Ye Obua Mɛi Krokomɛi Koni Amɛná Nyɔŋmɔ Maŋtsɛyeli Mli Jɔɔmɔi Wuji Lɛ
1 “Kingdom Come” wolo lɛ he hiɛkpamɔ wiemɔ lɛ fã ko kɛɛ: “Wɔhiɛ ka nɔ akɛ wolo nɛɛ baaye abua bo ni obɔ mɔdɛŋ ni ona jɔɔmɔi ni yɔɔ nyam ni Maŋtsɛyeli lɛ kɛbaaha adesai yɛ shikpɔŋ nɛɛ nɔ lɛ amli gbɛfaŋnɔ.” Bɔni afee ni wɔye wɔbua ni mɛi krokomɛi anine ashɛ oti ni yɔɔ yiteŋgbɛ lɛ nɔ lɛ, ehe miihia ni wɔfee sɛɛsaramɔi yɛ mɛi ni jie miishɛɛ kpo amɛtsɔɔ lɛ anɔ.
2 Ekolɛ obaatsa sanegbaa ni kɔɔ bɔ ni Maŋtsɛyeli lɛ ji nɔ ni yɔɔ diɛŋtsɛ lɛ he lɛ nɔ kɛtsɔ enɛ kɛɛmɔ nɔ:
◼ “Beni miba nyɛsɛɛ ko lɛ, wɔkɛ sanebimɔ ni ji: ‘Te Maŋtsɛyeli lɛ ji nɔ ni yɔɔ diɛŋtsɛ ha tɛŋŋ?’ lɛ kpe. Sanebimɔ ni ja jogbaŋŋ nɛ, akɛni mɛi babaoo heee amɛyeee akɛ eyɛ diɛŋtsɛ, shi moŋ amɛbuɔ lɛ akɛ eji tsuiŋ mumɔŋ shihilɛ ko lɛ hewɔ. Mɛni ji ojwɛŋmɔ yɛ he amrɔ nɛɛ yɛ naagbee sane ni wɔgba lɛ sɛɛ? [Ŋmɛɛ gbɛ ni ewie.] Okɛ mlihilɛ agbele owolo lɛ baafa 8 kɛha saneyitso nɛɛ he sanegbaa kroko.” Ha ekane kuku 6. Nyɛgbaa sanebimɔ lɛ he sane ni nyɛyaa nɔ nyɛsusua kukuji 7-8 lɛ he. Wo shiatsɛ lɛ hewalɛ ni egbe baafai etɛ ni nyiɛ sɛɛ lɛ kanemɔ naa. Tsɔɔmɔ shia Biblia mli nikasemɔ he gbɛjianɔ ni ato ni aheee nɔ ko lɛ mli, ni oto gbɛjianɔ kɛha nikasemɔ lɛ nɔtsamɔ.
3 Kɛ oku osɛɛ otee koni oyatsɔɔ bɔ ni Maŋtsɛyeli lɛ kɛ adesai anaagbai anaa tsabaa baaba lɛ, obaanyɛ okɛɛ:
◼ “Beni wɔgba sane nyɛsɛɛ ko lɛ, wɔna akɛ mɛi ni hiɛ jwɛŋmɔ ni ja lɛ miisumɔ ni amɛna nɔyeli kpakpa ni baanyɛ ekɛ wɔ naagbai anaa tsabaa aba. Miwo shi akɛ maba oŋɔɔ ekoŋŋ ni mibatsɔɔ bo nɔ hewɔ ni wɔkɛɔ akɛ Nyɔŋmɔ Maŋtsɛyeli lɛ ji nakai nɔyeli lɛ. Ha wɔsusu enɛ he yɛ owolo lɛ baafai 24-6 lɛ amli.” Kanemɔ ni nyɛsusu kuku 8 ni hiɛ yitso bibioo ni ji “Jeŋ Muu Fɛɛ Paradeiso” lɛ he. Feemɔ nakai nɔŋŋ yɛ kukuji 9-12 lɛ gbɛfaŋ. No sɛɛ lɛ tĩi saji otii lɛ ekomɛi amli kɛtsɔ akrabatsa ni yɔɔ baafa 25 lɛ he susumɔ nɔ. Too gbɛjianɔ ni oba ekoŋŋ ni nyɛsusu saneyitso lɛ mli saji ni eshwɛ lɛ ahe.
4 Kɛ oku osɛɛ otee koni nyɛyatsa sanegbaa ni kɔɔ nɔ hewɔ ni etamɔ nɔ ni Maŋtsɛyeli lɛ etsɛ lɛ he lɛ, nyɛbaanyɛ nyɛsusu sane he nɛkɛ:
◼ “Efeko Nyɔŋmɔ yiŋtoo pɛŋ akɛ eeeŋmɛ efɔŋ feemɔ gbɛ kɛya naanɔ. Yɛ no najiaŋ lɛ, dani e-Maŋtsɛyeli ni ewo shi yɛ he lɛ aaaba ni ebajaje nibii lɛ, esa akɛ ana saji komɛi ni atee lɛ shi yɛ enɔyeli lɛ he lɛ naa. Atsɔɔ saji nɛɛ amli yɛ owolo lɛ yitso 5 lɛ mli.” Klɛŋklɛŋ lɛ, gbelemɔ baafa 44 kɛha saji otii ni he hiaa lɛ anaamuamɔ. No sɛɛ lɛ nyɛkaa nikasemɔ lɛ mli kukuji 1-3 kasemɔ nyɛkwɛa. Too gbɛjianɔ ni oku osɛɛ oya kɛha nikasemɔ lɛ nɔtsamɔ yɛ be kroko mli.
5 Kɛ atsɔɔ miishɛɛ yɛ wolo lɛ hei ni afee mfonirii yɛ lɛ, obaanyɛ otsa sanegbaa lɛ nɔ kɛtsɔ enɛ kɛɛmɔ nɔ:
◼ “Beni miba nyɛsɛɛ ko lɛ, mikɛ wolo lɛ mli mfonirii komɛi tsɔɔ bo ni mikɛtsɔɔ nibii kpakpai komɛi ni Nyɔŋmɔ Maŋtsɛyeli lɛ baatsu he nii eha wɔ lɛ mli. Ebaahi akɛ wɔɔsusu shiwooi nɛɛ ahe yɛ Ŋmalɛi lɛ amli kɛtsɔ wolo nɛɛ kɛ nitsumɔ nɔ.” Nyɛsusua yitso 1 lɛ mli kukuji 1-5 lɛ kɛ akrabatsa ni yɔɔ baafa 7 lɛ hu he.
6 Ato “Kingdom Come” wolo lɛ he gbɛjianɔ kɛha nikasemɔ, ni wɔbaanyɛ wɔye omanye yɛ nikasemɔi heei babaoo ni wɔɔje shishi lɛ mli kɛ wɔtsɔ sɔlemɔ nɔ wɔkɛ ŋaawoi ni yɔɔ yiteŋgbɛ lɛ tsu nii. Yehowa ajɔɔ mɔdɛŋ ni wɔbɔɔ yɛ anɔkwayeli mli koni wɔkɛ wolo nɛɛ atsu nii kɛha eyijiemɔ lɛ nɔ.