Wo Mɛi Krokomɛi Hewalɛ ni Amɛkwɛ Yesu Jogbaŋŋ

¹ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ ji wolo krɛdɛɛ ko. Eyitsei 133 lɛ baanyɛ awo ekanelɔi ahewalɛ ni amɛkwɛ Yesu jogbaŋŋ, ni ebaakanya amɛ ni amɛnyiɛ enɔkwɛmɔ nɔ lɛ sɛɛ. Awieɔ yɛ gbɛ ni ja nɔ akɛ kɛ abua maŋtsɛmɛi fɛɛ ni eye nɔ pɛŋ lɛ anaa lɛ, amɛnako gbɔmɔ shihilɛ nɔ hewalɛ waa yɛ shikpɔŋ nɛɛ nɔ tamɔ Yesu efee lɛ. Eka shi faŋŋ akɛ mɛi ni kwɛɔ Yesu jogbaŋŋ lɛ baana he sɛɛ.

² Yesu tsɔɔ ekaselɔi lɛ e-Tsɛ he nii ni ejie sui kpakpai ni Nyɔŋmɔ yɔɔ lɛ hu kpo. Kɛ wɔsusu bɔ ni Yesu he esa jogbaŋŋ akɛ tsɔɔlɔ, ehiɛnyiɛmɔ ni gbeyeishemɔ bɛ mli, kɛ mlihilɛ kpele ni eyɔɔ lɛ he lɛ, etsirɛɔ wɔtsuii waa. Kɛ wɔkai amanehului ni ena beni ekɛ ewala haa koni ekɛkpɔ wɔ lɛ, etsirɛɔ wɔ ni wɔjieɔ hiɛsɔɔ kpo! Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ baanyɛ aye abua gbɔmɛi ni amɛna Yesu yɛ nɛkɛ gbɛ nɔ.

³ Saamɔ Ohe Jogbaŋŋ: Saamɔ ohe jogbaŋŋ akɛ obaaje Biblia mli sanegbaa shishi, nɔ ni baawo mɛi krokomɛi hewalɛ koni amɛkwɛ Yesu jogbaŋŋ. Wekui kɛ mɛi krokomɛi hu fɛɛ baanyɛ ati saji amli kutuu. Bɔɔ mɔdɛŋ ni otee miishɛɛ shi ni owo mɛi ahewalɛ ni amɛkane Gbɔmɔ ni Fe Fɛɛ wolo lɛ. Ekolɛ ebaahe nɔ ni fe shikome sanegbaa dani onyɛ owo mɔ ko hewalɛ ni ehe wolo lɛ eko. Kɛ miishɛɛ fioo pɛ mɔ lɛ tsɔɔ yɛ shishijee mli lɛ, no lɛ wɔbaanyɛ wɔshi dɛhiɛmɔ wolo wɔha lɛ.

⁴ Sanegbaa ni wɔkɛbaaya shia kɛ shia yɛ January mli lɛ baakɔ Yesu he titri ni ebaawo mɛi ahewalɛ koni amɛna amɛle lɛ jogbaŋŋ. Kɛ wɔma saji ni awie he yɛ Gbɔmɔ ni Fe Fɛɛ wolo lɛ mli lɛ anɔ mi lɛ, wɔbaanyɛ wɔkɛye wɔbua mɛi ni amɛna Yesu, jeee akɛ yinɔsane mli gbɔmɔ ko kɛkɛ, shi moŋ akɛ Nyɔŋmɔ Bi kɛ nɔyeli ni kɛ adesai anaagbai fɛɛ anaa tsabaa baaha lɛ nɔ Maŋtsɛ ni miiye nɔ.

⁵ Taakɛ wɔma nɔ mi yɛ nyɛsɛɛ nyɔŋ lɛ nɔ Wɔ Maŋtsɛyeli Sɔɔmɔ lɛ mli lɛ, wɔmiisumɔ ni wɔwo mɛi pii hewalɛ ni amɛhe wɔwoji lɛ. Te wɔɔfee tɛŋŋ wɔle akɛ mɔ lɛ yɛ he miishɛɛ lɛlɛŋ lɛ? Kɛ mɔ lɛ boɔ wiemɔ lɛ toi jogbaŋŋ, ni ebiɔ saji, aloo eboɔ nɔ ni wɔkaneɔ kɛjɛɔ Biblia lɛ mli lɛ toi jogbaŋŋ lɛ, no lɛ enɛ baanyɛ afee anɔkwa miishɛɛ ni eyɔɔ lɛ he okadi. Bei komɛi lɛ, shiatsɛ lɛ tsɔɔ bɔ ni ehiɛ esɔ wɔsaramɔ lɛ, aloo ewieɔ bɔ ni ena wɔwoji lɛ akanemɔ he miishɛɛ eha. Kɛ wɔkɛ wolo lɛ tsɔɔ lɛ ni ehe amrɔ nɔŋŋ ni ekwɛ mli, aloo ebi bɔ ni eeefee ni enine ashɛ eko nɔ lɛ, belɛ etsɔɔ akɛ eyɛ he miishɛɛ lɛlɛŋ. Kɛ ejieee miishɛɛ ni tamɔ nɛkɛ kpo lɛ, no lɛ wɔbaanyɛ wɔshi dɛhiɛmɔ wolo wɔha lɛ, ni wɔbi lɛ sane ko ni wɔkɛ lɛ abasusu he wɔsɛɛ, koni wɔto gbɛjianɔ kɛha sɛɛsaramɔ. Kɛ wɔku wɔsɛɛ wɔtee eŋɔɔ ekoŋŋ lɛ, ekolɛ wɔɔnyɛ wɔna bɔ ni eyɔɔ he miishɛɛ ha lɛ jogbaŋŋ agbɛnɛ.

⁶ Mɔ ko ni jeee be fɛɛ be enaa nikanemɔ he miishɛɛ jie hiɛsɔɔ kpo yɛ Gbɔmɔ ni Fe Fɛɛ wolo lɛ he, ni ewie akɛ ena wolo lɛ kanemɔ he miishɛɛ gbi muu fɛɛ. Nyɛhaa wɔyea wɔbuaa mɛi krokomɛi ni amɛ hu amɛnua he nakai, ni wɔbɔ mɔdɛŋ bɔ ni wɔɔnyɛ ni wɔwo amɛ hewalɛ ni amɛkwɛ Yesu jogbaŋŋ kɛtsɔ anɔkwa miishɛɛ ni amɛkɛaakane Gbɔmɔ ni Fe Mɔ Fɛɛ Mɔ ni Shi Pɛŋ wolo lɛ nɔ.