Ŋwɛi Nitsɔɔmɔ Naa Mɛi Anɔ Hewalɛ Waa
1 Kwɛ hegbɛ ni wɔna akɛ wɔnine aaashɛ nitsɔɔmɔ nɔ kɛaajɛ Ŋwɛinyo Lɛ, wɔ Bɔlɔ, Yehowa Nyɔŋmɔ ŋɔɔ! (Lala. 50:1; Yes. 30:20b) Ŋmɛnɛ, asafoi babaoo miiho yuu kɛmiijɛ jeŋmaji fɛɛ mli kɛmiiya ejamɔ krɔŋŋ gɔŋ lɛ nɔ koni etsɔɔ amɛ nii. (Mika 4:2) Akpekpei abɔ krokomɛi hu kɛ amɛhe woɔ skul sɔrɔtoi ni woɔ adesai asusumɔi kɛ jeŋ nilee nɔ lɛ amli. Shi nilee ni kuɔ ehiɛ eshwieɔ Yehowa kɛ e-Wiemɔ ni aŋma lɛ nɔ lɛ ji kwashiaiasane yɛ Nyɔŋmɔ hiɛ, ni mɛi ni nyiɛɔ enɛ sɛɛ lɛ leee nii.—Lala 14:1; 1 Kor. 1:25.
2 Wɔkpa hewalɛ ni ŋwɛi nitsɔɔmɔ yɔɔ lɛ shi yɛ gbɛ ni yɔɔ sɔrɔto kwraa nɔ yɛ wɔ kpokpaa wulu nɔ kpee ni ho lɛ shishi. Sane yitso ni ji “Ŋwɛi Nitsɔɔmɔ” lɛ je kpo yɛ wiemɔi ahe gbɛjianɔtoo lɛ fɛɛ mli. Wɔkase akɛ Nyɔŋmɔ Wiemɔ lɛ kɛ emumɔ lɛ feɔ wɔ ekome yɛ jeŋ muu fɛɛ nyɛmifeemɔ kuu lɛ mli, ejajeɔ wɔ su kɛ baŋ, ebuɔ wɔhe kɛjɛɔ daimonioi atsɔɔmɔi ahe, ni etsɔseɔ wɔ koni wɔfee sɔɔlɔi kpakpai. Te bo diɛŋtsɛ lɛ ona ŋwɛi nitsɔɔmɔ he sɛɛ oha tɛŋŋ?
3 Bɔ ni Esaa Kristofoi Ashihilɛ he Ehaa: Ŋwɛi nitsɔɔmɔ yeɔ buaa wɔ henileei ajajemɔ kɛ kudɔmɔ. Akɛ henilee fɔ mɔ fɛɛ mɔ, shi bɔni afee ni ekudɔ wɔ yɛ jalɛ gbɛ kɛ agbɛnɛ yɛ sɔɔmɔ ni saa Yehowa hiɛ lɛ mli lɛ, esa akɛ atsɔse lɛ. Gbɔmɛi ni yɔɔ je lɛŋ lɛ ejajeko loo amɛkudɔko amɛ susumɔi loo jwɛŋmɔi yɛ Nyɔŋmɔ Wiemɔ lɛ naa, ni yɛ enɛ hewɔ lɛ, amɛjwɛŋmɔ efutu ni amɛbɛ nɔmimaa yɛ nɔ ni ja kɛ nɔ ni ejaaa he. Bei kɛ ŋwanejeei miiya nɔ yɛ jeŋba kɛ subaŋi asaji ahe ejaakɛ mɔ fɛɛ mɔ maa nɔ mi akɛ ebaafee nɔ ni ja yɛ lɛ diɛŋtsɛ ehiɛ. Amɛteŋ mɛi ni fa sumɔɔ heyeli kwraa ni amɛkɛaakpɛ amɛyiŋ yɛ amɛ diɛŋtsɛ amɛshihilɛ mli. Amɛkpoo akɛ amɛaabo anɔkwa nilee jɛɛhe kome pɛ ni yɔɔ lɛ toi. (Lala 111:10; Yer. 8:9; Dan. 2:21) Shi ŋwɛi nitsɔɔmɔ ena saji ni tamɔ nɛkɛ he tsabaa kɛha wɔ, ni wɔhiɔ shi yɛ ekomefeemɔ mli akɛ Nyɔŋmɔ we, ejaakɛ lɛ etsɔɔ wɔ nii. Wɔkɛ hekɛnɔfɔɔ kwɛɔ wɔsɛɛ be kɛ henilee kpakpa, ni wɔkɛ wɔhe woɔ wɔ sɔɔmɔ nitsumɔ lɛ mli be fɛɛ be.
4 Ŋwɛi nitsɔɔmɔ yeɔ ebuaa wɔ ni wɔkũɔ “tsɔɔmɔ kɔɔyɔɔ fɛɛ tsɔɔmɔ kɔɔyɔɔ” naa. (Efe. 4:14, NW) Jeŋ nilee he nikasemɔ ni haa gbɔmɛi tsɔmɔɔ mɛi ni taoɔ tɔmɔ, ni amɛyiŋ feɔ amɛ kɔshikɔshi, ni woɔ mɔdɛŋ ni mɔ fɛɛ mɔ aaabɔ aha ehe lɛ he hewalɛ, ni kɛ mɔ yaa jeŋba fitemɔ mli lɛ efeee nɔ ni wɔnyaa he. Wɔnyaa Yehowa ni aaatsɔɔ wɔ nii lɛ he, ni enɛ haa wɔjeɔ awerɛho kɛ tsuiŋdɔlɛ ni mɛi pii tsɔɔ mli lɛ mli. Yehowa mlai kɛ ekaimɔi lɛ tamɔ ‘wiemɔ ko ni nyiɛ wɔ sɛɛ,’ ni miikɛɛ akɛ: “Gbɛ lɛ nɛ! Nyɛnyiɛa nɔ.!”—Yes. 30:21.
5 Wɔ Kpeei kɛ Sɔɔmɔ Nitsumɔ Lɛ: Wɔbuɔ Hebribii 10:23-25 akɛ famɔ ni jɛ Nyɔŋmɔ ŋɔɔ. Yehowa tsɔɔ wɔ nii yɛ asafoŋ kpeei ashishi. Ani nɔ ni wɔfɔɔ feemɔ ji kpeei ni wɔyaa daa, aloo wɔbuɔ kpeeiyaa akɛ nɔ ko ni he ehiaaa tsɔ? Kaimɔ akɛ, kpeei ni wɔ fɛɛ wɔɔya lɛ ji wɔ jamɔ lɛ fã. Esaaa akɛ abuɔ enɛ akɛ nɔ ni kɛ aasumɔ dani ayaa. Wɔnyɛŋ wɔha mumɔŋ niyenii ni Yehowa eto he gbɛjianɔ kɛha wɔ lɛ eko aje wɔsɛɛ.
6 Mose sɔle ebi Nyɔŋmɔ akɛ: “Tsɔɔmɔ wɔ wɔgbii lɛ kanemɔ, bɔni afee ni wɔna nilee tsui.” (Lala 90:12) Ani enɛ ji wɔ hu wɔ sɔlemɔ? Ani wɔhiɛ sɔɔ bɔ ni gbi fɛɛ gbi jara wa ha lɛ? Kɛ wɔfeɔ nakai lɛ, no lɛ “[wɔɔ]na nilee tsui” kɛtsɔ gbi fɛɛ gbi ni wɔɔtsu he nii yɛ gbɛ ni sɛɛnamɔ yɔɔ he lɛ nɔ, kɛwo wɔ Tsɔɔlɔ Kpeteŋkpele, Yehowa Nyɔŋmɔ hiɛ nyam. Ŋwɛi nitsɔɔmɔ baaye abua wɔ ni wɔfee nakai.