“Enɛ Ji Naanɔ Wala Lɛ”
1 Esa akɛ abu Yesu wiemɔi ni aŋma yɛ Yohane 17:3 lɛ akɛ eji hiɛdɔɔ sane. Ele nɔ ni ekɛɔ lɛ—Nyɔŋmɔ kɛ Kristo he nilee ni aaaná lɛ tsɔɔ naanɔ wala! Shi ani Yehowa kɛ Yesu he nilee ni wɔyɔɔ lɛ kɛkɛ nɔ abaatsɔ ni akɛ naanɔ wala awo wɔ nyɔmɔ? Dabi. Israelbii lɛ le akɛ Yehowa ji amɛ Nyɔŋmɔ, shi amɛshihilɛ gbɛ ejieee nakai hemɔkɛyeli lɛ kpo etsɔɔɔ. Nɔ ni jɛ mli ba ji, amɛlaaje ehiɛ duromɔ. (Hosh. 4:1, 2, 6) Ŋmɛnɛ lɛ, ekolɛ gbɔmɛi akpekpei abɔ “ahiɛ dɔɔ yɛ Nyɔŋmɔ he moŋ; shi jeee yɛ anɔkwa nilee naa.” (Rom. 10:2, NW) Ehe miihia ni amɛbale Yehowa, “anɔkwa Nyɔŋmɔ kome lɛ,” koni amɛkase bɔ ni amɛaafee amɛsɔmɔ lɛ jogbaŋŋ. No hewɔ lɛ, yɛ November mli lɛ, wɔkɛ Nilee Ni Kɛ Mɔ Yaa Naanɔ Wala Mli wolo lɛ baatsu nii. Mɛɛ gbɛ nɔ obaatsɔ ni okɛ Nilee wolo lɛ aha? Naa gbɛtsɔɔmɔi komɛi ni baanyɛ aye abua bo.
2 Akɛni shihilɛ kɛmiiya naanɔ yɛ shikpɔŋ nɔ he jwɛŋmɔ lɛ ji nɔ̃ hee kɛha mɛi pii hewɔ lɛ, ekolɛ hiɛkpamɔ wiemɔ nɛɛ baatee amɛ miishɛɛ shi:
◼ “Wɔmiibi wɔkutsoŋbii lɛ sane ko. Kɛ afɔ nine atsɛ bo akɛ obahi shi kɛya naanɔ yɛ jeŋ ni tamɔ nɛkɛ mli lɛ, ani obaakpɛlɛ ninefɔɔ lɛ nɔ? [Okɛ mfoniri ni yɔɔ Nilee wolo lɛ baafai 4-5 lɛ atsɔɔ lɛ. Ŋmɛɛ gbɛ ni ewie.] Enɛ baanyɛ afee oniiashikpamɔ ni yɔɔ miishɛɛ diɛŋtsɛ yɛ shihilɛ mli. Shi mɛni osusuɔ akɛ ebaabi ni ofee, koni eba mli anɔkwale kɛha bo? [Ŋmɛɛ gbɛ ni ewie.] Kadimɔ nɔ ni ebiɔ akɛ afee taakɛ Yohane 17:3 tsɔɔ lɛ. [Kanemɔ.] Nɛkɛ wolo nɛɛ miiye kɛmiibua gbɔmɛi babaoo koni amɛna nilee krɛdɛɛ ni tamɔ nɛkɛ. Ani obaasumɔ ni ona bo diɛŋtsɛ onɔ̃ koni okane? [Ŋmɛɛ gbɛ ni ewie.] Kɛ mibasara bo be kroko lɛ, wɔbaanyɛ wɔgba nɔ hewɔ ni nilee yɔɔ mli akɛ wɔɔhe wɔye akɛ wɔnine baanyɛ ashɛ naanɔ wala nɔ yɛ biɛ yɛ shikpɔŋ nɛɛ nɔ lɛ he sane.”
3 Kɛ oku osɛɛ otee koni oyasara mɛi ni okɛ amɛ gba Yohane 17:3 lɛ he sane lɛ aŋɔɔ lɛ, obaanyɛ otsa nɔ nɛkɛ:
◼ “Beni mibasara bo nyɛsɛɛ ko lɛ, mikane Yesu wiemɔi ni haa mɔ mii shɛɔ ehe waa ni anaa yɛ Yohane 17:3 lɛ, he ni ema nɔ mi eha wɔ yɛ akɛ Nyɔŋmɔ kɛ ehe nilee ni wɔɔna lɛ tsɔɔ naanɔ wala lɛ. Shi mɛi babaoo heɔ yeɔ akɛ ŋwɛi pɛ abaanyɛ ana shihilɛ kpakpa yɛ. Te onuɔ he ohaa tɛŋŋ? [Ŋmɛɛ gbɛ ni ewie.] Kɛ ohiɛ wolo ni mishi miha bo lɛ, masumɔ ni matsɔɔ bo Biblia mli kukuji komɛi ni tsɔɔ akɛ, esa akɛ akɛ Paradeiso aba shikpɔŋ nɔ ekoŋŋ lɛ. [Nyɛsusua kukuji 11-16 ni yɔɔ Nilee wolo lɛ baafai 9-10 lɛ he.] Kɛ mibasara bo be kroko lɛ, masumɔ ni matsɔɔ bo nɔ hewɔ ni obaanyɛ okɛ ohiɛ afɔ shiwoi nɛɛ ni anaa yɛ Biblia lɛ mli lɛ nɔ lɛ. Shi amrɔ nɛɛ, ekolɛ obaanyɛ okane yitso 2 yɛ owolo lɛ mli.”
4 Naa shiɛmɔ wiemɔ ko ni ekolɛ obaasumɔ ni okɛ mɛi ni sumɔɔ jamɔ lɛ asusu he:
◼ “Wɔkɛ wɔkutsoŋbii miigba nɔ hewɔ ni jamɔi sɔrɔtoi babaoo yɔɔ je lɛ mli lɛ he sane. Aaafee jamɔi sɔrɔtoi 6,000 yɔɔ Afrika pɛ, ni nɔ ni fa fe 10,000 yɔɔ jeŋ muu lɛ fɛɛ. Ni kɛlɛ, Biblia kome pɛ yɔɔ. Yɛ ojwɛŋmɔ naa lɛ, mɛni hewɔ yiŋfutumɔ ni jamɔi kɛbaa nɛɛ yɔɔ shihilɛ mli? [Ŋmɛɛ gbɛ ni ewie. Gbelemɔ Nilee wolo lɛ yitso 5, ni okane kuku 1.] Obaaná nakai sanebimɔi lɛ ahetoo ni haa mɔ tsui nyɔɔ emli lɛ kɛtsɔ yitso nɛɛ kanemɔ nɔ. Ebaafee mi miishɛɛ akɛ mashi wolo lɛ maha bo.” Too gbɛjianɔ kpakpa ni oku osɛɛ oba, ni okɛɛ: “Kɛ miba ekoŋŋ lɛ, ekolɛ wɔbaanyɛ wɔsusu kɛji jamɔi fɛɛ ji gbɛi sɔrɔtoi kɛkɛ ni atsɔɔ nɔ kɛyaa he kome too lɛ nɔŋŋ lɛ he.”
5 Kɛ oku osɛɛ oba koni obatsa sanegbaa ni tsɔɔ nɔ hewɔ ni jamɔi babaoo yɔɔ lɛ nɔ lɛ, obaanyɛ okɛɛ enɛ:
◼ “Beni mikɛ bo wie nyɛsɛɛ ko lɛ, mitee sanebimɔ ko ni tsɔɔ kɛji jamɔi fɛɛ ji gbɛi sɔrɔtoi kɛkɛ ni atsɔɔ nɔ kɛyaa he kome too lɛ nɔŋŋ lɛ shi. Mɛni osusuɔ yɛ he? [Ŋmɛɛ gbɛ ni ewie.] Masumɔ ni matsɔɔ bo nɔ ni Yesu kɛɛ yɛ sane lɛ he yɛ wolo ni mishi miha bo lɛ mli. [Gbelemɔ Nilee wolo lɛ yitso 5, ni okane kukuji 6-7, ní Mateo 7:21-23 fata he.] Ekolɛ obaasusu nɔ hewɔ ni ehe hiaa waa akɛ aaale nɔ ni Nyɔŋmɔ suɔmɔnaa nii ni aaafee lɛ ji diɛŋtsɛ lɛ he. Obaana akɛ kukuji ni nyiɛ sɛɛ lɛ tsɔɔ mɔ nii waa. Ofainɛ, kanemɔ yitso nɛɛ mli fã ni eshwɛ lɛ. Kɛ miba be kroko lɛ, mana he miishɛɛ akɛ matsɔɔ bo sɛɛnamɔ ni yɔɔ Biblia mli anɔkwa nilee ni aaana lɛ he.”
6 Bei pii lɛ, shiɛmɔ wiemɔ ni akɛhaa tɛɛ lɛ yeɔ omanye yɛ Biblia mli nikasemɔi ni ajeɔ shishi lɛ mli. Naa hiɛkpamɔ wiemɔ ko ni akɛha ni jeɔ kpo yɛ “Reasoning” wolo lɛ baafa 12:
◼ “Miiba ni mikɛ bo abafee shia Biblia mli nikasemɔ ni miheee nɔ ko. Kɛ manyɛ lɛ, masumɔ ni mikɛ minitii fioo ko atsɔɔ bo bɔ ni mɛi ni yɔɔ shikpɔji 200 anɔ lɛ kaseɔ Biblia lɛ akɛ wekui amɛhaa lɛ matsɔɔ bo. Wɔbaanyɛ wɔkɛ saneyitsei nɛɛ eko fɛɛ eko atsu nii kɛha sanegbaa. [Tsɔɔmɔ lɛ saneyitsei ni ato naa yɛ Nilee wolo lɛ mli lɛ.] Te emli nɔ ni oyɔɔ he miishɛɛ waa?” Mɛɛ koni mɔ lɛ atsɔɔ nɔ ni esumɔɔ. Gbelemɔ yitso ni ahala lɛ, ni okɛ klɛŋklɛŋ kuku lɛ aje nikasemɔ lɛ shishi.
7 Naa gbɛ kroko ni yɔɔ tɛɛ ni yeɔ omanye ni obaanyɛ oka okwɛ koni okɛje nikasemɔi ashishi:
◼ “Mikɛ mɛi feɔ Biblia mli nikasemɔi ni miheee nɔ ko, ni mana be maha nikaselɔi krokomɛi hu. Nɛkɛ wolo nɛɛ ni akɛkaseɔ Biblia lɛ ji nɔ ni wɔkɛtsuɔ nii. [Okɛ Nilee wolo lɛ atsɔɔ lɛ.] Nikasemɔ lɛ heɔ nyɔji fioo komɛi pɛ, ni ehaa sanebimɔi ni tamɔ enɛɛmɛi ahetoo: Mɛni hewɔ Nyɔŋmɔ ŋmɛɔ piŋmɔ gbɛ? Mɛni hewɔ wɔgbɔlɔɔ ni wɔgboiɔ? Mɛni baa wɔsuɔlɔi ni egboi lɛ anɔ? Ni te wɔbaafee tɛŋŋ wɔtsi wɔbɛŋkɛ Nyɔŋmɔ?” No sɛɛ lɛ bi akɛ, “Ani manyɛ mafee nikasemɔ lɛ he nɔkwɛmɔ nɔ matsɔɔ bo?” Kɛ akpɛlɛɛɛ nikasemɔ lɛ nɔ lɛ, bi mɔ lɛ kɛ́ ebaasumɔ ni ená Nilee wolo lɛ eko ni lɛ diɛŋtsɛ ekane. Kɛ nakai lɛ, shi eko oha lɛ.
8 Mɛɛ jwetri Nyɔŋmɔ kɛ Kristo he anɔkwa nilee lɛ ji nɛkɛ kɛha mɔ fɛɛ mɔ ni nine shɛɔ nɔ lɛ! Enamɔ lɛ tsɔɔ naanɔ wala lɛlɛŋ yɛ shihilɛi ni yeɔ emuu mli. Nyɛhaa wɔkɛ hegbɛ fɛɛ hegbɛ atsua nii yɛ November mli ni wɔkɛ mɛi krokomɛi ana nilee ni kɛ mɔ yaa naanɔ wala mli lɛ mli gbɛfaŋnɔ.