Okɛ Dɛhiɛmɔ Woji Agbɛ Sanekpakpa lɛ Ashwa
1. Te Nyɔŋmɔ webii kɛ dɛhiɛmɔ woji etsu nii eha tɛŋŋ?
1 Yehowa webii kɛ dɛhiɛmɔ woji (tracts) ni ajɛ Biblia mli aŋmala etsu nii kɛgbɛ sanekpakpa lɛ amɛshwa afii babaoo nɛ. Yɛ afi 1880 mli lɛ, C. T. Russell kɛ enanemɛi lɛ bɔi dɛhiɛmɔ woji (Bible Students’ Tracts) afeemɔ, ni amɛkɛ woji nɛɛ haa mɛi ni kaneɔ Buu-Mɔɔ lɛ koni amɛjara amɛha mɛi. Amɛbu dɛhiɛmɔ woji akɛ amɛhe hiaa waa aahu akɛ beni C. T. Russell kɛ nitsumɔ ko ni jeee shika akɛbaatao, shi moŋ akɛbaaha maŋtsɛyeli lɛ he nibii ashwere lɛ yaawo mla shishi yɛ afi 1884 lɛ, ekɛ wiemɔ “tract” ni ji dɛhiɛmɔ wolo lɛ fata nitsumɔ lɛ gbɛ́i lɛ he; no ji Zion’s Watch Tower Tract Society, ní amrɔ nɛɛ atsɛɔ lɛ Watch Tower Bible and Tract Society of Pennsylvania lɛ. Beni shɛɔ afi 1918 lɛ, Biblia Kaselɔi lɛ ejara dɛhiɛmɔ woji ni fa fe akpekpei 300. Dɛhiɛmɔ woji lɛ kã he amɛji woji ni akɛyeɔ odase ni mɔɔ shi jogbaŋŋ yɛ shiɛmɔ nitsumɔ lɛ mli.
2. Mɛni hewɔ dɛhiɛmɔ woji kɛ odaseyeli mɔɔ shi jogbaŋŋ lɛ?
2 Nɔ Hewɔ ni Ekɛ Odaseyeli Mɔɔ Shi Jogbaŋŋ Lɛ: Dɛhiɛmɔ woji lɛ yɛ fɛo, ni mɛi nyaa he. Saji ni yɔɔ mli lɛ faaa, ekanemɔ ŋɔɔ, ni nikasemɔ hu yɛ mli. Mɛi ni nyaaa Buu-Mɔɔ kɛ Awake! loo woji akanemɔ he lɛ po sumɔɔ ni amɛkane dɛhiɛmɔ woji lɛ. Dɛhiɛmɔ woji kɛhamɔ waaa, shiɛlɔi heei kɛ gbekɛbii po nyɛɔ amɛkɛhaa. Dɛhiɛmɔ woji lɛ yɛ bibii, ni amɛhiɛmɔ waaa.
3. Gbaa oniiashikpamɔ loo nɔ ni yɔɔ wɔwoji lɛ amli ni tsɔɔ bɔ ni dɛhiɛmɔ woji lɛ ahe yɔɔ sɛɛnamɔ.
3 Mɛi babaoo kaseɔ anɔkwale lɛ he nii klɛŋklɛŋ kwraa kɛtsɔ dɛhiɛmɔ woji anɔ. Akɛ nɔkwɛmɔ nɔ lɛ, yoo ko ni yɔɔ Haiti lɛ na wɔdɛhiɛmɔ woji lɛ eko yɛ gbɛjegbɛ lɛ nɔ. Ekɔ, ekane, ni ebo waa ekɛɛ, “Mina anɔkwale lɛ!” Sɛɛ mli lɛ etee Maŋtsɛyeli Asa lɛ nɔ, akɛ lɛ bɔi Biblia lɛ kasemɔ, ni abaptisi lɛ—enɛ fɛɛ jɛ Nyɔŋmɔ Wiemɔ lɛ mli hewalɛ ni yɔɔ dɛhiɛmɔ wolo lɛ mli lɛ hewɔ.
4. Mɛɛ oti esa akɛ wɔkɛma wɔhiɛ kɛ́ wɔkɛ dɛhiɛmɔ woji lɛ miiha yɛ nyɔɔŋ ko nɔ lɛ?
4 Shĩa kɛ Shĩa Shiɛmɔ: Akɛni anyɛɔ akɛ dɛhiɛmɔ woji lɛ yeɔ odase ni mɔɔ shi jogbaŋŋ hewɔ lɛ, yɛ be kɛ beaŋ lɛ no baafee woji ni akɛbaatsu nii yɛ nyɔɔŋ lɛŋ, abaaje shishi yɛ November. Jeee oti ni ma wɔhiɛ ji wɔkɛ dɛhiɛmɔ woji lɛ aha mɛi kɛkɛ, shi moŋ ní wɔkɛ dɛhiɛmɔ woji lɛ aje sanegbai ashishi. Kɛ́ gbi klɛŋklɛŋ ni wɔtee mɔ lɛ ŋɔɔ lɛ, ejie miishɛɛ kpo loo efee nakai beni wɔku wɔsɛɛ wɔyasara lɛ lɛ, wɔbaanyɛ wɔkɛ lɛ afee Biblia mli nikasemɔ he nɔkwɛmɔnɔ yɛ Biblia lɛ Tsɔɔ wolo lɛ loo wolo kroko mli. Te wɔbaafee tɛŋŋ wɔkɛ dɛhiɛmɔ woji lɛ aha yɛ shĩa kɛ shĩa? Esoro dɛhiɛmɔ wolo lɛ eko fɛɛ eko, no hewɔ lɛ esa akɛ wɔle nɔ ni wɔkɛbaaha lɛ mli sane jogbaŋŋ.
5. Mɛɛ gbɛ nɔ wɔbaatsɔ wɔkɛ dɛhiɛmɔ woji lɛ ahã yɛ shĩa kɛ shĩa?
5 Esa akɛ wɔhiɛkpamɔ wiemɔ lɛ akɔ shikpɔŋkuku lɛ kɛ dɛhiɛmɔ wolo ni wɔkɛhaa lɛ he. Wɔbaanyɛ wɔkɛ dɛhiɛmɔ wolo lɛ aha mɔ lɛ kɛje sanegbaa lɛ shishi. Bɔ ni wolo lɛ sɛɛ yɔɔ fɛo lɛ hu baanyɛ atee mɔ lɛ miishɛɛ shi. Aloo wɔbaanyɛ wɔkɛ dɛhiɛmɔ woji srɔtoi atsɔɔ mɔ lɛ koni wɔha ehala emli nɔ ni esumɔɔ. Aajie yi akɛ kɛ́ dɛhiɛmɔ woji lɛ eko yɛ wiemɔ ni wɔsafo lɛ kɛfeɔ kpee lɛ mli lɛ, wɔkɛ no atsu nii. Kɛ́ dɛhiɛmɔ wolo lɛ saneyitso lɛ ji sanebimɔ lɛ, wɔbaanyɛ wɔbi mɔ lɛ koni etsɔɔ ejwɛŋmɔ yɛ he. Aloo wɔ diɛŋtsɛ wɔbaanyɛ wɔbi sane ko ni baatee mɔ lɛ miishɛɛ shi kɛha sanegbaa. No sɛɛ lɛ, wɔbaanyɛ wɔkɛ mɔ lɛ akane dɛhiɛmɔ wolo lɛ fã ko, koni kɛ́ wɔshɛ he ni sanebimɔ yɔɔ lɛ, wɔha etsɔɔ ejwɛŋmɔ yɛ he. Wɔbaanyɛ wɔkane ŋmalɛi titrii ni yɔɔ wolo lɛ mli lɛ kɛjɛ Biblia lɛ mli. Beni wɔkɛ mɔ lɛ esusu emli saji lɛ ekomɛi ahe sɛɛ lɛ, wɔbaanyɛ wɔmu sanegbaa lɛ naa koni wɔkɛ lɛ ato gbɛjianɔ ni sa jogbaŋŋ kɛha sɛɛkuu-kɛsaramɔ. Kɛ́ nyɛsafo lɛ shiɔ woji yɛ mɛi ni bɛ shĩa lɛ ashinaai anaa, ni mɔ lɛ bɛ shĩa lɛ, nyɛbaanyɛ nyɛshi dɛhiɛmɔ wolo lɛ eko yɛ he ni ebaana.
6. Te wɔbaafee tɛŋŋ wɔkɛ dɛhiɛmɔ woji lɛ aye odase yɛ gbɛjegbɛi anɔ?
6 Gbɛjegbɛ Nɔ Odaseyeli: Ani okɛ dɛhiɛmɔ woji lɛ eye odase yɛ gbɛjegbɛi anɔ pɛŋ? Mɛi ni hoɔ yɛ gbɛjegbɛi anɔ lɛ ekomɛi bɛ dekã ni amɛkɛaadamɔ shi koni amɛkɛ wɔ agba sane. Ebaawa akɛ wɔbaale kɛji amɛyɛ wɔsane lɛ he miishɛɛ lo. Nɔ najiaŋ ni wɔbaaha amɛ Buu-Mɔɔ loo Awake! heei lɛ eko ní wɔleee kɛji amɛbaakane lɛ, mɛni hewɔ wɔhaaa amɛ dɛhiɛmɔ wolo moŋ? Akɛni dɛhiɛmɔ wolo lɛ sɛɛ yɛ fɛo ni emli sane lɛ faaa hewɔ lɛ, mɛi baasumɔ ni amɛle emli sane, ni no baatsirɛ amɛ koni amɛkane kɛ́ amɛná minitii fioo. Kɛlɛ, kɛ́ amɛyeee oyai lɛ, wɔbaanyɛ wɔkɛ amɛ asusu dɛhiɛmɔ wolo lɛ mli saji lɛ ekomɛi ahe.
7. Gbaa niiashikpamɔ ni tsɔɔ bɔ ni akɛ dɛhiɛmɔ woji yeɔ odase beni anyiɛɛɛ shiɛmɔ nɔ.
7 Odase ni Ayeɔ Beni Anyiɛɛɛ Shiɛmɔ Nɔ: Ewaaa ákɛ akɛ dɛhiɛmɔ woji baaye odase beni anyiɛɛɛ shiɛmɔ nɔ. Nyɛmi nuu ko kɛ fioo komɛi woɔ ekotoku mli be fɛɛ be ni eshiɔ shĩa. Kɛ́ ekɛ mɔ ko kpe, ekolɛ tamɔ mɔ ko ni miitsu nii yɛ shwapo mli nɛkɛ lɛ, ekɛɔ mɔ lɛ akɛ ebaasumɔ ni eha lɛ nɔ ko ni ekane, kɛkɛ lɛ eha lɛ dɛhiɛmɔ wolo lɛ eko. Beni gbalashihilɛ mli hefatalɔi ko tee shisharamɔ yɛ New York City lɛ, amɛyɔse akɛ amɛkɛ mɛi ni jɛ maji srɔtoi anɔ baakpe. Enɛ ha amɛkɛ wolo bibioo ni ji Nations lɛ kɛ dɛhiɛmɔ woji yɛ wiemɔi srɔtoi amli tee. No hewɔ lɛ, kɛ́ amɛnu akɛ gbɛjegbɛ he nihɔɔlɔ ko, mɔ ko ni ta paaki lɛ he ko, loo mɔ ko ta niyelihe ko miiwie wiemɔ kroko lɛ, amɛhaa mɔ lɛ dɛhiɛmɔ wolo yɛ emaŋ wiemɔ mli.
8. Mɛɛ shishinumɔ naa abaanyɛ akɛɛ akɛ dɛhiɛmɔ woji lɛ tamɔ dũmɔwui?
8 ‘Dũ Odũmɔwui Lɛ’: Abaanyɛ akɛ dɛhiɛmɔ woji lɛ ato wui ni adũɔ lɛ ahe. Okwaafonyo gbɛɔ edũmɔwui eshwaa akɛni eleee emli nɔ ni baakwɛ ni eda lɛ hewɔ. Jajelɔ 11:6 lɛ kɛɔ akɛ: “Leebi lɛ dũ odũmɔnii lɛ, ni gbɛkɛ hu kaajie onine yɛ he; ejaakɛ oleee emli nɔ ni baahi, enɛ jio, enɛ jio, aloo ekolɛ enyɔ lɛ fɛɛ baahi pɛpɛɛpɛ jio.” No hewɔ lɛ, nyɛhaa wɔyaa nɔ wɔkɛ dɛhiɛmɔ woji ni amɛkɛ odaseyeli mɔɔ shi jogbaŋŋ nɛɛ ‘agbɛa nilee ashwãa.’—Abɛi 15:7.
[Wiemɔ ni akɔ ni akɛmiitsu ni yɔɔ baafa 3]
Akɛni anyɛɔ akɛ dɛhiɛmɔ woji lɛ yeɔ odase ni mɔɔ shi jogbaŋŋ hewɔ lɛ, yɛ be kɛ beaŋ lɛ no baafee woji ni akɛbaatsu nii yɛ nyɔɔŋ lɛŋ, abaaje shishi yɛ November