Te Mafee Tɛŋŋ Mana Mɔ ni Baabo Toi?

¹ Yɛ Filipi maŋ lɛ mli lɛ, ‘yoo ko ni atsɛɔ lɛ Lidia ni ji kɔɔjaŋhɔɔlɔ ko . . . nu; lɛ Nuntsɔ lɛ gbele etsui naa, akɛ ebo nii ni Paulo wieɔ lɛ toi.’ (Bɔf. 16:14) Mɛni sane nɛɛ tsɔɔ wɔ? Sane toiboo gbeleɔ gbɛ kɛhaa mɔ ko kɛha anɔkwale lɛ kasemɔ. Omanye ni wɔyeɔ yɛ Maŋtsɛyeli shɛɛ sane lɛ jajemɔ mli lɛ damɔ suɔmɔ ni shiatsɛ lɛ yɔɔ akɛ eeebo toi lɛ nɔ titri. Kɛ wɔna mɔ ni boɔ toi pɛ lɛ, ewaaa dɔŋŋ akɛ wɔkɛ wɔ shɛɛ sane lɛ aaaha. Shi ni aaana mɔ ni baabo toi lɛ baanyɛ afee kaa. Mɛni wɔbaanyɛ wɔfee?

² Dani wɔkɛ wɔhe aaawo shiɛmɔ nitsumɔ lɛ mli lɛ, esa akɛ wɔsusu wɔ hesaamɔ kɛ nibii ni wɔkɛbaatsu nii lɛ ahe. Mɛni hewɔ? Mɛi sumɔɔ waa akɛ amɛaabo mɔ ko ni buɔ ehe lɛ toi. Ani wɔwo atade ni sa kɛ hiɛshikamɔ? Eyɛ mli akɛ ekolɛ atade basabasa ni awoɔ lɛ egbɛ eshwa je lɛŋ moŋ, shi esa akɛ wɔkwa hiɛ ni akuɔ ashwieɔ nii anɔ lɛ, ejaakɛ sɔɔlɔi ni damɔ Nyɔŋmɔ Maŋtsɛyeli lɛ najiaŋ ji wɔ. Wɔ hesaamɔ ni he tse ni yɔɔ falefale lɛ yeɔ Maŋtsɛyeli shɛɛ sane ni wɔshiɛɔ lɛ he odase kpakpa.

³ Jiemɔ Naanyobɔɔ kɛ Bulɛ Kpo Otsɔɔ: Yɛ ŋmɛnɛŋmɛnɛ subaŋi ni tsakeɔ lɛ fɛɛ sɛɛ lɛ, mɛi babaoo yɛ bulɛ lolo kɛha Biblia lɛ ni amɛkɛ miishɛɛ baakpɛlɛ nɔ ni yɔɔ Biblia lɛ mli lɛ he sanegbaa ni bulɛ kɛ naanyobɔɔ fata he lɛ nɔ. Miishɛɛ ŋmɔlɔ baanyɛ aha shiatsɛ lɛ afee dioo ni egbele gbɛ kɛha sanegbaa ni ŋɔɔ. Esa akɛ wɔ anɔkwayeli kɛ subaŋi kpakpai lɛ hu aje kpo yɛ wɔ wiemɔ kɛ jeŋba mli, ní saji ni shiatsɛ lɛ wieɔ ni wɔkɛ bulɛ aaabo toi fata he lɛ.

⁴ Wɔ yiŋtoo ji ni wɔkɛ mɛi krokomɛi agba Biblia mli hiɛnɔkamɔ lɛ he sane. Akɛni enɛ yɔɔ wɔjwɛŋmɔŋ hewɔ lɛ, esa akɛ wɔkwɛ ni wɔ sanegbaa lɛ aŋɔɔ, jeee nɔ ni teɔ shi woɔ mɛi loo ni eteeɔ ŋwanejee shi. Ehe ehiaaa ni ofite be ni okɛ mɛi ni eyɛ faŋŋ akɛ amɛmiite shi amɛmiiwo lɛ aje ŋwane. (2 Tim. 2:23-25) Wɔbaanyɛ wɔhala shiɛmɔ wiemɔi ni fa babaoo ni woɔ hewalɛ ni akɛha wɔ yɛ Wɔ Maŋtsɛyeli Sɔɔmɔ lɛ kɛ Reasoning wolo lɛ mli lɛ. Shi, ehe miihia ni wɔkɛ enɛɛmɛi asaa wɔhe jogbaŋŋ koni wɔnyɛ wɔwie yɛ gbɛ ni yɔɔ miishɛɛ ni kɔneɔ mɔ yiŋ lɛ nɔ.—1 Pet. 3:15.

⁵ Beni wɔsara mɛi lɛ sɛɛ lɛ, shiatsɛmɛi lɛ fioo nyɛɔ amɛkaiɔ nɔ ni wɔkɛɛ lɛ pɛpɛɛpɛ. Shi kɛlɛ, etamɔ nɔ ni amɛteŋ mɔ fɛɛ mɔ baanyɛ akai gbɛ ni atsɔ nɔ awie lɛ. Esaaa akɛ wɔbaa hewalɛ ni ekpakpafeemɔ kɛ ejurɔfeemɔ yɔɔ lɛ shi kɔkɔɔkɔ. Eka shi faŋŋ akɛ mɛi ni tamɔ gwantɛŋi lɛ babaoo yɛ wɔ shikpɔŋkuku lɛ mli ni baabo anɔkwale lɛ toi taakɛ Lidia fee yɛ klɛŋklɛŋ afii oha lɛ mli lɛ pɛpɛɛpɛ. Ní wɔɔsusu wɔ hesaamɔ kɛ gbɛ ni wɔtsɔɔ nɔ wɔwieɔ lɛ he jogbaŋŋ lɛ baanyɛ awo anɔkwafoi ahewalɛ ni amɛbo Nyɔŋmɔ Wiemɔ lɛ toi ni amɛkɛ miishɛɛ akpɛlɛ nɔ.—Mar. 4:20.