Shia-kɛ-shia Nitsumɔ lɛ ni Wɔkpaaa
1 Ashaa afɔlei daa gbi yɛ blema Israel. (2 Mose 29:38-42) Ashĩɔ la ni yɔɔ afɔleshaa latɛ lɛ nɔ lɛ koni eya nɔ etso; lasu ni kwɔɔ kɛyaa ŋwɛi lɛ “jeɔ ŋma” ni ehaa Yehowa naa miishɛɛ. (2 Mose 29:18) Awoɔ wɔ hewalɛ ŋmɛnɛ, koni “wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.” (Heb. 13:15) Ni wɔkɛ afɔlei ni Mla etsɔɔ lɛ aaatsu nii moŋ lɛ, wɔjáa Yehowa kɛtsɔɔ eyijiemɔ ni wɔkpaaa lɛ jajemɔ nɔ.—Yes. 43:21; Bɔf. 5:42.
2 Yesu Kristo, Odasefonyo kpele ni ebahi shikpɔŋ nɔ dã lɛ, tsɔɔ wɔ bɔ ni esa akɛ wɔtsu jamɔ krɔŋŋ he nii wɔha kɛtsɔ yijiemɔ afɔlei anɔ. Etsɔɔ ekaselɔi lɛ akɛ esa akɛ amɛkɛ oyaiyeli ashiɛ shɛɛ sane ni amɛhiɛ lɛ. Ele akɛ gbɛ ni mɔɔ shi fe fɛɛ ni atsɔɔ nɔ akɛ sanekpakpa lɛ haa mɛi ji ni akɛ mɛi lɛ aaawie aŋkroaŋkro yɛ amɛshiai amli. (Mat. 10:7, 12) No hewɔ lɛ wɔnaa akɛ bɔfoi lɛ nyiɛ eŋwɛi gbɛtsɔɔmɔi ni jɛ mumɔŋ lɛ sɛɛ koni amɛshiɛ yɛ shia-kɛ-shia.—Bɔf. 20:20.
3 Etamɔ ŋmɛnɛ pɛpɛɛpɛ. Akɛ Yesu kaselɔi lɛ, anɔkwa Kristofoi nyiɛɔ enɔkwɛmɔ nɔ lɛ sɛɛ kɛtsɔɔ sanekpakpa lɛ shiɛmɔ nɔ yɛ shia-kɛ-shia. Eyɛ mli akɛ abaanyɛ awie ashi wɔ ni awa wɔ yi yɛ no feemɔ mli moŋ, shi mɛi akpekpei abɔ ekase anɔkwale lɛ ni kaselɔi heei akpei ohai abɔ miifata asafo babaoo lɛ he daa afi, ni no yeɔ he odase akɛ enɛ ji gbɛ ni Yehowa tsɔɔ nɔ ekɛtsuɔ esuɔmɔnaa nii ahe nii. No hewɔ ni wɔfĩɔ shi yɛ wɔsɔɔmɔ nitsumɔ lɛ mli lɛ.
4 Sɛɛnamɔi ni Jɛɔ Shia-kɛ-shia Shiɛmɔ lɛ Mli Baa: “Nyɔŋmɔ jeee mɛi ahiɛaŋkwɛlɔ . . . Mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35) Ni wɔɔbote shia fɛɛ shia mli tɛɛ yɛ wɔ shikpɔŋkuku lɛ mli lɛ tsɔɔ faŋŋ akɛ wɔkwɛɛɛ mɛi ahiɛaŋ, ni wɔkɛ hegbɛ haa mɔ fɛɛ mɔ koni enu Maŋtsɛyeli shɛɛ sane lɛ daa. Yɛ nakai feemɔ mli lɛ mɛi ni boɔ toi lɛ anine shɛɔ yelikɛbuamɔ nɔ kɛhaa amɛ diɛŋtsɛ amɛhe taakɛ aŋkro fɛɛ aŋkro hiamɔ nii ji.
5 Shiɛlɔi fɛɛ, ni gbekɛbii, mɛi ni edara yɛ afii amli, ni mɛi heei po hu fata he lɛ, baanyɛ ni amɛkɛ amɛhe awo shia-kɛ-shia nitsumɔ lɛ mli. Mɔ fɛɛ mɔ baanyɛ ni ‘ekɛ naabu ajaje kɛyashɛ yiwalaheremɔ he’ yɛ nɛkɛ gbɛ nɔ. (Rom. 10:10) Ni wɔɔfata mɛi krokomɛi ahe ni wɔkɛ wɔhe awo shia-kɛ-shia sɔɔmɔ nitsumɔ lɛ mli lɛ feɔ wɔ fɛɛ ekome yɛ suɔmɔ kɛ ekomefeemɔ kpaa lɛ mli. Yɛ nakai beaŋ nɔŋŋ lɛ, akɛ hegbɛ haa wɔ koni wɔŋmɛ wɔtsui shi kɛ ebalɛ akɛ asumɔɔɔ wɔsane tsɔ loo ni wɔkɛ shitee-kɛ-woo kpe. Hemɔkɛyeli ni wɔjieɔ lɛ kpo yɛ faŋŋ mli nɛɛ haa wɔtsɔɔ “nikwɛmɔ nii” ni yeɔ ebuaa mɛi ni hiɛ tsui kpakpai lɛ koni amɛyoo akɛ wɔyɛ gbɛjianɔtoo ko kɛha Biblia mli nitsɔɔmɔ ni akɛ amɛbaanyɛ amɛna he sɛɛ. (1 Kor. 4:9) Nɔ fɛɛ nɔ tsɔɔ faŋŋ akɛ Yehowa miijɔɔ shia-kɛ-shia nitsumɔ lɛ nɔ ni ekɛmiitsu nii koni ekɛbua asafo babaoo lɛ anaa kɛba ejamɔ krɔŋŋ ‘we’ lɛ mli.—Yes. 2:2-4.
6 Ehe miihia ni mɛi anu Maŋtsɛyeli shɛɛ sane lɛ amrɔ nɛɛ fe bei fɛɛ ni eho yɛ yinɔsane mli. Nyɛhaa wɔyaa nɔ wɔshiɛa yɛ shia-kɛ-shia ni wɔkakpa kɛyashi be ni Yehowa aaakɛɛ akɛ efa. (Yes. 6:11) Kɛ wɔfee nakai lɛ, akɛ miishɛɛ ni jɛɔ shia-kɛ-shia sɔɔmɔ nitsumɔ ni he hiaa ni he baa sɛɛnamɔ ni wɔkɛ wɔhe woɔ mli yɛ naagbee be nɛɛ mli lɛ baawo wɔ nyɔmɔ.—1 Kor. 15:58.