Asafo Woloŋ Nikasemɔ he Gbɛjianɔtoo
Fa 4—Nyɛyaa nɔ Nyɛtswaa Nyɛhe Nyɛmaa Shi
1 Mɔ fɛɛ mɔ ni yɔɔ Asafo Woloŋ Nikanemɔ kuu lɛ mli lɛ baanyɛ atsu gbɛfaŋnɔ ni he hiaa kɛha mɛi krokomɛi ni yɔɔ kuu lɛ mli lɛ atswaa kɛ shimaa he nii. Wɔ fɛɛ wɔmiisumɔ ni wɔbo Ŋmalɛ naa famɔ ni biɔ ni ‘wɔwowoo wɔhe hewalɛ yɛ suɔmɔ kɛ nitsumɔi kpakpai ahe, titri lɛ akɛni naagbee lɛ bɛŋkɛɔ’ lɛ toi.—Heb. 10:24, 25.
2 Ni Wɔɔye Wɔbua Wɔhe: Mɔ fɛɛ mɔ baanyɛ aye abua ni woloŋ nikasemɔ lɛ aŋɔɔ ni naanyobɔɔ su hu ahi mli. Kɛji wɔteŋ mɔ fɛɛ mɔ na kuu lɛ mlibii krokomɛi lɛ ahe miishɛɛ lɛ, eyeɔ ebuaa ni ehaa kuu lɛ feɔ ekome. Akɛ gbɛtsɔɔmɔ haa wɔ yɛ Galatabii 6:10 akɛ “wɔfee mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” Akɛ nɔkwɛmɔ nɔ lɛ, ani okadiɔ kɛji woloŋ nikasemɔ kuu lɛ mlibii komɛi naaa hewalɛ, ni no hewɔ amɛbaaa kpee lɛ? Ekolɛ obaanyɛ otswa amɛ telifon ni obi amɛ shi aloo obaanyɛ oyasara amɛ. Mumɔ ni tamɔ nɛkɛ ni hiɔ woloŋ nikasemɔ kuu lɛ mli lɛ haa nyɛmimɛi lɛ bɛŋkɛɔ amɛhe kpaakpa.
3 Ani ekaawoo he miihia mɛi komɛi yɛ amɛ daa gbi nɔnyɛɛ, weku mli gbɛnaa nii, loo naagbai krokomɛi ahewɔ? Mɛni obaanyɛ ofee ni okɛye obua? Bɔɔ mɔdɛŋ waa ni okɛ mɛi krokomɛi agba sane yɛ kpeei ashishi. Jeee ŋamɔ folo ni oooŋa amɛ kɛkɛ. Ekolɛ mɛi komɛi yɛ ni amɛhiɛ gboɔ, shi kɛlɛ amɛmiitao mɔ ko ni amɛkɛlɛ agba sane, ni no hewɔ lɛ kɛji obɛŋkɛ amɛ lɛ amɛkɛo aaagba sane. (uw bf. 137-8) Bɔfo Paulo wo Kristofoi hewalɛ ni ‘amɛshɛje mɛi ni tsui faa lɛ amli; amɛhere mɛi ni feɔ gbedee lɛ, ni amɛto amɛtsui shi amɛha mɛi fɛɛ.’ (1 Tes. 5:14) Kɛji mɔ ko bɛ hewalɛ aloo enijiaŋ eje wui lɛ, kwɛ bɔ ni emii shɛɔ ehe ehaa kɛji nanemɛi ba eŋɔɔ amɛbasara lɛ aloo amɛbaye amɛbua lɛ! Bei pii lɛ, ni ooole akɛ mɛi krokomɛi susuɔ ohe lɛ ji nɔ kɛkɛ ni he hiaa.
4 Wɔmiisumɔ ni wɔkɛ gbɛjianɔ ni atoɔ kɛhaa shiɛmɔyaa lɛ hu atsu nii. Esa akɛ wɔbɔ mɔdɛŋ ni wɔkɛ mɛi sɔrɔtoi ni yɔɔ kuu lɛ mli lɛ atsu nii. (2 Kor. 6:11-13; 12:15) Bei komɛi lɛ, ekolɛ woloŋ nikasemɔ nɔkwɛlɔ lɛ baakɛɛ wɔ ni wɔye wɔbua mɔ ko. Te ofeɔ onii yɛ enɛ he ohaa tɛŋŋ? Kɛji shiɛlɔi kɛ gbɛgbalɔi fɛɛ kɛ amɛhe tsu nii yɛ shiɛmɔ kɛ kaselɔ-feemɔ nitsumɔ lɛ fai sɔrɔtoi lɛ fɛɛ mli lɛ, ewoɔ woloŋ nikasemɔ kuu lɛ hewalɛ babaoo.
5 Nɔkwɛmɔ nɔ ni Wɔ Diɛŋtsɛ Wɔɔfee: Gbɛi krokomɛi hu yɛ ni ooonyɛ otsɔ nɔ oye obua woloŋ nikasemɔ gbɛjianɔtoo lɛ. Nɔkwɛmɔ nɔ kpakpa ni ooofee lɛ he miihia. Akɛ nɔkwɛmɔ nɔ lɛ, kɛji afeɔ kpeei lɛ yɛ nyɛmi ko shia, ni osaa ohe kɛyaa tamɔ bɔ ni osaa ohe kɛyaa Maŋtsɛyeli Asa lɛ nɔ lɛ, no tsɔɔ bulɛ ni oyɔɔ. Ofeɔ nɔkwɛmɔ nɔ kpakpa ohaa mɛi krokomɛi ni sumɔɔ ni amɛsaa amɛhe jabejabe lɛ. Ani eji nɔ ni ofɔɔ feemɔ akɛ obaashɛ jɛmɛ yɛ be naa bɔni afee ni okagba kpee lɛ naa?
6 Asafo Woloŋ Nikasemɔ he gbɛjianɔtoo lɛ ji gbɛjianɔtoo ko ni suɔmɔ yɔɔ mli ni jɛ Yehowa ŋɔɔ ni ehe hiaa ni wɔfi sɛɛ kɛmɔ shi. (Yes. 40:11) Eji he ko ni wɔnaa yelikɛbuamɔ ni he hiaa wɔ aŋkroaŋkro lɛ kɛjɛɔ, ni wɔyeɔ wɔbuaa kɛhaa mɛi krokomɛi amumɔŋ hejɔɔmɔ hu. Nyɛhaa wɔ fɛɛ ‘wɔshɛrɛa wɔtsuii wɔŋmɛa wɔmli, ni mɔ aha enaanyo nane amɔ shi,’ kɛtsɔ nɛkɛ gbɛjianɔtoo nɛɛ ni wɔɔfi sɛɛ kwraa kɛmɔ shi lɛ nɔ.—1 Tes. 5:11.