Kpee Gbi Krɛdɛɛ He Gbɛjianɔtoo Hee

¹ Gbɔmɔ ni Fe Mɔ Fɛɛ Mɔ ni Ehi Shi Pɛŋ ni wɔkase lɛ eha wɔhiɛ esɔ Yesu Kristo waa. Kpee gbi krɛdɛɛ he gbɛjianɔtoo ni jeɔ shishi nyɔŋ nɛɛ nɔ lɛ baatsu saneyitso ni ji “Gbɔmɔ Wulu ni Fee Nɔkwɛmɔ nɔ Kɛha wɔ lɛ Sɛɛ ni Wɔɔnyiɛ Kpaakpa” lɛ he nii yɛ gbɛ ni ja nɔ, koni eye ebua wɔ ni wɔnu nɔ ni esɛɛ ni wɔɔnyiɛ lɛ tsɔɔ lɛ shishi babaoo kɛmɔ shi.

² Abaawo mɛi fɛɛ ni baaba kpee lɛ shishi lɛ hewalɛ koni amɛtamɔ Kristo babaoo, ni afii abɔ ni mɔ lɛ eye loo afii ni ekɛhi anɔkwale lɛ mli lɛ kɔɔɔ he eko. Gbɛjianɔtoo lɛ fã ko kɛ ŋaawoo baaha obalaŋtai lɛ titri. Ebaawula amɛ koni amɛdamɔ naagbai ni amɛkɛkpeɔ yɛ skul tsɔsemɔ mli, hiɛtserɛjiemɔ, kɛ heloonaa nibii asɛɛdii lɛ anaa. Abaaha wiemɔi, niiashikpamɔi, kɛ nɔkwɛmɔ nii ni baama bɔ ni abaafee aye hewalɛ ni je lɛ naa yɛ mɔ nɔ lɛ nɔ kunim lɛ nɔ mi koni mɔ lɛ akase Kristo jogbaŋŋ kɛmɔ shi.​—⁠1 Pet. 2:21.

³ Mɛi heei ni amɛjɔɔ amɛhe nɔ lɛ baana hegbɛ koni amɛjaje faŋŋ akɛ amɛji Kristo sɛɛnyiɛlɔi, kɛtsɔ baptisimɔ nɔ. Akɛ Ŋmalɛ mli sanegbaa ni kanyaa mɔ ni ekɔɔ sane lɛ he lɛ baaha kɛtsɔ baptisimɔ nifeemɔ lɛ hiɛ. Mɛi ni sumɔɔ ni abaptisi amɛ yɛ kpee gbi krɛdɛɛ lɛ shishi lɛ aha amɛ onukpai asɛinɔtalɔ lɛ ale oya nɔŋŋ koni enyɛ ena be ni fa koni eto gbɛjianɔ ni onukpai kɛ amɛ akwɛ sanebimɔi ni atsɔɔ kɛha mɛi ni abaabaptisi amɛ lɛ mli.

⁴ Kpokpaa wulu nɔ kwɛlɔ lɛ loo wielɔ ni afɔ lɛ nine lɛ kɛ wiemɔ titri ni yitso ji, “Gbɔmɔ Wulu ni Fee Nɔkwɛmɔ nɔ Kɛha wɔ lɛ Sɛɛ Ni Wɔɔnyiɛ​—⁠No Feemɔ kɛ Mɔ Yaa Mɛni Mli?” Kwɛmɔ ni ofɔ nine otsɛ mɛi fɛɛ ni yɔɔ he miishɛɛ lɛ kɛba nifeemɔ ni woɔ mɔ ekãa ni woɔ hemɔkɛyeli hewalɛ nɛɛ shishi. Gbɛ ni hi jogbaŋŋ loo sɛɛnamɔi babaoo jɛɔ mli baa ko kwraa bɛ ni abaanyɛ ana fe Gbɔmɔ Wulu ni Fee Nɔkwɛmɔ nɔ, Yesu Kristo lɛ sɛɛ ni wɔɔnyiɛ lɛ.​—⁠Mat. 19:​27-29.