Mɛni Wɔbaatsu He Nii Yɛ Sɔɔmɔ Afi Nɛɛ Mli?
1 Akɛni afi 1994 sɔɔmɔ afi nɛɛ miije shishi yɛ September 1, hewɔ lɛ, amrɔ nɛɛ ji be ni sa akɛ wɔ fɛɛ akɛ Yehowa webii lɛ wɔha nɔ ni wɔsumɔɔ wɔtsu he nii akɛ aŋkroaŋkroi loo asafo kome yɛ sɔɔmɔ afi hee nɛɛ mli lɛ afee faŋŋ yɛ wɔjwɛŋmɔi amli.
2 Yaa nɔ Oda Yɛ Mumɔŋ: Kɛ wɔji mɛi ni kpaako wɔleɔ anɔkwale lɛ, no lɛ esa ni wɔfee mɛi ni sumɔɔ akɛ wɔhe aaawa yɛ hemɔkɛyeli lɛ mli. (Heb. 6:1-3) Kɛ wɔji mɛi ni yɔɔ ekaa momo yɛ mumɔŋ lɛ, belɛ jeee mɛi heei kɛ mɛi krokomɛi pɛ esa akɛ wɔye wɔbua, shi moŋ esa akɛ wɔ hu wɔsusu wɔmumɔŋ shidaamɔ lɛ he waa diɛŋtsɛ, ni ekafee wɔ akɛ wɔle Biblia mli anɔkwalei ni sa lɛ kɛ niiashikpamɔ ni sa yɛ Kristofonyo shihilɛ mli lɛ fɛɛ. Ani wɔsusuɔ daa gbi ŋmalɛ lɛ he, wɔkaneɔ Biblia lɛ taakɛ ato he gbɛjianɔ yɛ Theocratic Ministry School Schedule lɛ mli lɛ, ni wɔsaa wɔhe kɛhaa Asafo Woloŋnikasemɔ kɛ Buu-Mɔɔ Nikasemɔ lɛ fɛɛ? Enɛ ji oti ko ni kɛ hoo kwraa lɛ esa akɛ wɔ fɛɛ wɔshɛ he. Kɛ wɔɔje nibii agbɛjianɔtoo fɔŋ nɛɛ hiɛkpatamɔ lɛ mli ni abaa wɔyi kɛyabote Nyɔŋmɔ jalɛ jeŋ hee lɛ mli lɛ, no lɛ esa akɛ wɔya nɔ wɔdara yɛ mumɔŋ.—Okɛto Filipibii 3:12-16 he.
3 Hii Shi Akɛ Mɔ Ni He Tse Yɛ Mumɔŋ: Esa akɛ atsuu wɔhe yɛ “heloo kɛ mumɔ fɛɛ he muji mli,” bɔni afee ni wɔsa Yehowa hiɛ kwraa (2 Kor. 7:1) Akɛni wɔhe etse hewɔ lɛ, mɛni hewɔ ni wɔɔsaa “wɔkokolo” yɛ jeŋ momo ni ekpɔtɔ nɛɛ mli ‘ŋmɔtɔ’ lɛ mli ekoŋŋ? (Okɛto Petro 2:22 he.) Esa akɛ wɔtswa wɔfai shi akɛ wɔɔya nɔ wɔhi shi akɛ mɛi ni yɔɔ ekaa ni he tse yɛ mumɔŋ. Kɛkɛ lɛ wɔteŋ mɛi ni aŋɔ Satan gbɛi fɔji lɛ etee amɛ ni enine shɛ wɔnɔ, ni wɔgbee nɔshafeemɔ mli ni wɔlaaje Yehowa hiɛ duromɔ.—2 Kor 2:11.
4 Bo Ŋaawoo ni Nilee Yɔɔ Mli Toi: Abɛi 15:22 kɛɔ akɛ: “Kɛ ŋaawolɔi pii yɛ lɛ, amɛdamɔɔ shi shiŋŋ.” Shi kaimɔ akɛ, sɛɛ mli lɛ Salomo ni ji nuu ni wie nɛkɛ lɛ ŋmɛ gbɛ ni “eŋamɛi lɛ dɔ etsui kɛyanyiɛ nyɔŋmɔi krokomɛi asɛɛ” akɛni ebooo Nyɔŋmɔ ŋaawoo ákɛ akɛ maŋsɛɛ yei akɛbote gbalashihilɛ mli lɛ toi hewɔ. (1 Maŋ. 11:1-4) No hewɔ lɛ, kɛ wɔbooo ŋaawoo ni nilee yɔɔ mli toi akɛ aŋkroaŋkroi lɛ, te wɔɔfee tɛŋŋ wɔkpa gbɛ akɛ wɔhe aaasa ni wɔya hiɛ yɛ Yehowa sɔɔmɔ mli loo ni wɔto okadi kpakpa ni mɛi akase lɛ? (1 Tim. 4:15) Biblia mli ŋaawoo lɛ baaye ebua wɔ ni wɔbu wɔtsui he. (Abɛi 4:23) Ni wɔɔsumɔ nɔ ni Yehowa sumɔɔ, ni wɔnyɛ nɔ ni enyɛɔ, ni wɔya nɔ wɔtao egbɛtsɔɔmɔ ni wɔfee nɔ ni sa ehiɛ lɛ ji hebuu nibii diɛŋtsɛ.—Abɛi 8:13; Yoh. 8:29; Heb. 1:9.
5 Jamɔ ni wɔkɛhaa Yehowa lɛ bɛ kpɛŋŋ tamɔ nɔ ko ni tsɔne kudɔɔ, asaŋ ejeee jamɔ mli hetuu-kɛ-hamɔ ko ni tamɔ nɔ ni mɛi ni tsɛɔ amɛhe Kristofoi yɛ je lɛ mli lɛ feɔ lɛ, shi moŋ ekaa kɛ miishɛɛ yɛ mli ni ekɛ anɔkwale ni anaa yɛ Nyɔŋmɔ Wiemɔ lɛ mli lɛ kpaa gbee.—Yohane 4:23, 24.
6 Abaaka wɔfaishi ni wɔtswa akɛ wɔbaafee Nyɔŋmɔ suɔmɔnaa nii lɛ daa. Esa akɛ kaai ni tamɔ enɛɛmɛi ni baa “[wɔ]nyɛmimɛi asafo muu” lɛ fɛɛ nɔ lɛ he nilee kɛ agbɛnɛ nilee ni tsɔɔ akɛ Yehowa ji mɔ ni baawo wɔ hewalɛ lɛ awaje wɔ. (1 Pet. 5:9, 10 NW) Kɛkɛ lɛ wɔbaanyɛ wɔgbe wɔsɔɔmɔ lɛ naa kwraa yɛ 1994 sɔɔmɔ afi lɛ mli.—2 Tim. 4:5.