɛ akɛ amɛaakase anɔkwale lɛ ni amɛkɛ la ni kpɛɔ kɛyaa hiɛ lɛ anyiɛ. Amɛhi shi akɛ fufɔobii yɛ Kristo mli, no hewɔ lɛ amɛleee jalɛ wiemɔ lɛ. (Heb. 5:11-13) Bɔfo Paulo wo asafo lɛ hewalɛ ni “amɛfoŋ kɛya dalɛ mli.” (Heb. 6:1) Eka shi faŋŋ akɛ, enɛ biɔ babaoo fe ni aaabo anɔkwale lɛ ni mɛi krokomɛi miiwie he lɛ toi kɛkɛ. Ebiɔ nibii ahe susumɔ kɛ nibii amlipɛimɔ koni ‘akɛtsiɛ wɔjwɛŋmɔŋ nyɛmɔ hiɛ,’ ni esa akɛ wɔmia wɔhiɛ waa.—2 Pet. 3:1, 2; Luka 13:24, NW.
4 Hesaamɔ jogbaŋŋ kɛha Asafo Woloŋ Nikasemɔ lɛ haa wɔshishinumɔ yaa hiɛ ni ehaa hiɛsɔɔ ni wɔyɔɔ kɛha nɔ ni wɔkaseɔ lɛ yaa hiɛ. Shi hesaamɔ ni mɔɔ shi biɔ babaoo fe kukuji lɛ akanemɔ kɛ sanebimɔi lɛ ahetooi lɛ ashishi-folɔmɔ kɛ oyaiyeli kɛkɛ. Be he miihia koni wɔnu nikasemɔ lɛ shishi kɛtsɔ eshishinumɔ lɛ kɛ sɛɛnamɔ ni eji kɛha wɔ diɛŋtsɛ lɛ nɔjwɛŋmɔ. Kanemɔ Ŋmalɛi ni atsɛ shi aŋmaaa lɛ ni osusu bɔ ni amɛkɔɔ saji otii ni yɔɔ kuku lɛ mli lɛ ahe amɛhaa lɛ he. Taomɔ wiemɔi ni onuuu shishi lɛ ashishinumɔ.
5 Teemɔŋ nikasemɔ baanyɛ afee nitsumɔ ni wa aha wɔteŋ mɛi komɛi, ni eheɔ be, shi kwɛ sɛɛnamɔ ni yɔɔ he! Paulo tsɔɔ nɔ ni jɛɔ nikasemɔ babaoo ni tamɔ nɛkɛ mli baa lɛ, akɛ: “Shi mɛi ni edara lɛ anɔ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” (Heb. 5:14) Teemɔŋ nikasemɔ ni tamɔ nɛkɛ yeɔ ebuaa wɔ ni wɔdaraa yɛ mumɔŋ, koni wɔnyɛ wɔle nɔ ni ji gbɛ ni ja kɛ ebi ni wɔkpɛ wɔyiŋ.
Na Mli Gbɛfaŋnɔ
6 Esa akɛ wɔbɔ mɔdɛŋ ni wɔna gbɛfaŋnɔ yɛ kpee fɛɛ kpee mli. Mɛni hewɔ? Jeee akɛ wɔwiemɔi ni wɔsaa lɛ jogbaŋŋ lɛ ji wɔhemɔkɛyeli jajemɔ kɛkɛ, shi moŋ amɛwoɔ wɔnyɛmimɛi lɛ hewalɛ ni etswaa amɛ emaa shi hu. (Rom. 10:10; Heb. 10:23-25) Asafo Woloŋ Nikasemɔ ni wɔɔna mli gbɛfaŋnɔ babaoo lɛ hu tsuɔ gbɛfaŋnɔ ko ni he hiaa he nii yɛ wɔmumɔŋ nɔyaa lɛ mli. Kɛji akɛ mɛi ni he esa, gbekɛbii kɛ mɛi heei lɛ fɛɛ haa saji ahetoo lɛ, ehaa kuu lɛ naa wiemɔi loo hetooi sɔrɔtoi ni sɛɛnamɔ yɔɔ he lɛ amli ŋɔɔmɔ. Enɛ tsɔseɔ wɔ fɛɛ ni ehaa wɔnaa miishɛɛ.—kmGA 7/86 bf. 5.
7 Kɛ wɔkɛ hiɛdɔɔ saa wɔhe kɛhaa Asafo Woloŋ Nikasemɔ lɛ, ni wɔyaa daa, ni wɔnaa nikasemɔ lɛ mli gbɛfaŋnɔ lɛ, wɔbaaye omanye yɛ nilee ni wɔtaoɔ lɛ mli ni ‘wɔɔna Nyɔŋmɔ he nilee.’—Abɛi 2:4, 5.