Nyɔŋmɔ Suɔmɔnaa Nii Ni Wɔɔtsu He Nii Waa
1 Nitsumɔ ni wa ni akɛ yiŋtoo kpakpa tsuɔ ni nɔ ni ataoɔ lɛ jɛɔ mli baa lɛ haa mɔ tsui nyɔɔ emli. (Jaj. 3:13) Mɛɛ nitsumɔ ni atsuɔ ŋmɛnɛ baaha ana miishɛɛ ni da fe fɛɛ bianɛ kɛyabote wɔsɛɛ be ni bɛ naagbee lɛ mli? Hetoo kome pɛ yɔɔ—Nyɔŋmɔ suɔmɔnaa nifeemɔ. Abaatsɔ wiemɔi, nɔkwɛmɔ nii, kɛ niiashikpamɔi anɔ atsɔɔ enɛ mli fitsofitso yɛ wɔ gbi kome kpee krɛdɛɛ kɛha 1992 sɔɔmɔ afi lɛ mli. Gbɛjianɔtoo lɛ yitso ji “Nyɔŋmɔ Suɔmɔnaa Nii ni Wɔɔtsu He Nii Waa.”—Efes. 6:6; 1 Tim. 4:10.
2 Ŋmɛnɛ, mɛi pii atsui enyɔɔɔ amɛmli ni amɛnijiaŋ eje wui yɛ shihilɛ ni amɛyɔɔ mli lɛ hewɔ, ejaakɛ nii ni amɛnaaa he miishɛɛ lɛ moŋ amɛtsuɔ. Nɔ ni tamɔɔɔ nakai lɛ, Yehowa suɔmɔnaa nii ni wɔleɔ ni wɔkɛkaseɔ Kristo lɛ haa yiŋtoo kpakpa baa wɔshihilɛ mli ni ehaa wɔnyɛɔ wɔtsuɔ wɔheloo naa nii po kɛ jwɛŋmɔ kpakpa. Mɛni yɔɔ Nyɔŋmɔ suɔmɔnaa nii ni wɔtsuɔ he nii waa lɛ mli? Mɛni ji nibii komɛi ni esa akɛ wɔkwɛ wɔhe nɔ jogbaŋŋ yɛ he koni wɔya nɔ wɔhi shi kɛba Nyɔŋmɔ suɔmɔnaa nifeemɔ? Te gbɛtsɔɔmɔ kɛ ŋaawoo ni Yehowa asafo lɛ kɛhaa yɛ shiɛmɔ kɛ nitsɔɔmɔ nitsumɔ lɛ he lɛ sɛɛnyiɛmɔ he hiaa ha tɛŋŋ? Mɛɛ hegbɛi ni ekaaa yɔɔ kɛhaa obalaŋtai ni jwɛŋɔ Nyɔŋmɔ suɔmɔnaa nifeemɔ nɔ lɛ?
3 Wiemɔi ahe gbɛjianɔtoo lɛ baaha nɛkɛ sanebimɔi nɛɛ ahetoo yɛ gbɛ ni haa mɔ tsui nyɔɔ emli nɔ, ni nɔ ni fata he ji wiemɔi titrii enyɔ nɛɛ, “Ani Nyɔŋmɔ Suɔmɔnaa Nifeemɔ Yeɔ Oshihilɛ Nɔ?” kɛ “Yiŋtoo ni Yɔɔ Wɔshihilɛ Mli—Ni Wɔfee Nyɔŋmɔ Suɔmɔnaa Nii.” Too gbɛjianɔ bianɛ ni ohi jɛmɛ ni ona gbɛjianɔtoo krɛdɛɛ nɛɛ mli ŋɔɔmɔ kɛmɔ shi.