Obalaŋtai​—Nyɛkɛ Hesaa Akudɔa Nyɛ Najifamɔi

¹ Wɔ-Tsɛ, Yehowa nyaa obalaŋtai amumɔŋ nɔyaa he. Kɛ obalaŋtai kɛ nilee bo ekitai ni suɔmɔ yɔɔ mli lɛ atoi Iɛ, jeee akɛ amɛhaa etsui nyaa kɛkɛ, shi amɛnaa hejɔɔmɔ amɛhaa amɛsusumai hu. (Abɛi 27:​11; Mat. 11:​28-30) Amɛŋmɛɔ gbɛ koni Yehowa kɛ hesaa akudɔ amɛ najifamɔi.​—Abɛi 16:⁠9.

² Kristo Yesu to okadi efɔ shi yɛ obalaŋtai akɛ mɔ ni na nɔkpɛlɛmɔ yɛ Nyɔŋmɔ kɛ gbɔmɛi fɛɛ hiɛ. (Luka 2:52) Esa akɛ obalaŋtai ni yɔɔ ŋmɛnɛ lɛ abɔ mɔdɛŋ ni amɛfee nakai nɔŋŋ. Esa akɛ bɔ ni obalaŋtai lɛ kudɔɔ enajifamɔi kɛ hesaa lɛ aje kpo yɛ mumɔŋ nibii ni ediɔ sɛɛ lɛ mli. Beni Yesu eye afii 12 lɛ, no mli lɛ ale lɛ akɛ mɔ ni sumɔɔ ni ekɛ mɛi krokomɛi agba Yehowa he sane. (Luka 2:​46, 47) Obalaŋtai ni yɔɔ ŋmɛnɛ lɛ hu etsɔɔ suɔmɔ ni tamɔ nakai nɔŋŋ akɛ amɛaatsɔɔ amɛhemɔkɛyeli mli amɛtsɔɔ mɛi krokomɛi.​—wGA90 7/1 bf. 29-30; w87 12/1 bf. 21.

³ Mɛni obalaŋtai lɛ baanyɛ afee bianɛ kɛ agbɛnɛ titri lɛ yɛ gbɛhamɔ be ni baa lɛ mli koni “amɛkɛ amɛ nibii ni jara wa lɛ awo Yehowa hiɛ nyam”? (Abɛi 3:​9, NW) Mɛni hewɔ ohaaa be ni okɛwoɔ sanekpakpa lɛ shiɛmɔ kɛ etsɔɔmɔ mli lɛ afa, ekolɛ akɛ gbɛgbalɔi awalɔ po? Miishɛɛ ni yaa hiɛ kɛ sɛɛnamɔi krokomɛi ni baa kɛjɛɔ sɔɔmɔ nitsumɔ lɛ mli ni akɛ he woɔ babaoo, ni baa onɔ lɛ baaha onaa akpɛ ohe. Enɛ hu baaha ona hegbɛ ni okɛ shiɛlɔi sɔrɔtoi pii atsu nii yɛ sɔɔmɔ lɛ mli. Obaanyɛ oje shishi bianɛ kɛtsɔ shiɛlɔ ko ni he esa loo amɛteŋ mɛi enyɔ ni ooofɔ nine otsɛ amɛ ni amɛkɛ bo atsu nii otsi nɛɛ naagbee lɛ nɔ.

⁴ Fɔlɔi baanyɛ awo amɛbii ahewalɛ babaoo ni amɛye amɛbua amɛ ni amɛkase efeemɔ-kɛ-kwɛmɔ kɛfata amɛhe ni amɛaafata kɛaaya shiɛmɔ lɛ he. Mɛi krokomɛi ni amɛdara yɛ mumɔŋ ni yɔɔ asafo lɛ mli lɛ baanyɛ aŋɔ hegbɛ lɛ ni amɛtsɛ obalaŋtai lɛ ni amɛbafata amɛhe yɛ shia kɛ shia sɔɔmɔ lɛ mli kɛ agbɛnɛ yɛ sɛɛsaramɔ kɛ Biblia kasemɔ nitsumɔ lɛ mli. Bɔ ni akɛ shiɛlɔi ni he wa yɛ mumɔŋ nɛɛ aaabɔ gbagbalii lɛ baawaje obalaŋtai lɛ ni ebaaye ebua amɛ ni “[amɛ]foŋ kɛya dalɛ mli.”​—Heb. 6:⁠1.

⁵ Ehe miihia ni Kristofonyo fɛɛ Kristofonyo aha enyɛmɔ yɛ nitsɔɔmɔ mli lɛ aya hiɛ. Ajieee gbekɛbii loo obalaŋtai kɛjɛɛɛ mli. Ani nyɛ obalaŋtai lɛ saa nyɛhe jogbaŋŋ kɛ aha nyɛ hegbɛ akɛ nyɛbaafee nɔ ko yɛ Teokrase Sɔɔmɔ Skul lɛ mli? Ani nyɛyɛ be he gbɛjianɔtoo kɛha nikanemɔ kɛ teemɔŋ nikasemɔ kɛ agbɛnɛ nikasemɔ nɔ jwɛŋmɔ? Ani nyɛkɛ nɔ ni nyɛkaseɔ lɛ tsuɔ nii amrɔ nɔŋŋ? Ani nyɛsaa nyɛhe jogbaŋŋ kɛhaa kpeei bɔni afee ni nyɛnu nɔ ni abaasusu he lɛ shishi ni nyɛha hetoo? Ani nyɛkadiɔ saji otii ni yeɔ buaa ni awie yɛ kpeei lɛ ashishi lɛ, ni ani nyɛbɔɔ mɔdɛŋ ni nyɛkɛ ŋaawoi ni akɛha yɛ Wɔ Maŋtsɛyeli Sɔɔmɔ lɛ mli lɛ atsu nii?

⁶ Nyɛkaŋmɛɛa hegbɛ ni baa ni aaaha nyɛkɛ nyɛhe awo Maŋtsɛyeli Asa lɛ nɔ saamɔ mli kɛ yelikɛbuamɔ ni nyɛkɛaaha nyɛmimɛi hii kɛ yei ni amɛdara yɛ afii amli loo amɛbɛ gbɔmɔtsoŋ hewalɛ lɛ yɛ amɛ daa gbi nitsumɔi amli loo yɛ nibii krokomɛi ni sa amli lɛ he. Nyɛkakua nyɛhiɛ nyɛshwiea onia ni nyɛ diɛŋtsɛ nyɛaatsu daa koni akɛwo Maŋtsɛyeli Asa lɛ he nyɔji ni akɛfi Asafo lɛ jeŋ muu fɛɛ nitsumɔ lɛ sɛɛ lɛ nɔ.

⁷ Kɛ ‘wɔha wɔhiɛ hi wɔhe nɔ yɛ Yehowa wiemɔ naa’ ni wɔŋmɛ gbɛ koni ekudɔ wɔnajifamɔi lɛ, ebaanyiɛ wɔhiɛ kɛya miishɛɛ kɛ sɔɔmɔ hegbɛi ni fa mli.​—Lala 119:9