Gbɔmɔ ni Fe Mɔ Fɛɛ Mɔ ni Ehi Shi Pɛŋ Wolo Iɛ Kasemɔ
1 Wɔbaaje Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ kasemɔ shishi, yɛ wɔ Asafo Woloŋ Nikasemɔi ashishi yɛ November 30 otsi lɛ mli. Mɛɛ miishɛɛ eeeji nɛkɛ akɛ wɔɔti Yesu Kristo shihilɛ kɛ esɔɔmɔ nitsumɔ lɛ mli! Akɛni esoro bɔ ni afee wolo nɛɛ fioo yɛ woji krokomɛi ni wɔkase lɛ ahe hewɔ lɛ, gbɛtsɔɔmɔi fioo nɛɛ baaye abua.
2 Wolo lɛ bɛ baafa yibɔi, no hewɔ lɛ nikasemɔ gbɛjianɔtoo ni akɛbaawo Wɔ Maŋtsɛyeli Sɔɔmɔ lɛ mli lɛ baatsɔɔ yitsei ni abaakase lɛ, baafee etɛ loo ejwɛ daa otsi. Yitsei 35, 111, kɛ 116 kɛlɛ, ni no hewɔ lɛ ebaajara eko fɛɛ eko mli afee lɛ nikasemɔi enyɔ. Yɛ be mli ni aha nyɛminuu ni he esa ekane yitso muu lɛ fɛɛ (aloo yitso bibioo lɛ fɛɛ, taakɛ eyɔɔ yɛ yitsei 35, 111, kɛ 116 mli) lɛ sɛɛ lɛ, nikasemɔ nɔkwɛlɔ lɛ baabi saji ni yɔɔ yitso lɛ naagbee ni kɛ yitso lɛ loo efa ni akane lɛ yaa pɛpɛɛpɛ lɛ. Jeee be fɛɛ be hetooi lɛ tsaraa nɔ pɛpɛɛpɛ yɛ yitso lɛ mli. Esa akɛ aha hetooi kukuji ni wieɔ otii pɔtɛɛ ahe lɛ adamɔ nikasemɔ lɛ mli sane lɛ nɔ.
3 No sɛɛ lɛ, kɛji be yɛ lɛ, esa akɛ akane ŋmalɛi ni atsɛ yɛ yitso lɛ naagbee lɛ fɛɛ. Abaanyɛ ajara ŋmalɛi ni atsɛ ni kɛlɛ lɛ amli kukuji bɔni afee ni eha shiɛlɔi saŋŋ anyɛ amɛna nikanemɔ lɛ mli gbɛfaŋnɔ, koni no sɛɛ lɛ amɛwie nɔ ni akane lɛ ahe kuku. Sanebimɔi pɔtɛɛ komɛi ni nikasemɔ nɔkwɛlɔ lɛ baato he gbɛjianɔ lɛ baaye abua ni anyɛ aha hetooi ni sa ni tsɔɔ bɔ ni ŋmalɛi ni akane lɛ kɔɔ nɔ ni awie he ni ama nɔ mi yɛ wolo lɛ mli lɛ he ehaa. Esa akɛ sanebimɔi kɛ amɛhetooi ni ahaa lɛ fɛɛ aye abua mɛi ni eba nikasemɔ lɛ ni egbala amɛjwɛŋmɔ kɛba Yesu Kristo, eshihilɛ gbɛ, kɛ etsɔɔmɔi lɛ anɔ.
4 Gbɔmɔ ni Fe Fɛɛ wolo lɛ esusu Yesu shihilɛ mli saji ahe ni eto naa yɛ be lɛ naa. Nibii ahe mfonirifeemɔ kɛ hei ni amɛba yɛ lɛ ni wɔɔha ahi wɔjwɛŋmɔ mli lɛ baanyɛ afee yelikɛbuamɔ diɛŋtsɛ kɛha amɛkaimɔ. No hewɔ lɛ, nyɛkwɛa ni nyɛsusua mfonirii fɛfɛji lɛ ahe, ni ogbala jwɛŋmɔ kɛya shikpɔŋ he mfoniri ni yɔɔ wolo lɛ shishijee gbɛ, yɛ hiɛkpamɔ wiemɔ lɛ sɛɛ nɔŋŋ lɛ nɔ shii abɔ.
5 Abaasusu wolo lɛ hiɛkpamɔ wiemɔ lɛ he yɛ klɛŋklɛŋ otsi lɛ mli. Kɛji akane kukuji ni yɔɔ yitso bibioo lɛ shishi lɛ fɛɛ agbe naa lɛ, nikasemɔ nɔkwɛlɔ lɛ baabi saji ni sa ni eto he gbɛjianɔ lɛ. Nɛkɛ klɛŋklɛŋ nikasemɔ nɛɛ baafee nɔ fɛɛ nɔ klalo kɛha nikasemɔi ni baanyiɛ sɛɛ yɛ afi ni baa lɛ mli lɛ. Bɔ ni abaaye nɔ ni ato ni akase lɛ mli omanye aha lɛ damɔ bɔ ni mɛi fɛɛ ni baa lɛ baasaa amɛhe amɛha lɛ nɔ babaoo diɛŋtsɛ. Esa akɛ nikasemɔ nɔkwɛlɔ lɛ titri asaa ehe jogbaŋŋ daa otsi koni eye ebua kuu lɛ fɛɛ ni amɛnyɛ amɛle gbɔmɔ ni fe mɔ fɛɛ mɔ ni ehi shi pɛŋ, wɔ Nuŋtsɔ kɛ Yiwalaherelɔ, Yesu Kristo jogbaŋŋ.