Sanekpakpa Lɛ Kɛhamɔ
Kɛha Obalaŋtai
1 Nɛkɛ wɔ ŋmɛnɛŋmɛnɛ beaŋ yinɔ nɛɛ efee be ni mli wa waa kɛha obalaŋtai fɛɛ. Kɛlɛ, afii ohai babaoo ni eho nɛ ni nuu ko ni Nyɔŋmɔ mumɔ yɔɔ enɔ ŋma akɛ: “Te obalanyo aaafee tɛŋŋ ni eha egbɛ lɛ he atse hu? No ji akɛ ekwɛ ehe nɔ jogbaŋŋ yɛ owiemɔ lɛ naa.” (Lala 119:9) Yɛ anɔkwale mli lɛ, gbɛtsɔɔmɔ ni damɔ Yehowa Wiemɔ lɛ nɔ lɛ he miiba sɛɛnamɔ kɛmiiha obalaŋtai akpei abɔ ŋmɛnɛ.
2 Yɛ be mli ni obalanyo ko kane “Young people ask. . .” he saji ni yɔɔ Awake! lɛ ekome mli lɛ, ekɛɛ: “Mifɔɔ obalayei kɛ kpojee ejaakɛ misusu akɛ no ji nɔ ni esa akɛ mafee. Misusuuu gbalashihilɛ he. Kɛkɛ ni mikane nyɛwolo tɛtrɛɛ ni ji Awake! lɛ. Etsake bɔ ni misusuɔ nibii ahe lɛ ni etsɔ ekpakpa. Mikpa obalayei kɛ kpojee ja mifee klalo akɛ mabote gbalashihilɛ mli.” Ŋwanejee ko bɛ he akɛ ena ŋaawoo kpakpa ni anyɛɔ atsuɔ he nii lɛ he sɛɛ. Amrɔ nɛɛ obalaŋtai pii nyɛɔ amɛnine sheɔ Ŋmalɛ mli saji ni aŋmala yɛ wolo hee ni ji Questions Young People Ask—Answers That Work lɛ mli lɛ nɔ. Mɛni ooofee koni oha obalaŋtai ni yɔɔ oshikpɔŋkuku lɛ mli loo mɛi ni yɔɔ skul lɛ nine ashɛ nɔ?
Na Obalaŋtai Lɛ Ahe Miishɛɛ
3 Ni oootsɔ obalaŋtai ayiŋ ni amɛhiɛ asɔ sɛɛnamɔ ni yɔɔ Yehowa Wiemɔ lɛ mli lɛ ji nɔ ko ni kaa mɔ diɛŋtsɛ. (Kwɛmɔ Abɛi 22:15) Shi, bɔfo Paulo kɛɛ: “Yudafoi lɛ, mitsɔ tamɔ Yudanyo miha amɛ, bɔni afee ni minine ashɛ Yudafoi lɛ anɔ.” (1 Kor. 9:20) Nakai nɔŋŋ hu ni oooye obua obalaŋtai ni amɛhiɛ asɔ ni amɛna mumɔŋ gbɛtsɔɔmɔ ni sa lɛ biɔ ni onu obalaŋtai lɛ kɛ amɛnaagbai lɛ ashishi. Ehe miihia ni osusu nɔ ni obalaŋtai yɔɔ he miishɛɛ kɛ nɔ ni amɛnaagbai ji yɛ skul aloo he ni amɛhiɔ loo amɛtsuɔ nii yɛ lɛ ahe. Kɛ ooye obalaŋtai odase lɛ, esa akɛ shishinumɔ nɛɛ aje kpo yɛ ohiɛkpamɔ wiemɔi amli, owiemɔi diɛŋtsɛ amli, kɛ agbɛnɛ esanebimɔi amli. Saji ni ato naa yɛ wolo hee Young People Ask lɛ mli lɛ hiɛ saji ni nɔ bɛ kɛ nɔ ni esa akɛ awie he. Kɛ ole nɛkɛ saji nɛɛ jogbaŋŋ lɛ, ooonyɛ onu nɔ ni obalaŋtai pii susuɔ he ŋmɛnɛ lɛ shishi.
Nɔ Ni Obaanyɛ Okɛɛ
4 Yɛ be mli ni otaoɔ hegbɛi ni oye odase trukaa lɛ, okaku ohiɛ oshwie obalaŋtai anɔ. Okɛ amɛ agba sane, ni otsɔ ŋaa gbɛ nɔ otsɔɔ amɛ akɛ oosumɔ ni oye obua obalaŋtai ni amɛnyɛ amɛ damɔ amɛ daa gbi naagbai anaa. Tsɔɔmɔ amɛ nɔkwɛmɔ nɔ ko ni anyɛɔ atsuɔ he nii ni ji ŋaawoo ni yɔɔ Biblia lɛ mli lɛ. Ha ahi ojwɛŋmɔ mli akɛ oti ni ma ohiɛ ji ni oye obua amɛ ni amɛna bɔ ni Lala 119:9 ji anɔkwale ha.
5 Kɛ okɛ obalaŋta ko miiwie lɛ, jiemɔ naanyobɔɔ su kpo ni agbɛnɛ okɛ woo aha lɛ. Yɛ be mli ni oŋa lɛ kɛjɛ shishijee lɛ, obaanyɛ okɛɛ akɛ: “Misusuɔ obalaŋtai ni tamɔ nyɛ lɛ ahe waa kɛ bɔ ni amɛaanyɛ amɛdamɔ naagbai ni amɛkɛkpeɔ yɛ akutso nɛɛ mli lɛ anaa lɛ he. Ani onaa ni aatsirɛ bo koni ofee nɔ ko ni yɛ anɔkwale mli lɛ osumɔɔɔ ni ofee? Aloo eshɛɔ be ni osumɔɔ ni ofee nii akɛni onaa ni mɛi krokomɛi miifee hewɔ shi jeee akɛ nɔ ni bo diɛŋtsɛ ohala akɛ ooofee? Ani osusu bɔ ni ooofee ni odamɔ nɛkɛ tipɛŋfoi anɔnyɛɛ nɛɛ naa lɛ he?” Beni eha hetoo lɛ, gbelemɔ Young People Ask wolo lɛ yitso 9 kɛ ohiɛ eko, Kɛkɛ lɛ kɛɛmɔ: “Ofainɛ kwɛmɔ nɔ ni wolo hee nɛɛ kɛɔ yɛ ebaafa 77 nɛɛ. [Kanemɔ kuku ko ni sa.] Ani osusuɔ akɛ Biblia lɛ kasemɔ baanyɛ aye abua obalaŋtai ni amɛdamɔ nɛkɛ naagba nɛɛ naa? [Ŋmɛɛ lɛ gbɛ ni ewie.] Kadimɔ nɔ ni Biblia lɛ kɛɔ yɛ Lala 119:9 nɛɛ. [Kanemɔ.] Nɛkɛ wolo nɛɛ tsɔɔ bo bɔ ni Biblia lɛ baanyɛ aye abua obalaŋtai ni amɛdamɔ shihilɛi ni mli wawai anaa, tamɔ nɔ ni ato naa yɛ wolo nɛɛ mli lɛ. [Okɛ wolo lɛ awo edɛŋ.] Onɔ ni kɛ oye obua kɛ ₵550”
6 Kɛ oji shiɛlɔ ni miiya skul lolo lɛ, okɛ ŋaawoo ni akɛha yɛ September 1989 Wɔ Maŋtsɛyeli Sɔɔmɔ lɛ mli lɛ atsu nii. Omii baashɛ ohe babaoo yɛ be mli ni ofeɔ nakai lɛ.
7 Yehowa “sumɔɔɔ akɛ mɛi komɛi alaaje.” (2 Pet. 3:9) Obalaŋtai fata he. Shi, obalaŋtai pii ejeŋ Harmagedon mli shweshweeshwe. Eba akɛ mɔdɛŋ ni wɔɔbɔ akɛ wɔɔshiɛ wɔha obalaŋtai ni emɔ shi lɛ baaha ahere obalaŋtai pii ayiwala, kɛha Yehowa yijiemɔ.