Asafo Woloŋ Nikasemɔ He Gbɛjianɔtoo
Fa 3: Kpee He Kɛha Sɔɔmɔ Nitsumɔ
1 Kɛfata kuu lɛ nikasemɔ he ni eji lɛ he lɛ, Asafo Woloŋ Nikasemɔ he lɛ hu baanyɛ asɔmɔ akɛ kpee he kɛha sɔɔmɔ nitsumɔ lɛ. Esa akɛ bei ni akɛfeɔ nɛkɛ kpeei nɛɛ ahi aha shiɛlɔi lɛ atɛŋ mɛi ni fa, ni esa akɛ kpeei lɛ aye bua ni ato shiɛlɔi lɛ ahe gbɛjianɔ kɛha sɔɔmɔ nitsumɔ lɛ.
2 Kui ni ato amɛ gbɛjianɔ jogbaŋŋ aha nikasemɔ kɛ sɔɔmɔ lɛ tswaa kuu lɛ emaa shi yɛ mumɔŋ. Namɔ ji mɔ ni hewalɛwoo loo ŋaawoo yɛ bɔ ni atsuɔ shitee-kɛ-wooi ahe nii, bɔ ni ajeɔ sanegbaa shishi, bɔ ni akɛ Biblia kasemɔ he hegbɛ haa, loo nɔ ni abaakɛɛ yɛ sɛɛsaramɔ mli lɛ he bako sɛɛnamɔ kɛhako lɛ da? Nanemɛi shiɛlɔi kɛ gbɛgbalɔi ni kpeɔ yɛ nikasemɔ kuu lɛ kpee he lɛ kɛ yelikɛbuamɔ ni tamɔ nɛkɛ haa.—Gal. 6: 9, 10.
3 Nɔkwɛlɔ lɛ Nitsumɔ: Asafo Woloŋ Nikasemɔ nɔkwɛlɔ lɛ nyiɛɔ hiɛ, ni lɛ etoɔ kuu lɛ nitsumɔ he gbɛjianɔ. Ekɛ shiɛlɔi lɛ tsuɔ nii daa yɛ sɔɔmɔ lɛ mli. (1 Pet. 5: 2, 3) Kpeei kɛha shiɛmɔyaa ni asaa he jogbaŋŋ yɛ mli lɛ kɛ Ŋmalɛ naa tsɔsemɔ ni anyɛɔ atsuɔ he nii haa koni ewula kuu lɛ kɛha shiɛmɔ. Asumɔɔ ni nikasemɔ kuu fɛɛ kuu akpe kɛha sɔɔmɔ amɛ diɛŋtsɛ fe ni kui lɛ fɛɛ aaakpe yɛ he kome. Shi kui bibii enyɔ baanyɛ akpe kɛ ehe miihia. Kɛ shiɛmɔ nitsumɔ lɛ nyiɛɔ Buu-Mɔɔ Nikasemɔ lɛ sɛɛ lɛ, belɛ esa akɛ kpee kɛha shiɛmɔyaa lɛ afee kuku. Yɛ no sɛɛ lɛ nikasemɔ kui anɔkwɛlɔi lɛ baakwɛ amɛ diɛŋtsɛ amɛkui anɔ.
4 Sɔɔmɔ nitsumɔ ni ato he gbɛjianɔ jogbaŋŋ lɛ haa akɛ he woɔ sɔɔmɔ lɛ mli daa. Kɛ afee kpeei kɛha shiɛmɔyaa lɛ yɛ be kɛ he ni ato he gbɛjianɔ lɛ pɛpɛɛpɛ lɛ, shiɛlɔi lɛ hu toɔ gbɛjianɔ nakai, ni akɛni amɛle akɛ shikpɔŋkuku yɛ ni amɛbaatsu mli nii ni amɛbaana mɛi krokomɛi ni amɛkɛ amɛ atsu nii hewɔ lɛ enɛ woɔ amɛ hewalɛ. (Okɛto Luka 10:1 he.) Kɛji nikasemɔ nɔkwɛlɔ lɛ nyɛŋ aba po lɛ, etaoɔ shikpɔŋkuku ehaa kuu lɛ ni etoɔ gbɛjianɔ ehaa amɛ. (om bf. 44-5) Kɛ nyɛminuu ko ni he esa ni baakwɛ kpee kɛha shiɛmɔyaa lɛ nɔ bɛ lɛ, nɔkwɛlɔ lɛ baahala nyɛmi yoo ko kɛha enɛ feemɔ (om bf. 77-8: km4/88 bf. 3) Yiŋfutumɔ ko baaa kɛ kuu lɛ kpeɔ daa kɛha shiɛmɔyaa yɛ ebe kɛ he ni ekpeɔ yɛ be fɛɛ be lɛ. Ewa akɛ atsɔ hiɛ atswa kuu lɛ adafi otsi kɛ aaahi kɛ tsakemɔ fioo ko aaaba enɛ mli lɛ.
5 Ekomefeemɔ He Miihia: Esa akɛ mɔ fɛɛ mɔ abɔ mɔdɛŋ ni ena sɔɔmɔ nitsumɔ lɛ fai lɛ eko fɛɛ ko mli gbɛfaŋnɔ ni sa. Shiɛlɔi lɛ baanyɛ aŋɔ hegbɛ ni amɛsaa amɛhe kutuu ni amɛka nɔ ni amɛbaafee loo amɛbaakɛɛ lɛ amɛkwɛ ni amɛkɛ shitee-kɛ-wooi kɛ shihilɛi ni baanyɛ ate shi diɛŋtsɛ yɛ shikpɔŋkuku lɛ mli lɛ atsu nii.—Abɛi 27:17.
6 Ani obaasumɔ ni shiɛlɔ ni he esa aye abua bo ni ohe asa yɛ kaselɔ-feemɔ nitsumɔ lɛ mli? Kɛ nakai ni lɛ, belɛ okɛ Asafo Woloŋ Nikasemɔ nɔkwɛlɔ lɛ awie he. Ebaanyɛ eto gbɛjianɔ ni shiɛlɔ ni he asa aye abua bo. Okɛ ŋaawoo ni akɛhaa bo lɛ atsu nii ni oye obe nɔ koni ehe aba sɛɛnamɔ ahao.
7 Etsa akɛ mɛi ni nikasemɔ nɔkwɛlɔ lɛ kɛ nitsumɔ woɔ amɛdɛŋ koni amɛye amɛbua lɛ afee mɛi ni yeɔ buaa kɛ mɛi ni yɔɔ hiɛshikamɔ yɛ amɛgbɛkpamɔi amli. Niiashikpamɔ etsɔɔ akɛ, mɛi ni yɔɔ sɔɔmɔ nitsumɔ lɛ he jwɛŋmɔ kpakpa ni ŋmɛɔ pɛpɛɛpɛ ni nyɛɔ amɛtsuɔ shihilɛi ahe nii lɛ ji mɛi ni nyɛɔ amɛtsɔseɔ mɛi jogbaŋŋ (km 11/79 bf. 1, 3; km 12/79 bf. 1, 3) Esa akɛ ajie yi be fɛɛ be ni aaana nɔyaa ko lɛ. Kɛkɛ lɛ akɛ otii krokomɛi emamɔ shi.—Okɛto Luka 19:17-19 he.
8 Wɔmiisumɔ ni wɔye wɔbua wɔhe ni wɔhe asa yɛ sanekpakpa lɛ shiɛmɔ kɛ kaselɔi afeemɔ mli. Bɔ ni jeŋ shihilɛi fiteɔ lɛ yeɔ bɔ ni nitsumɔ nɛɛ he hiaa ha lɛ he odase. Ekɔɔ wala he, ni Yehowa miiha naabuamɔ nitsumɔ lɛ miiya nɔ kɛ foi. (Yes. 60:22) Yɛ be mli ni sohaa sɔɔmɔ ni akɛwo wɔdɛŋ lɛ hiɔ wɔjwɛŋmɔ mli lɛ, wɔkɛ wɔ Asafo Woloŋ Nikasemɔ kuu lɛ baatsu nii yɛ ekome feemɔ mli ni wɔkɛgbe wɔnitsumɔ lɛ naa kwraa yɛ be mli ni wɔwoɔ mɛi krokomɛi ŋaa ni wɔwoɔ wɔhe hewalɛ lɛ.—Rom 12:6-8; 2 Tim. 4:1, 2, 5.