Wɔ Asafo Woloŋ Nikasemɔ Nɔkwɛlɔ Lɛ Ni Wɔkɛ Lɛ Aaafee Ekome
1 Asafo Woloŋ Nikasemɔ lɛ tsuɔ gbɛfaŋnɔ ni he hiaa waa yɛ wɔnyɛmɔi ni aaaya hiɛ akɛ sanekpakpa lɛ he sɔɔlɔi lɛ mli. Aje gbɛ afee kui lɛ bibii koni eha miishɛɛ shihilɛ ni tamɔ weku nɔ ahi shi kɛha Biblia lɛ kɛ Asafo lɛ woji lɛ eko kasemɔ. Nɛkɛ kui bibii nɛɛ kɛ hegbɛi ni hi jogbaŋŋ haa kɛhaa wɔtsɔsemɔ koni wɔhe asa jogbaŋŋ kɛmɔ shi yɛ shiɛmɔ nitsumɔ lɛ mli. Aŋkroaŋkro hewalɛwoo yɛ, ni anaa deka ahaa aŋkroaŋkroi fɛɛ kɛtsɔ woloŋ nikasemɔ gbɛjianɔtoo lɛ nɔ. Mɛɛ gbɛ nɔ wɔɔtsɔ wɔkɛ nɔkwɛlɔ lɛ afee ekome kɛmɔ shi ni wɔna nɛkɛ gbɛjianɔtoo kpakpa nɛɛ he sɛɛ?
2 Shiɛmɔ nitsumɔ lɛ Mli Gbɛfaŋnɔ Namɔ kɛ Ekaa: Woloŋ nikasemɔ nɔkwɛlɔ lɛ nitsumɔ ni he hiaa fe fɛɛ lɛ ateŋ ekome ji ni eye ebua kuu lɛ mlibii lɛ ateŋ mɔ fɛɛ mɔ ni ena sɔɔmɔ nitsumɔ lɛ mli gbɛfaŋnɔ kɛ ekaa. Yɛ enɛ gbɛfaŋ lɛ, Our Ministry wolo lɛ kaiɔ wɔ yɛ baafa 44 akɛ “bɔ ni anaa lɛ daa, kɛ ekaa kɛ mɔdɛŋbɔɔ ni ejieɔ lɛ kpo yɛ shiɛmɔ nitsumɔ lɛ mli lɛ baaje kpo yɛ shiɛlɔi lɛ hu he.” Bei komɛi lɛ, nɔkwɛlɔ lɛ kɛ lɛ diɛŋtsɛ eweku lɛ mlibii baatsu nii yɛ sɔɔmɔ nitsumɔ lɛ mli, shi ebaana he miishɛɛ hu akɛ eeefata mɛi krokomɛi ahe yɛ sɔɔmɔ nitsumɔ lɛ fai sɔrɔtoi lɛ amli bɔ ni eshihilɛ baaŋmɛ gbɛ. Ani obaanyɛ ofi kpeei kɛha shiɛmɔyaa sɛɛ daa? Nyɛ woloŋ nikasemɔ nɔkwɛlɔ lɛ kɛ shiɛlɔi krokomɛi lɛ ahiɛ baasɔ nakai ni ooofee lɛ waa.
3 Atoɔ kpeei kɛha shiɛmɔyaa he gbɛjianɔ yɛ hei ni hi jogbaŋŋ bɔni afee ni mɔ fɛɛ mɔ ana shiɛmɔ nitsumɔ lɛ mli gbɛfaŋnɔ kɛ ekaa. Eyɛ mli akɛ nyɛbaasusu shihilɛ ni nyɛyɔɔ mli lɛ he moŋ, shi kuu fɛɛ kuu baasumɔ ni eje shiɛmɔ lɛ shishi mra. Shiɛlɔi kɛ gbɛgbalɔi pii eye omanye waa beni amɛtsaa shiɛmɔ nitsumɔ lɛ nɔ kɛyaa hiɛ saŋŋ yɛ be mli ni nyɔŋma kɛ enyɔ etswa momo, yɛ otsii lɛ anaagbee.
4 Ani obaasumɔ ni ona yelikɛbuamɔ yɛ sɔɔmɔ nitsumɔ lɛ fai lɛ eko mli? Ekolɛ nyɛ woloŋ nikasemɔ nɔkwɛlɔ lɛ baanyɛ ato gbɛjianɔ ni shiɛlɔ ko ni he esa yɛ nyɛ kuu lɛ mli aye abua bo. Kɛ nyɔŋ lɛ gbo lɛ, kaimɔ ni okɛ oshiɛmɔyaa he akɔntaabuu lɛ aha yɛ be naa. Woloŋ nikasemɔ nɔkwɛlɔ lɛ kɛ woloŋmalɔ lɛ ahiɛ baasɔ ekome ni okɛ amɛ baafee yɛ enɛ hu mli lɛ waa diɛŋtsɛ.—Okɛto Luka 16:10 he.
5 Kɛ Sɔɔmɔ Nɔkwɛlɔ lɛ Basara Kuu Lɛ: Bei pii lɛ, sɔɔmɔ nɔkwɛlɔ lɛ yasaraa woloŋ nikasemɔ kuu kome daa nyɔŋ nɔ bɔni afee ni ewo amɛ hewalɛ ni amɛna shiɛmɔ nitsumɔ lɛ mli gbɛfaŋnɔ babaoo kɛmɔ shi. Bo wiemɔ ni ekɛ minitii 15 haa yɛ woloŋ nikasemɔ lɛ naagbee lɛ toi jogbaŋŋ, ejaakɛ ekɛ ŋaawoi pɔtɛɛ komɛi baaha koni eye ebua kuu lɛ ni amɛya amɛhiɛ yɛ shiɛmɔ nitsumɔ lɛ fai sɔrɔtoi lɛ fɛɛ amli. Sɔɔmɔ nɔkwɛlɔ lɛ efee klalo hu akɛ ekɛ woloŋ nikasemɔ kuu lɛ mlibii sɔrɔtoi baatsu nii yɛ shiɛmɔ mli yɛ nakai otsi lɛ naagbee. Kwɛmɔ ni oha nɛkɛ gbɛjianɔtoo krɛdɛɛ nɛɛ he aba sɛɛnamɔ aha bo koni ona niiashikpamɔ kɛ nyɛmɔ ni eyɔɔ yɛ shiɛmɔ mli lɛ he sɛɛ.
6 Ekomefeemɔ he nɔkwɛmɔ nɔ ni wɔ diɛŋtsɛ wɔɔfee kɛ suɔmɔ mli ni wɔɔjɛ wɔye wɔbua mɛi ni bɛ niiashikpamɔ tsɔ lɛ baaha miishɛɛ kɛ naanyobɔɔ su ahi Asafo Woloŋ Nikasemɔ lɛ shishi beni “wɔfe[ɔ] mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.”—Gal. 6:10.