Tsɛ́ Mɛi Krokomɛi ni Amɛbanyiɛ Gbɔmɔ ni Fe Mɔ Fɛɛ Mɔ lɛ Sɛɛ
1 Taakɛ aŋma yɛ Mateo 5:14 lɛ, Yesu kɛɛ ekaselɔi lɛ akɛ: “Nyɛ ji je lɛŋ la lɛ.” Esa akɛ Yesu sɛɛnyiɛlɔi kɛ gbɔmɛi ni yɔɔ he fɛɛ he awie Yehowa Maŋtsɛyeli lɛ kɛ E-suɔmɔ gbɛjianɔtoo kɛha yiwalaheremɔ kɛtsɔ Yesu nɔ lɛ he. Akɛni nakai nitsumɔ lɛ yɛ wɔjwɛŋmɔ mli hewɔ lɛ, wɔmiikpa gbɛ akɛ yɛ December nyɔŋ lɛ mli lɛ, wɔkɛ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ baaha. Naa ŋaawoi komɛi ni ekolɛ obaasumɔ ni okɛtsu nii.
2 Kɛ ojie ohe shi ogbe naa lɛ, obaanyɛ owie nɔ ni nyiɛ sɛɛ nɛɛ yɛ bo diɛŋtsɛ owiemɔ mli:
◼ “Mɛi pii esusu he akɛ te Yesu tamɔ eha tɛŋŋ, beni ehi shikpɔŋ nɛɛ nɔ akɛ gbɔmɔ lɛ. Yɛ mɛɛ gbɛi anɔ nɛkɛ osusuɔ akɛ esoro lɛ yɛ mɛi krokomɛi ahe? [Ŋmɛɛ gbɛ ni ejie naa.] Nɛkɛ wolo fɛfɛo, ni ji Gbɔmɔ ni Fe Mɔ Fɛɛ Mɔ ni Ehi Shi Pɛŋ nɛɛ wieɔ eshihilɛ kɛ esɔɔmɔ nitsumɔ lɛ mli otii ahe, ni ehaa wɔleɔ nɔ gbɔmɔ ni eji jogbaŋŋ diɛŋtsɛ. Beni amɛkane wolo nɛɛ, mɛi komɛi nu he akɛ etamɔ nɔ ni amɛna hegbɛ amɛkɛ lɛ diɛŋtsɛ miina sharamɔ, amɛkɛ lɛ miina amanehulu, ni amɛ diɛŋtsɛ amɛmiina esɔɔmɔ nitsumɔ lɛ.” Gbalamɔ ejwɛŋmɔ kɛya klɛŋklɛŋ mfoniri ni yɔɔ wolo lɛ mli, ni kɔɔ eyitso lɛ he lɛ nɔ. No sɛɛ lɛ, gbelemɔ hiɛkpamɔ wiemɔ lɛ, ni okane kuku ni ji enyɔ yɛ yitso bibioo ni ji “Na Ehe Nikasemɔ he Sɛɛ” lɛ shishi. No sɛɛ lɛ, okɛ wolo lɛ aha lɛ kɛ miishɛɛ.
3 Aloo obaanyɛ okɛɛ nɔ ko tamɔ nɛkɛ:
◼ “Kɛ eshɛ nɛkɛ beaŋ lɛ, gbɔmɛi jwɛŋɔ Yesu he. Shi, akɛni nibii fɔji babaoo miiya nɔ yɛ je lɛŋ he fɛɛ he hewɔ lɛ, ekolɛ no haa mɛi komɛi ayiŋ feɔ amɛ kɔshikɔshi akɛ ani Yesu susuɔ wɔhe lɛlɛŋ lo. Te bo hu osusuɔ he ohaa tɛŋŋ?” Ŋmɛɛ gbɛ ni ejie naa. Gbelemɔ Gbɔmɔ ni Fe Fɛɛ wolo lɛ yitso 24, ni okɛ lɛ asusu nɔ hewɔ ni Yesu ba shikpɔŋ nɔ lɛ he kuku. No sɛɛ lɛ kanemɔ Yohane 15:13, ni oma tsuiŋ suɔmɔ ni Yesu yɔɔ kɛha mɛi krokomɛi lɛ nɔ mi. Kaimɔ ni ohiɛ woji tɛtrɛbii heei, loo woji bibii, loo dɛhiɛmɔ wolo ko ni sa ni okɛbaaha kɛji mɔ lɛ heee wolo lɛ.
4 Naa ŋaawoo kroko hu:
◼ “Gbekɛbii pii miitao gbɔmɛi ni efee nɔ ko yɛ amɛshihilɛ mli ni amɛkase amɛ, shi gbɔmɛi kpakpai nakai namɔ wa. Yesu Kristo fee nɔkwɛmɔ nɔ ni eye emuu efɔ̃ shi eha mɔ fɛɛ mɔ. [Kanemɔ 1 Petro 2:21.] Etswa eshihilɛ fɛɛ ebɔle eŋwɛi Tsɛ lɛ jamɔ he. Te osusuɔ akɛ shihilɛ lɛ baafee aha tɛŋŋ kɛji mɛi babaoo ka akɛ amɛaakase lɛ?” Ŋmɛɛ gbɛ ni eha hetoo. Gbalamɔ ejwɛŋmɔ kɛya kuku ni ji etɛ yɛ baafa ni kɛ ojɛ no nɔ lɛ, obaaya naagbee baafa lɛ mli, ni wieɔ esui krɛdɛɛi lɛ ahe lɛ nɔ. Tsɔɔmɔ lɛ bɔ ni Gbɔmɔ ni Fe Fɛɛ wolo lɛ baanyɛ aye abua wɔ fɛɛ ni wɔtsɔmɔ Kristofoi kpakpai.
5 Ekolɛ obaasumɔ ni okɛ nɔ ko tamɔ nɛkɛ atsu nii:
◼ “Kɛ atsĩ Yesu Kristo tã lɛ, mɛi pii susuɔ ehe akɛ abifao ni afɔ lɛ loo ákɛ nuu ni miina amanehulu ni ebaagbo. Bɔ ni amɛsusuɔ yɛ Yesu he lɛ kɔɔ efɔmɔ kɛ egbele pɛ he. Bei pii lɛ, amɛkaiii naakpɛɛ nibii ni ewie kɛ nibii hu ni efee yɛ eshihilɛ mli lɛ eko kwraa. Nibii ni ebatsu lɛ saa mɔ fɛɛ mɔ ni ehi shi pɛŋ yɛ shikpɔŋ nɛɛ nɔ lɛ he. No hewɔ ni ehe hiaa ni wɔkase naakpɛɛ nibii ni efee yɛ wɔ hewɔ lɛ ahe nii babaoo bɔ ni wɔɔnyɛ lɛ.” Kanemɔ Yohane 17:3. Gbelemɔ Gbɔmɔ ni Fe Fɛɛ wolo lɛ hiɛkpamɔ wiemɔ lɛ klɛŋklɛŋ baafa lɛ, ni okane kuku ni ji ejwɛ lɛ. Tsɔɔmɔ lɛ bɔ ni abaanyɛ akɛ wolo lɛ atsu nii kɛha teemɔŋ nikasemɔ.
6 Kaimɔ ni oŋmala mɛi ni yɔɔ he miishɛɛ kɛ mɛi ni ehe woji lɛ agbɛi koni onyɛ oya amɛŋɔɔ ekoŋŋ kɛha sɛɛsaramɔ. Beni be yɔɔ lolo nɛɛ, nyɛhaa wɔkɛ ekaa ataoɔ mɛi ni yɔɔ jalɛ tsui lɛ ni wɔye wɔbua amɛ ni amɛbatsɔmɔ wɔ Yiwalaherelɔ, Yesu Kristo sɛɛnyiɛlɔi.—Mat. 16:24.