Yaa Nɔ Owie Nibii Ni Ona Kɛ Nibii Ni Onu Lɛ Ahe Daa
1 Beni akɛ yii kɛ tsuŋwoo po woɔ bɔfoi lɛ ahe gbeyei lɛ, amɛkɛɛ amɛshitee-kɛ-wolɔi lɛ akɛ: “Wɔnyɛŋ akɛ ja wɔwie nii ni wɔna kɛ nii ni wɔnu lɛ.” (Bɔf. 4:20) Amɛyoo sɛɛnamɔ ni yɔɔ Yesu nitsumɔi kɛ etsɔɔmɔi lɛ ahe.
2 Yesu kɛ e-Maŋtsɛyeli lɛ he sanekpakpa lɛ he miihia gbɔmɛi lɛ waa ŋmɛnɛ, taakɛ eji yɛ nakai beaŋ lɛ. No hewɔ lɛ, esa akɛ wɔkɛ hegbɛ fɛɛ hegbɛ ni wɔnaa lɛ atsu nii ni wɔkɛwie nɔ ni wɔna kɛ nɔ ni wɔnu kɛjɛ Nyɔŋmɔ Wiemɔ lɛ mli lɛ he. Bei pii lɛ, kɛ atsɔ ŋaa gbɛ nɔ aje jamɔ sane ko he wiemɔ shishi lɛ, enyɛɔ esaa mɛi babaoo ajwɛŋmɔ kɛhaa nakai sane lɛ hesusumɔ, ni enɛ gbeleɔ hegbɛi krokomɛi hu kɛhaa odaseyeli.
3 Obalaŋtai, Nyɛwiea yɛ Skul: Odasefoi obalaŋtai pii kɛ hegbɛi ni amɛnaa akɛ amɛaaye amɛ klasbii kɛ amɛtsɔɔlɔi odase lɛ tsuɔ nii. Odasefonyo obalaŋta ko ni bɔɔ mɔdɛŋ be fɛɛ be akɛ ehiɛ baahi ehe nɔ yɛ saneyitsei heei ni eklasbii fɔɔ he wiemɔi lɛ ahe lɛ kɛ hegbɛ ni ena beni sane ko ba yɛ skul lɛ tsu nii, ni ekɛ wolo ni sa shihilɛ nɛɛ tsɔɔ tsɔɔlɔi lɛ kɛ eklasbii lɛ. Mɛni jɛ mli ba? Eha woji 35 yɛ gbi kome mli! Akɛni atsɔ jwɛŋmɔi babaoo kɛba Yesu Kristo kɛ toiŋjɔlɛ he susumɔ nɔ kɛjɛ nyɛsɛɛ nyɔŋ lɛ nɔ tɔŋŋ hewɔ lɛ, ani nɛkɛ be nɛɛ ebafeŋ be ni hi jogbaŋŋ ni wɔkɛaaha wɔ klasbii kɛ tsɔɔlɔi ale bɔ ni Yesu ni miiye nɔ akɛ Maŋtsɛ lɛ baanyɛ ana je lɛ naagbai anaa tsabaa?—Okɛto Luka 2:14 he.
4 Kɛji ohe ni okɛwooo jamɔ mli nifeemɔi ni kɔɔ Blonya kɛ Afi Hee gbijurɔyelii ahe lɛ mli Iɛ teetee saji ashi lɛ, obaanyɛ okɛɛ akɛ:
◼ “Miikɛ mihe wooo Blonya gbijurɔyeli mli ejaakɛ nɛkɛ gbijurɔyelii nɛɛ wooo Yesu hiɛ nyam akɛ gbɛ koome pɛ ni wɔɔtsɔ nɔ wɔna yiwalaheremɔ, kɛ mɔ kome pɛ ni kɛ wɔnaagbai ni ji tai kɛ hewolonɔ sui amligbalamɔi nɛɛ baaba naagbee. [Tsɛ, aloo kanemɔ Bɔfoi 4:12.] Yesu jeee abifao dɔŋŋ, shi moŋ eji Maŋtsɛ ni miiye nɔ. Nɛkɛ wolo, Gbɔmɔ ni Fe Mɔ Fɛɛ Mɔ ni Ehi Shi Pɛŋ nɛɛ wieɔ Yesu tsɔɔmɔi kɛ naakpɛɛ nii ni efee lɛ fɛɛ ahe, ni etsɔɔ bɔ ni ekɛ adesai amanehului hu baaba naagbee.” No sɛɛ lɛ okɛ mfoniri ni yɔɔ yitso 133 lɛ atsɔɔ lɛ, koni okane kuku ni ji enyɔ yɛ baafa ni tsa nɔ lɛ. Okɛ otii krokomɛi ni osusuɔ akɛ mɔ lɛ baana he miishɛɛ lɛ atsɔɔ lɛ. Kɛ okɛtsɔɔ lɛ ogbe naa lɛ, agbɛnɛ jɛɛ miishɛɛ mli okɛ wolo lɛ aha lɛ.
5 Okɛ Nanemɛi Nitsulɔi Awie: Nyɛminuu ko kɛ woji 63 ha kɛtsɔ Gbɔmɔ ni Fe Fɛɛ wolo lɛ ekome ni ekɛfɔ enitsumɔ okpɔlɔ nɔ kɛkɛ lɛ nɔ. Bɔ ni eyɔɔ fɛɔ ha kɛ wolo lɛ gbɛi po kɛkɛ teeɔ sanebimɔi ashi. Ekolɛ obaanyɛ obi onaanyo nitsulɔ lɛ akɛ: “Namɔ obaakɛɛ akɛ lɛ ji gbɔmɔ ni fe mɔ fɛɛ mɔ ni ehi shi pɛŋ?” Kɛkɛ lɛ okɛfata he akɛ: “Nɛkɛ wolo nɛɛ wieɔ Yesu shihilɛ mli saji ahe fitsofitso, esusuɔ ewiemɔi fɛɛ he, ehaa saji ni mɛi babaoo biɔ yɛ naakpɛɛ nii ni efee lɛ ahe lɛ hetoo, ni ekɛ saji krokomɛi ni yɔɔ miishɛɛ hu fataa he. Eji nɔ ni Biblia lɛ tsɔɔ yɛ Yesu he lɛ mligbalamɔ ni mli ka shi faŋŋ, ni emaa nɔ mi ni ŋwanejee ko kwraa bɛ he akɛ Yesu Kristo ji gbɔmɔ ni fe mɔ fɛɛ mɔ ni ehi shi pɛŋ lɛ.” No sɛɛ lɛ gbalamɔ ejwɛŋmɔ kɛya wiemɔ ni Napoléon wie yɛ Yesu he, ni atsɛ yisɛɛ yɛ wolo lɛ hiɛkpamɔ wiemɔ lɛ kuku ni ji etɛ lɛ mli lɛ nɔ.
6 Hegbɛi ni tamɔ enɛɛmɛi hu aaanyɛ aba ni wɔkɛaaye wɔkuuŋbii aloo wɔwekumɛi ni heee yeee lɛ odase. Sɔlemɔ akɛ Yehowa aha bo ekaa kɛ nyɛmɔ ni okɛwie yɛ be ni sa mli. (Bɔf. 4:29, 31) Nɔ ni wɔyɔɔ kɛɛmɔ yɛ Yesu he lɛ baakanya mɛi ni susuɔ saji ahe ni amɛsumɔɔ jalɛ nifeemɔ lɛ atsuii. Mɛɛ niiashikpamɔ ni hi fe enɛ wɔɔnyɛ wɔna, akɛ wɔɔye wɔbua wɔklasnyo, wɔnaanyo nitsulɔ, wɔ akutsoŋnyo, loo wɔwekunyo ko ni ebanyiɛ wala gbɛ lɛ nɔ?—Yoh. 14:6.