Yaa nɔ Okɛɛ Akɛ: “Ba!”
1 Mɛɛ gbɛjianɔ ni yɔɔ nyam Yehowa eto kɛtsɔ Yesu kpɔmɔ afɔleshaa lɛ nɔ nɛkɛ! Wɔnaa nɔdaamɔ nɔ kɛha nibii fɛɛ ni he hiaa koni gbɔmɛi ana miishɛɛ lɛlɛŋ lɛ yɛ enɛ mli. (Yoh. 3:16) Shi, dɔlɛ sane ji akɛ, mɛi fioo pɛ ebale anɔkwale nɛɛ jogbaŋŋ ni amɛheɔ amɛyeɔ hu. Ni kɛlɛ, Yehowa ejɛ suɔmɔ ni eyɔɔ kɛha adesai lɛ mli eto gbɛjianɔ koni aha gbɔmɛi ale nɛkɛ sanekpakpa nɛɛ yɛ he fɛɛ he ni amɛyɔɔ. Etsɔ e-Bi, Yesu Kristo nɔ ekpã hegbɛ mli eha mɔ fɛɛ mɔ koni amɛna miishɛɛ kɛ naanɔ wala he hiɛnɔkamɔ —Yoh. 17:3.
2 Afii akpei abɔ ho, ni aleee Mɔ ni baakpɔ adesai kɛjɛ esha kɛ gbele mli lɛ he sane ko kwraa. No mli lɛ eji “teemɔŋ sane” krɔŋkrɔŋ aahu kɛbashi Kristo Yesu ba ni “ejie wala kɛ naanɔ shihilɛ kpo etsɔɔ wɔ yɛ sanekpakpa lɛŋ.” (Rom. 16:25; 2 Tim. 1:10) Yesu sɛɛnyiɛlɔi lɛ tsu nɛkɛ sanekpakpa nɛɛ Jajemɔ he nii yɛ klɛŋklɛŋ afi oha lɛ mli; amrɔ nɛɛ, wɔ mɛi ni wɔyɔɔ ŋmɛnɛŋmɛnɛ beaŋ nɛɛ yɛ hegbɛ ni nɔ kwɔ waa ni ji nɛkɛ sanekpakpa nɛɛ nɔŋŋ Jajemɔ. Kɛ wɔmiishiɛ Maŋtsɛyeli lɛ he sane lɛ, bele wɔkɛ Yehowa Nyɔŋmɔ, Yesu Kristo kɛ Kristo nyɛmimɛi ni fɔɔ gbɔmɛi ni jɛ shihilɛi fɛɛ mli nine lɛ miifee ekome kɛmiikɛɛ: ‘Ba! . . . baayɛ wala nu lɛ yaka.’—Kpoj. 22:17.
3 Shi kɛlɛ, Jeee mɔ fɛɛ mɔ baabo nɛkɛ sanekpakpa nɛɛ toi. Mɛi fioo ko pɛ feɔ toiboo. Mɛi komɛi kɛ kuɛŋtimɔ kpooɔ Nyɔŋmɔ tsuji, mɛi ni fɔ́ɔ amɛ nine koni anɔkwale nui ni haa wala lɛ he aba sɛɛnamɔ kɛha amɛ lɛ. Ni kɛlɛ, akɛni wɔnaa hewalɛ kɛjɛɔ Yehowa ŋɔɔ hewɔ lɛ. wɔmiaa wɔhiɔ yɛ nitsumɔ nɛɛ mli. Wɔle akɛ wɔsuɔmɔ mli ni wɔjeɔ wɔwieɔ anɔkwale lɛ koni wɔkɛye wɔbua mɛi fɛɛ ni baabo toi lɛ saa Yehowa hiɛ ni ehaa wɔnaa edɛŋ jɔɔmɔi.
4 Yɛ wɔsɔɔmɔ lɛ mli yɛ April mli lɛ, wɔbaawɔ mɛi fɛɛ ni taoɔ anɔkwale lɛ hewalɛ ni amɛkane Kpojiemɔ Naagbee wolo lɛ koni amɛmii afili amɛ yɛ hiɛnɔkamɔ ni ekɛhaa lɛ mli. Amɛbaana jɔɔmɔi babaoo kɛjɛ nakai feemɔ mli. Ejaakɛ, Kpojiemɔ wolo lɛ wieɔ wɔsɛɛ be he—amɛ wɔsɛɛ be kɛ wɔ hu wɔnɔ. Mɛi ni amrɔ nɛɛ amɛji Yehowa tsuji ni ejɔɔ amɛhe nɔ amɛha lɛ lɛ ateŋ mɛi komɛi baná anɔkwale lɛ he miishɛɛ beni amɛkane Kpojiemɔ wolo lɛ mlitsɔɔmɔi yɛ Asafo lɛ woji amli lɛ sɛɛ. Akɛni kɛjɛ be mli ni wɔnine shɛ Kpojiemɔ Naagbee wolo lɛ nɔ nɛɛ, be saŋŋ eshwie mli hewɔ lɛ, wɔbaanyɛ wɔna bɔ ni ehe hiaa waa kɛha mɛi ni yɔɔ jalɛ tsui, ni anɔkwale lɛ he hɔmɔ yeɔ amɛ lɛ. Beni wɔkɛ gbɔmɛi nɛɛ kpeɔ yɛ wɔsɔɔmɔ lɛ mli lɛ, wɔbaabɔ mɔdɛŋ ni wɔma oti kome loo enyɔ nɔ mi wɔha amɛ kɛjɛ Kpojiemɔ Naagbee wolo lɛ mli ni wɔtsɔɔ amɛ bɔ ni ehe yɔɔ sɛɛnamɔ hu. Kɛfata he lɛ, wɔbaanyɛ wɔgbala amɛjwɛŋmɔ kɛya bɔ ni etsɔɔ Biblia gbalɛi ni eba mli yɛ afii ohai 20 nɛɛ mli lɛ mli faŋŋ Iɛ hu nɔ, tamɔ mfoniri-feemɔŋ okpɔŋɔ nɔtaralɔi lɛ okpɔŋɔ nɔtamɔ ni awie he yɛ Kpojiemɔ yitso ekpaa lɛ mli lɛ nɛkɛ.
5 Esa jogbaŋŋ diɛŋtsɛ akɛ wɔɔwie gbɛjianɔ ni Yehowa ejɛ suɔmɔ mli eto eha adesai lɛ he beni wɔsaa wɔhe koni wɔye Kristo gbele lɛ Kaimɔ yɛ April 6. Ni kɛji gbɔmɛi lɛ hala akɛ amɛaabo toi jio, amɛbooo toi jio, wɔbaaya nɔ yɛ nitsumɔ ni Nyɔŋmɔ kɛha wɔ lɛ mli koni wɔkpa ninefɔɔ ni jɛ miishɛɛ mli lɛ mli wɔha mɔ fɛɛ mɔ ni sumɔɔ lɛ akɛ: ‘Ba! . . . baayɛ wala nu lɛ yaka.’