Sɔɔmɔ Kpee Kɛha September
Otsi ni Jeɔ Shishi September 6
Lala 164
10 min: Asafoŋ adafitswai kɛ Adafitswai ni ahala kɛjɛ Wɔ Maŋtsɛyeli Sɔɔmɔ mli.
20 min: Nyɛwajea Nyɛbii lɛ kɛha Skul. Wiemɔ ni sanebimɔi kɛ nɔkwɛmɔ nɔ fata he. Kristofoi obalaŋtai kɛ saji ni mli wawai pii kpeɔ ŋmɛnɛ ni shiɛlɔi babaoo ni yɔɔ asafo lɛ mli lɛ leee. Titri lɛ fɔlɔi ji mɛi ni esa akɛ amɛle nɛkɛ naagbai nɛɛ ahe saji jogbaŋŋ bɔni afee ni amɛwaje amɛbii lɛ ni amɛnyɛ amɛtsu emuuyeli mlihiɛmɔ he kaai sɔrɔtoi ni amɛkɛkpeɔ lɛ ahe nii. Bi obalaŋtai etɛ komɛi ni esoro afii ni amɛteŋ mɔ fɛɛ mɔ eye lɛ saji. Mɛni ji nɔnyɛɛi loo naagbai pɔtɛɛ ni baa yɛ skul lɛ ekomɛi ni esa akɛ amɛkɛkpe daa gbi? Mɛni yeɔ ebuaa amɛ koni amɛhiɛ amɛkɛ Yehowa teŋ wekukpaa kpakpa mli? Ha weku ko ni miisusu saji ni yɔɔ Skul wolo bibioo lɛ kukuji 2 kɛ 3 ni yɔɔ baafa 11 lɛ mli lɛ afee he nɔkwɛmɔ nɔ ko amɛtsɔɔ. Gbekɛbii lɛ ha ale akɛ ayeɔ amɛhe fɛo, ni etamɔ nɔ ni atsiɔ he kɛjɛɔ amɛhe yɛ Biblia mli jeŋba tɛi ni nɔ kwɔlɔ ni amɛdiɔ sɛɛ lɛ hewɔ. Weku yitso lɛ wo gbekɛbii lɛ hewalɛ kɛtsɔ miishɛɛ ni ejie lɛ kpo yɛ nɔkwɛmɔ nɔ kpakpa ni gbekɛbii lɛ feɔ lɛ nɔ, ni ekai amɛ akɛ Yehowa yɛ amɛjeŋba lɛ he miishɛɛ waa. (Abɛi 27:11) Nyɛmi nuu ni tsuɔ enɛ he nii lɛ kɛba naagbee kɛtsɔ obalaŋtai ni yɔɔ asafo lɛ mli ni ejieɔ amɛyi yɛ amɛnitsumɔi kpakpai ahewɔ lɛ nɔ, ni ewo amɛ ŋaa koni amɛnyɛ amɛkɛ amɛfɔlɔi agba enɛɛmɛi ahe saji koni awaje amɛ yɛ mumɔŋ yɛ skulyaa afi nɛɛ mli.
15 min: “Mɛi Krokomɛi ni Wɔɔye Wɔbua ni Amɛyoo Ojarawatɛi Kpakpai.”
Akɛ sanebimɔ kɛ hetoohamɔ atsu enɛ he nii. Ye obuɔ asafo lɛ ni amɛhiɛ asɔ mumɔŋ ojarawatɛi ni wɔwoji lɛ ji lɛ, ni afi mli ni afee woji lɛ yɛ lɛ kɔɔɔ he eko. Okɛ ekaa awo mɛi fɛɛ hewalɛ ni amɛhe woji enyɔ lɛ kɛjɛ woji ahɔɔmɔ okpɔlɔ lɛ sɛɛ ejaakɛ kɛ amiaaa hiɛ ni nine ashɛ woji lɛ anɔ lɛ, anyɛŋ akɛha yɛ shiɛmɔ nitsumɔ lɛ mli hu. Be mli ni asusuɔ kuku 4 he lɛ, afee shiɛlɔ ni kɛ True Peace wolo lɛ miiha fɔlɔ ko lɛ he nɔkwɛmɔ nɔ.
Lala 108 kɛ naagbee sɔlemɔ.
Otsi ni Jeɔ Shishi September 13
Lala 112
10 min: Asafoŋ adafitswai. Akɛ shika he amaniɛbɔɔ kɛ onia ni atsu lɛ afata he. Ajie asafo lɛ yi yɛ shika gbɛfaŋ yelikɛbuamɔ ni amɛjɛ amɛtsui mli amɛkɛha asafo lɛ kɛ agbɛnɛ Asafo lɛ jeŋ muu fɛɛ nitsumɔ lɛ hewɔ.
10 min: “Okɛ Woji Tɛtrɛbii Atsu Nii ni Mɛi Krokomɛi Ana He Sɛɛ.” Wiemɔ kɛ nɔkwɛmɔ nɔ. Maa sɛɛnamɔ ni yɔɔ woji tɛtrɛbii memeji kɛ eheei lɛ ni akɛtsuɔ nii lɛ he lɛ nɔ mi. Ha afee nɔkwɛmɔ nii sɔrɔtoi enyɔ, ni akɛ wolo tɛtrɛɛ hee miitsu nii yɛ mli kɛ ekroko hu ni miitsɔɔ bɔ ni akɛ woji tɛtrɛbii memeji miitsu nii ni akɛtsu shiatsɛ lɛ hiamɔ nii pɔtɛɛ lɛ he nii.
15 min: “Mɛni Wɔbaatsu He Nii yɛ Sɔɔmɔ Afi Nɛɛ Mli?” Wiemɔ kɛ toibolɔi ni akɛaagba sane. Onukpai asɛinɔtalɔ lɛ atsu enɛ he nii. Tii asafo lɛ sɔɔmɔ afi ni ho lɛ mli nitsumɔ lɛ mli otsɔɔ ni owo mɛi fɛɛ hewalɛ ni amɛto gbɛjianɔ amɛtsu babaoo yɛ 1994 sɔɔmɔ afi lɛ mli.
10 min: “Nyɛkasea Obaanyɛ Ohi Shi kɛ Ekome ni Afee Kɛmiija woji lɛ.” Be mli ni okɛ toibolɔi esusu he sɛɛ lɛ, ha shiɛlɔ ko afee bɔ ni atsakeɔ Gbɔmɔ ni Fe Fɛɛ wolo lɛ kasemɔ ni ayakaseɔ Obaanyɛ Ohi Shi wolo lɛ he nɔkwɛmɔ nɔ.
Lala kɛ naagbee sɔlemɔ.
Otsi ni Jeɔ Shishi September 20
10 min: Asafoŋ adafitswai. Maa saji ni yɔɔ woji tɛtrɛbii heei lɛ ni akɛbaatsu nii yɛ otsi nɛɛ shiɛmɔ nitsumɔ lɛ mli lɛ nɔ mi. Agbɛnɛ nyɛgbaa sanebimɔ he ni hiɛ yitso akɛ “Gbɛgbalɔi ID Card” lɛ he sane.
20 min: “Ye Obua Gbɔmɛi ni Tamɔ Tooi lɛ ni Amɛtswa Amɛma Shishitoo ni Wa Nɔ,” Toibolɔi kɛ sanegbaa. Maa bɔ ni ehe hiaa ni asaa he kɛha sɛɛsaramɔi fɛɛ ni afeɔ lɛ nɔ mi. Ha shiɛlɔ ko ni he esa afee mɔ ko ni miisara mɔ ni kɛ hoo lɛ ehe wɔwoji ni wɔkɛhaa lɛ ekome he nɔkwɛmɔ nɔ, ni ekɛ nɔ ni ajie yi yɛ kuku 3 loo 5 lɛ miitsu nii.
15 min: “Shia Biblia mli Nikasemɔi ni Aaaje Shishi.” Sanebimɔ kɛ hetoo. Yɛ kuku 4 lɛ he susumɔ sɛɛ lɛ, feemɔ nɔkwɛmɔ nɔ ko ni yɔɔ mishɛɛ ni tsɔɔ sɛɛsaramɔ ni aafee ni akɛ Biblia lɛ pɛ miitsu nii, shi moŋ ni edamɔ Obaanyɛ Ohi Shi loo Reasoning wolo lɛ nɔ, taakɛ atsɔɔ mli lɛ.
Lala kɛ naagbee sɔlemɔ.
Otsi ni Jeɔ Shishi September 27
Lala 109
10 min: Asafoŋ adafitswai. Teokrase lɛ He Saji.
20 min: Nɛgbɛ Wɔsuɔlɔi ni Egboi lɛ Yɔɔ? Weku sanegbaa. Akɛ nikasemɔ ni ahala kɛjɛ Reasoning wolo lɛ mli baafai 98-100 lɛ atsu nii, ni weku yitso lɛ miisusu weku lɛ naanyo lɛ gbele he. Egbala jwɛŋmɔ kɛtee ebii lɛ ayelikɛbuamɔ nɔ koni amɛnu nɔ ni Biblia lɛ kɛɔ yɛ he lɛ shishi. Ebibii saji koni ekɛna kɛji amɛnuɔ nɔ ni gbele ji lɛ shishi lɛlɛŋ ni amɛnyɛ amɛjie amɛnaa yɛ faŋŋ mli yɛ afii ni amɛye lɛ naa. Agbɛnɛ, etsɔɔ amɛ bɔ ni amɛbaanyɛ amɛkɛ Reasoning wolo lɛ atsu nii kɛshɛje mɛi krokomɛi amii.
15 min: Akɛ Woji Tɛtrɛbii Aha Yɛ October. Too nɔkwɛmɔ nii sɔrɔtoi etɛ he gbɛjianɔ, ni akɛ Buu-Mɔɔ ni ba nyɛsɛɛ nɛɛ lɛ kɛ Awake! ni ba nyɛsɛɛ nɛɛ lɛ eko miitsu nii; afee eko ni shiatsɛ lɛ bɛ deka kwraa yɛ mli, eheee woji tɛtrɛbii ni akɛhaa lɛ eko moŋ shi ehe dɛhiɛmɔ wolo. Yɛ nɔkwɛmɔ nii sɔrɔtoi lɛ fɛɛ asɛɛ lɛ okɛ toibolɔi lɛ asusu nɔ hewɔ ni gbɛ ni atsɔ nɔ akɛha lɛ mɔɔ shi lɛ he. Abaanyɛ aha ashɛ woji tɛtrɛbii lɛ loo ni akɛ Mankind’s Search for God wolo lɛ aha, kɛ eeehi.
Lala 21 kɛ naagbee sɔlemɔ.