Mɛi ni Yɔɔ He Miishɛɛ lɛ Ataomɔ Kɛtsɔ Gbɛjegbɛi Anɔ Odaseyeli ni Mɔɔ Shi Nɔ
1 Yesu tsɔɔ ekaselɔi lɛ koni amɛtao mɛi ni sa akɛ amɛnuɔ Maŋtsɛyeli lɛ he sanekpakpa lɛ. (Mat. 10:11) Shi, eefee nɔ ni wa yɛ hei pii ŋmɛnɛ akɛ aaaya mɛi aŋɔɔ yɛ amɛshiai amli. No hewɔ lɛ, mɛni abaanyɛ afee koni aya mɛi ni sa, ni nine shɛɛɛ amɛ nɔ lɛ aŋɔɔ?
2 Gbɛjegbɛi anɔ odaseyeli baanyɛ afee gbɛ ni mɔɔ shi ni aaatsɔ nɔ atao mɛi ni nine shɛɛɛ amɛ nɔ yɛ shia-kɛ-shia nitsumɔ lɛ mli lɛ. Wɔbaanyɛ wɔye odase yɛ gbɛjegbɛi anɔ yɛ bɔs shidaamɔ hei, shiai ni bulɔi buɔ he, maŋ shwɛmɔ hei, kɛ hei krokomɛi ni mɛi yatsuɔ amɛ daa gbi shihilɛi amli nii yɛ jɛmɛ lɛ.
3 Kɛ atsi gbɛjegbɛi anɔ odaseyeli ta lɛ, mɛi komɛi sheɔ gbeyei. Amɛaashashao shi akɛ amɛkɛ amɛhe aaawo nakai nitsumɔ lɛ mli ejaakɛ etamɔ nɔ ni amɛhiɛ miigbo loo amɛmiikpa gbɛ akɛ mɛi ni naa Maŋtsɛyeli shɛɛ sane lɛ he mlifu lɛ baatsi amɛhiɛ. Bei pii lɛ yeyeeye-feemɔi nɛɛ ji naajiemɔ ni bɛ mli. Mɛi ni he esa yɛ nɛkɛ nitsumɔ nɛɛ mli lɛ bɔɔ amaniɛ akɛ ejeee nɔ ko ni wa kwraa tamɔ bɔ ni odase ni ayeɔ yɛ shinaai anaa ji lɛ pɛpɛɛpɛ. Yɛ anɔkwale mli lɛ, amɛna akɛ bei pii lɛ anyɛɔ akɛ mɛi pii wieɔ yɛ gbɛjegbɛi anɔ yɛ yiŋtoi komɛi ahewɔ, ni mɛi komɛi baasumɔ waa akɛ amɛkɛ mɛi aaagba sane loo ni amɛaabo sane toi fe bɔ ni amɛaafee kɛ wɔtswa amɛshinaai. No hewɔ lɛ kɛ ‘wɔfee ekãa babaoo’ lɛ, wɔmii baashɛ wɔhe yɛ naakpɛɛ gbɛ nɔ.—1 Tes. 2:2.
4 Te aaafee tɛŋŋ atsu gbɛjegbɛi anɔ nitsumɔ lɛ jogbaŋŋ ni emɔ shi? Ehe miihia ni asaa he jogbaŋŋ. Kanemɔ woji tɛtrɛbii lɛ kɛtsɔ hiɛ, ni ohala wiemɔ oti kome loo enyɔ ni osusuɔ akɛ mɛi ni okɛkpeɔ lɛ baanyá he. Shiɛmɔ wiemɔ hiŋmɛitswaa 30 lɛ sa jogbaŋŋ. Akɛni oti lɛ ji akɛ akɛ mɛi krokomɛi akpe diɛŋtsɛ hewɔ lɛ, taomɔ he ko ni mɛi saŋŋ hoɔ yɛ daa. Eyɛ mli akɛ ebaafee nɔ ni awoɔ he ŋaa akɛ shiɛlɔ kroko aaafata ohe moŋ, shi bei pii lɛ nɔ ni hi fe fɛɛ ji ni nyɛtsu nii ni gbɛ saŋŋ aka nyɛteŋ. Shiɛlɔi ni damɔɔ he kome lɛ baanyɛ ni amɛkɛ amɛhe agba sane ni amɛkɛye be yɛ be mli ni amɛhaaa amɛjwɛŋmɔ ahi maŋbii lɛ ateŋ mɛi ni aaasumɔ akɛ amɛaabo Maŋtsɛyeli shɛɛ sane lɛ toi lɛ anɔ.
5 Ni ooodamɔ he kome ni ojie woji tɛtrɛbii lɛ okɛtsɔɔ kɛkɛ lɛ mɔɔɔ shi jogbaŋŋ tamɔ bɔ ni eeeji kɛ otsi obɛŋkɛ mɛi lɛ aŋkroaŋkro. Bɔɔ mɔdɛŋ ni okwɛ mɔ lɛ hiɛ tɛɛ. Jiemɔ miishɛɛ kpo, naanyobɔɔ su, ni otsu he nii tɛɛ be mli ni obɔɔ mɔdɛŋ ni oje sanegbaa shishi lɛ. Yɛ shihilɛi komɛi amli lɛ, ekolɛ ebaabi ni okɛ mɔ lɛ anyiɛ fioo yɛ be mli ni okɛ lɛ wieɔ lɛ. Kɛ eebo toi lɛ, okɛ woji tɛtrɛbii lɛ aha lɛ. Kɛ aheee woji tɛtrɛbii lɛ, obaasumɔ ni okɛ dɛhiɛmɔ wolo ko aha.
6 Bei pii lɛ nɔ ni hi fe fɛɛ ji ni okɛ shiɛmɔ wiemɔ kuku ko ni teeɔ sanebimɔ ko shi loo ni ekɛ wiemɔ ko ni baatee miishɛɛ shi lɛ aaasaa ohe. Kɛ akpɛlɛ nɔ yɛ gbɛ ni ja nɔ lɛ, bɔɔ mɔdɛŋ ni onine ashɛ mɔ lɛ gbɛi, edrɛs, kɛ ekolɛ etɛlefon nɔmba po nɔ koni onyɛ odi miishɛɛ lɛ sɛɛ. Obaanyɛ okɛɛ akɛ: “Kɛ ooosumɔ okase babaoo lɛ, no lɛ mana he miishɛɛ akɛ mabasara bo yɛ oshia loo ni mikɛ Odasefonyo kroko aaato gbɛjianɔ koni efee nakai.”
7 Onukpa ko ni kɛ ehe ewo gbɛjegbɛ nɔ odaseyeli mli lɛ bɛŋkɛ yoo ko ni ena ele akɛ enako hegbɛ pɛŋ akɛ ekɛ Odasefonyo ko aaagba sane yɛ eshia. Ehe wolo ko ni ekpɛlɛ nɔ akɛ aaatao nyɛmiyoo ko ni ebasara lɛ yɛ eshia yɛ be ni sa mli. Abaanyɛ ana mɛi ni sa lɛ babaoo lɛlɛŋ koni aye abua amɛ kɛ́ wɔgbɛjegbɛi anɔ odaseyeli lɛ mɔɔ shi.—Bɔf. 17:17.