Ani Onyɛɔ Ofeɔ Gbɛgbalɔi Awalɔ?
1 Yesu wo esɛɛnyiɛlɔi lɛ hewalɛ ni amɛjɛ amɛsuɔmɔ mli amɛkɛ amɛhe aha yɛ sɔɔmɔ nitsumɔ lɛ mli, ni ema nɔ mi eha amɛ akɛ kɛji amɛkɔ gbɛ ni tamɔ nɛkɛ lɛ, ebaaha amɛna miishɛɛ kɛ mumɔŋ jɔɔmɔi babaoo. (Mat. 10:8b; Bɔfoi 20:35) Nyɛsɛɛ April ni ho lɛ, mɛi aŋkroaŋkroi 930 diɛŋtsɛ na miishɛɛ ni jɛɔ nitsumɔ babaoo mli baa akɛ gbɛgbalɔi awalɔi lɛ mli niiashikpamɔ. Ni kaimɔ akɛ, enɛ ba yɛ naatsii be lɛ mli. Ani obaanyɛ ona jɔɔmɔi nɛɛ amli gbɛfaŋnɔ afi nɛɛ kɛtsɔ ohe ni okɛaawo gbɛgbalɔi awalɔi asɔɔmɔ lɛ mli yɛ March loo April aloo nyɔji enyɔ lɛ fɛɛ mli lɛ nɔ?—Lala 34:9.
2 Bo Diɛŋtsɛ Oshihilɛ he Susumɔ: Beni osusuɔ niiashikpamɔi ni agba yɛ shishigbɛ lɛ ahe lɛ, bi ohe akɛ: ‘Ani minaa mihe yɛ nɔkwɛmɔ nii nɛɛ eko mli? Mɛɛ gbɛ nɔ matsɔ mafee tsakemɔi ni he hiaa ni baagbele gbɛ eha mi ni mikɛ mihe awo gbɛgbalɔi awalɔi asɔɔmɔ lɛ mli?
3 Nyɛmiyoo ko nyɛ efee gbɛgbalɔi awalɔ, eyɛ mli akɛ eyɛ bii enumɔ ni etsuɔ heloonaa nitsumɔ hu. Mɛɛ gbɛ nɔ awo lɛ nyɔmɔ yɛ? Ewu kɛ ebii lɛ fi esɛɛ jogbaŋŋ kɛmɔ shi, ni nɔ ni jɛ nyɛmiyoo lɛ nɔkwɛmɔ nɔ kpakpa lɛ mli ba ji akɛ, enɛ tsirɛ ewu ni ebatsɔ shiɛlɔ ni abaptisiko lɛ yɛ nyɔŋ ni nyiɛ sɛɛ lɛ mli.
4 Yɛ asafo ko hu mli lɛ, onukpai kɛ asafoŋ sɔɔlɔi lɛ fɛɛ sɔmɔ akɛ gbɛgbalɔi awalɔi yɛ nyɔŋ kome mli. Amɛteŋ mɛi pii yɛ heloonaa nitsumɔi shi amɛkɛ amɛdeka fɛɛ wo mumɔŋ nibii ahe nitsumɔ mli yɛ otsii lɛ anaagbee. Hiɛnyiɛmɔ kpakpa ni amɛkɛha yɛ shiɛmɔ mli kɛ shiɛmɔyaa he gbɛjianɔ ni amɛto lɛ he ba sɛɛnamɔ kɛha asafo muu lɛ fɛɛ Shiɛlɔi 77 lɛ ateŋ mɛi 73 kɛ amɛhe wo gbɛgbamɔ sɔɔmɔ sɔrɔtoi lɛ eko mli yɛ nakai nyɔŋ lɛ nɔ.
5 Skul gbekɛyoo ko ni eye afi 15 kɛ eskul gbɛhamɔ be fee gbɛgbalɔi awalɔ ni ewie akɛ: “Minaa sɔrɔto-feemɔ lɛlɛŋ, titri lɛ hiɛyaa ni mina yɛ sanegbaa mli lɛ. Minyɛ mikɛ mɛi babaoo gba sane yɛ amɛshinai anaa.”
6 Bei pii lɛ, mɛi ni eba heloonaa nitsumɔ mli hejɔɔmɔ kwraa lɛ naa hegbɛi ni hi fe fɛɛ ni amɛkɛaadi Maŋtsɛyeli lɛ he nibii asɛɛ. Nyɛmiyoo ko ni eye afi 84 ŋma yɛ ewu gbele sɛɛ akɛ: “Mibii lɛ fɛɛ edara ni amɛbote gbalashihilɛ mli ni amɛyɛ wekui. Amɛkuuu amɛhiɛ amɛshwieee minɔ, shi saramɔ ni amɛbasaraa mi lɛ nyɛɛɛ aye awerɛho kɛ mihe shoo-feemɔ lɛ nɔ. Kɛkɛ ni asafo lɛ mli onukpai lɛ ateŋ mɔ kome wo mi ŋaa akɛ mika gbɛgbalɔi awalɔ sɔɔmɔ lɛ mikwɛ. Mishashao shi fioo, shi naagbee lɛ mikpɛ miyiŋ akɛ maka makwɛ. Mɛɛ miishɛɛ eji nɛkɛ! Minu he akɛ Yehowa eŋmɛ mi gbɛ ni mahi wala mli kɛbashi migbɔlɛ nɛɛ mli koni manyɛ mana gbɛgbalɔi awalɔ lɛ mli niiashikpamɔ. Mitsa nɔ akɛ gbɛgbalɔi awalɔ daa nyɔŋ nɔ kɛjɛ nakai beaŋ kɛbaa.”
7 Nyɛminuu ko ni hɔ̃ɔ tsũi kɛ shikpɔji tsake gbɛjianɔ ni eto ni ekɛ mɛi yaa amɛyakwɛɔ tsũi kɛ shikpɔji lɛ bɔni afee ni ena be kɛha gbɛgbamɔ. Mɛi krokomɛi hu etsake amɛnitsumɔ gbɛjianɔtoo nakai nɔŋŋ bɔni afee ni amɛna be kɛha nitsumɔ babaoo.
8 Too Ogbɛjianɔ Bianɛ: Mɛni hewɔ otooo ogbɛjianɔ jogbaŋŋ bianɛ ni ofee gbɛgbalɔi awalɔ yɛ March kɛ April mli? March hiɛ Hɔgbaa enumɔ, ni hejɔɔmɔ gbii komɛi yɛ April. Kɛji oooye omanye lɛ, belɛ gbɛjianɔtoo kpakpa he miihia. Enɛ jeɔ kpo faŋŋ yɛ mɛi ni, eyɛ mli akɛ amɛyɛ weku mli gbɛnaa nii, amɛyɛ be-fɛɛ heloonaa nitsumɔi, kɛ Ŋmalɛ naa gbɛnaa nii krokomɛi moŋ, shi amɛnyɛ amɛfee gbɛgbalɔi awalɔi lɛ aniiashikpamɔi amli. Okɛ mɛi krokomɛi ni enyɛ eye omanye yɛ gbɛgbamɔ mli lɛ agba sane ni ona amɛniiashikpamɔ lɛ he sɛɛ. Agbɛnɛ hu, bɛŋkɛmɔ Yehowa yɛ sɔlemɔ mli, ni obi eyelikɛbuamɔ.—Yes. 40:29-31; Yak. 1:5.
9 Ŋwanejee ko kwraa bɛ he akɛ mɛi ni nyɛɔ amɛtoɔ amɛgbɛjianɔ ni amɛsɔmɔɔ akɛ gbɛgbalɔi awalɔi lɛ naa miishɛɛ babaoo. Kɛji obɛ be-fɛɛ sɔɔmɔ lɛ mli momo lɛ, ani obaanyɛ ona nɛkɛ hegbɛ nɛɛ mli ŋɔɔmɔ? Kɛji obɔ mɔdɛŋ akɛ ooolɛɛ hegbɛ ni ona akɛ oooha mɛi krokomɛi anu sanekpakpa lɛ mli lɛ, eka shi faŋŋ akɛ Yehowa baafɔse jɔɔmɔi babaoo diɛŋtsɛ eshwie onɔ.—Mal. 3:10.