Sanebimɔ He

◼ Ani eja gbɛ akɛ aaakwɛ woji ni Asafo lɛ efee lɛ anɔ afee ekrokomɛi ni akɛha mɛi krokomɛi?

Asafo lɛ efee woji sɔrɔtoi babaoo yɛ afii abɔ ni eho lɛ amli fɛɛ ni kɔɔ Biblia mli nilee sɔrɔtoi fɛɛ he. Aŋkroaŋkroi ni ebale anɔkwale lɛ yɛ nyɛsɛɛ afi fioo nɛɛ amli lɛ baanu he akɛ woji ni akala yɛ tsutsu bei ni eho lɛ amli. ni amrɔ nɛɛ amɛnine nyɛŋ ashɛ nɔ dɔŋŋ kɛtsɔ Asafo lɛ nɔ lɛ amli saji eŋmɛɛ amɛ. Mɛi komɛi po emia amɛhiɛ waa ni amɛnine eshɛ nɛkɛ woji memeji nɛɛ ekomɛi anɔ, ni mɛi krokomɛi ekɔ efɔ amɛnɔ akɛ amɛbaakwɛ Asafo lɛ woji nɛɛ anɔ amɛfee ekrokomɛi yɛ gbɛi sɔrɔtoi anɔ ni amɛha mɛi anine ashɛ nɔ. Nɔ ni fata enɛ he ji woji lɛ akalamɔ diɛŋtsɛ kɛ agbɛnɛ woji lɛ amli saji ni akɛwo kompiuta nɔ. Yɛ shihilɛi komɛi amli lɛ, amɛfee enɛ kɛha sɛɛnamɔ.

“Tsulɔ” anɔkwafo lɛ le mumɔŋ nii ni he hiaa wɔ ni eto he gbɛjianɔ “yɛ be ni sa nɔ.” (Mat. 24:45) Kɛji ehe miihia ni asaa ajie woji ni akala yɛ tsutsu ko lɛ amli saji akpo lɛ, Asafo lɛ toɔ gbɛjianɔ kɛhaa nakai feemɔ Akɛ nɔkwɛmɔ nɔ lɛ, asaa akala Buu-Mɔɔ ni je kpo kɛjɛ 1960 kɛbashi 1985 wolokpoi lɛ ekoŋŋ ni aha mɔ fɛɛ mɔ nine eshɛ eko nɔ. Shi, kɛji aŋkroaŋkroi diɛŋtsɛ ŋɔ hegbɛ lɛ ni amɛkɛfee nɛkɛ woji nɛɛ ekoŋŋ ni amɛkɛha mɛi lɛ, no lɛ eeenyɛ eteetee naagbai ni he ehiaaa shi.

Kɛji asaa akala woji nɛɛ ekoŋŋ ni aahɔɔ kɛha sɛɛnamɔ lɛ, enyɛɔ ekɛ naagbai ni hiɛdɔɔ yɔɔ he waa baa. Sanebimɔ He ni yɔɔ October 1977 Wɔ Maŋtsɛyeli Sɔɔmɔ lɛ mli lɛ jaje akɛ: “Esaaa ni wɔtaoɔ sɛɛnamɔ ko yɛ teokrase henaabuamɔi ahe kɛtsɔɔ nibii ahɔɔmɔ aloo jarayeli nitsumɔi ahe adafitswaa yɛ Maŋtsɛyeli Asa lɛ nɔ, asafo woloŋ nikasemɔ hei kɛ Yehowa webii lɛ akpeei wuji ashishi lɛ anɔ. Enɛ baaye ebua wɔ koni wɔkɛ wɔ jwɛŋmɔ fɛɛ afɔ mumɔŋ nii kpakpai lɛ anɔ bɔ ni sa pɛpɛɛpɛ, ni wɔkɛ jarayeli nifeemɔi abo amɛgbɛhe ni sa amɛ.” Enɛ hewɔ lɛ, ehe miihia ni wɔtsi wɔhe kɛjɛ sɛɛnamɔ he jwɛŋmɔ ni wɔɔna kɛji ebalɛ akɛ akɛ Nyɔŋmɔ Wiemɔ lɛ aloo saji krokomɛi ni kɔɔ he lɛ miiye jara lɛ he.