Sanebimɔ He

◼ Mɛɛ jwɛŋmɔ esa akɛ wɔna yɛ nibii ni wɔkɛtsuɔ nii yɛ odaseyeli nitsumɔ lɛ mli lɛ ahe?

¹ Eyɛ mli akɛ Ŋmalɛ mli shiɛmɔ wiemɔ ko ni sa baanyɛ ahi jwɛŋmɔ mli moŋ, shi sanekpakpa shiɛlɔ ko baanyɛ afee mɔ ni esako ehe kɛji aawie nibii ni ekɛtsuɔ nii lɛ ahe. Ekolɛ beni edamɔ shinaa naa lɛ, ebɛ wolo ni akɛhaa yɛ nakai be lɛ mli lɛ. Ekolɛ woji tɛtrɛbii, woji bibii, kɛ dɛhiɛmɔ woji ni yɔɔ edaseyeli baagi lɛ mli lɛ ekuakuai loo etserɛtserɛi. Ekolɛ enyɛɛɛ ena he ni ekɛ pɛnsil loo shia kɛ shia kadimɔ wolo lɛ ewo ejaakɛ etoko ebaagi lɛ he gbɛjianɔ jogbaŋŋ. Ehe miihia ni osusu onibii lɛ ahe jogbaŋŋ dani ona shiɛmɔ nitsumɔ lɛ mli gbɛfaŋnɔ.

² Mɛɛ nibii esa akɛ ehi odaseyeli baagi ni ato he gbɛjianɔ jogbaŋŋ lɛ mli? Biblia he miihia. Okɛ shia kɛ shia kadimɔ woji lɛ ekomɛi awo mli. Kwɛmɔ akɛ oyɛ wolo ni akɛhaa yɛ nakai nyɔŋ lɛ mli lɛ. Woji tɛtrɛbii heei, kɛ agbɛnɛ dɛhiɛmɔ woji kɛ woji bibii ni ooona lɛ ahe miihia hu. Hiɛmɔ Reasoning wolo lɛ eko. Wɔ Maŋtsɛyeli Sɔɔmɔ hee ni obaahiɛ lɛ baaha oti shiɛmɔ wiemɔi ni atsɔɔ lɛ amli dani oya shinaa naa. Kɛ ootsu nii yɛ shikpɔŋkuku ko mli ni ekolɛ okɛ mɛi ni wieɔ maŋsɛɛ wiemɔ baakpe lɛ, ebaahi akɛ ooohiɛ Good News for All Nations wolo bibioo lɛ. Kɛ ohiɛ wɔ woji ni ato he gbɛjianɔ aha obalahii kɛ obalayei bibii lɛ eko lɛ, ebaaye ebua bo koni osaa ohe ni okɛ mɛi ni yeko afii nyɔŋmai enyɔ lɛ awie.

³ Esa akɛ oto nɔ fɛɛ nɔ ni akɛtsuɔ nii lɛ jogbaŋŋ fɛfɛo yɛ obaagi lɛ mli. No etsɔɔɔ akɛ esa ni ohiɛ baagi hee, shi esa akɛ ehe atse ni efee ekpakpa hu. Odaseyeli baagi ni oyɔɔ lɛ fata nibii ni okɛtsuɔ nii kɛjajeɔ sanekpakpa lɛ otsɔɔ lɛ ahe. Too he gbɛjianɔ jogbaŋŋ.