Sanekpakpa Lɛ Kɛhamɔ—Kɛtsɔ Mɛi Kɛ Sanegbaa Nɔ
1 Taakɛ wiemɔi komekomei ashishitsɔɔmɔ wolo ko tsɔɔ lɛ, sanegbaa ji “henumɔi, nibii ni akpa shi ni ana, susumɔi kɛ jwɛŋmɔi ni akɛ mɔ kroko tsakeɔ kɛtsɔ wiemɔ nɔ.” Shi mɛɛ gbɛ nɔ oootsɔ oje sanegbaa ni damɔ Biblia nɔ lɛ shishi yɛ be mli ni ekolɛ gbɔmɛi ni okɛkpe lɛ teɔ shi woɔ bo yɛ jamɔ gbɛfaŋ, aloo amɛ diɛŋtsɛ amɛnifeemɔi ehe amɛdeka fɛɛ lɛ? Yesu bi saji koni no aha etoibolɔi lɛ kɛ amɛhe awo sanegbaa lɛ mli.—Yoh. 4:9-15, 41, 42.
2 Esa akɛ wɔkɛ ekaa asɔle ni Nyɔŋmɔ aye abua wɔ ni wɔna gbɔmɛi ni hiɛ tsui krɔŋŋ lɛ ni egbele gbɛ eha wɔ ni wɔkɛ amɛ agba sane. Kɛji wɔsusu shiatsɛ tɛɛ shiatsɛ he akɛ mɔ ko ni wɔsɛɛ lɛ ebaatsɔ Yehowa sɔɔlɔ lɛ, ehaa shiɛmɔ feɔ mlɛo. Jwɛŋmɔ ni tamɔ nɛkɛ ni wɔɔna lɛ baaye ebua wɔ ni wɔkɛ anɔkwale lɛ aha amɛ yɛ naanyobɔɔ su kɛ anɔkwayeli mli, ni ebaagbala mɛi ni yɔɔ wiemɔ lɛ he miishɛɛ lɛ hu.
Okɛ Nɔ Ni Wɔyɔɔ Lɛ Atsu Nii
3 Reasoning wolo lɛ kɛ hiɛkpamɔ wiemɔi ni hi jogbaŋŋ haa yɛ baafai 9-15. Enɛɛmɛi ateŋ babaoo kɛ sanebimɔi tsuɔ nii yɛ gbɛi ni mɔɔ shi nɔ. Kɛ shiatsɛ lɛ miijie sanebimɔ lɛ naa lɛ, okɛ bulɛ abo lɛ toi jogbaŋŋ, koni bo hu owie yɛ gbɛ ni baatsɔɔ shiatsɛ lɛ akɛ wɔsusuɔ nɔ ni ewie lɛ he jogbaŋŋ lɛ nɔ.—Kol. 4:6.
4 Eji anɔkwale akɛ, kɛ obi sane ko lɛ, oleee bɔ ni shiatsɛ lɛ baaha hetoo aha. No hewɔ lɛ feemɔ klalo akɛ obaatsake sanegbaa lɛ ni esa shihilɛ lɛ. Bɔɔ mɔdɛŋ ni oha sanegbaa lɛ aya nɔ kɛtsɔ saji krokomɛi ni kɔɔ nibii ni enaa he miishɛɛ lɛ ahe ni ooojɛ Biblia lɛ mli okɛfata he kɛ sanebimɔi krokomɛi ni gbalaa mɔ jwɛŋmɔ ni ooobi lɛ nɔ.
Tsɔ Hiɛ Osaa Ohe
5 Ekolɛ ole bɔ ni mɛi ni yɔɔ oshikpɔŋkuku lɛ mli lɛ susuɔ nii ahe amɛhaa lɛ momo. Kɛji nakai lɛ, no lɛ halamɔ hiɛkpamɔ wiemɔi ni baamɔ shi jogbaŋŋ yɛ oshikpɔŋkuku lɛ mli lɛ kɛjɛ Reasoning wolo lɛ mli. Ekolɛ ehe miihia ni otsake nɛkɛ hiɛkpamɔ wiemɔi nɛɛ amli fioo kɛkɛ bɔni afee ni esa Saneyitso Kɛha Sanegbaa hee ni akɛtsuɔ nii lɛ. Okɛ nibii ni osusuɔ akɛ shiatsɛ lɛ baanya he lɛ aje osanegbaa lɛ shishi, ni okɛ sanebimɔ kuku ko afɔ ehiɛ, koni no sɛɛ lɛ otsɔɔ lɛ hetoo ni jɛ Biblia lɛ mli lɛ. Kɛ ewie wiemɔ ko lɛ, jiemɔ eyi, jeee ni ooogbe ehiɛ yɛ nɔ ni ewie lɛ he. Esa akɛ miishɛɛ ni oyɔɔ yɛ nibii ni esusuɔ he kɛ bɔ ni enuɔ nii ahe ehaa lɛ he lɛ awo lɛ hewalɛ ni eya nɔ yɛ ekɛ bo sanegbaa lɛ mli. Bɔɔ mɔdɛŋ ni ona otii ni nyɛkpaa gbee yɛ he lɛ ni owie enɛɛmɛi ahe. Ha sanegbaa lɛ he aba sɛɛnamɔ kɛtsɔ Maŋtsɛyeli lɛ mli jɔɔmɔi ni oooma nɔ mi akɛ Biblia lɛ tsabaa kɛha adesai anaagbai lɛ nɔ.
6 Susumɔ jwɛŋmɔi sɔrɔtoi ni ahiɛ lɛ ahe akɛ gbɛi ni oootsɔ nɔ otsa sanegbaa lɛ nɔ. Kɛji shiatsɛ lɛ miisumɔ ni okɛ lɛ asusu saji ahe lɛ, no lɛ obaanyɛ obi akɛ, “Ani osusu he yɛ nɛkɛ gbɛ nɔ da?” No sɛɛ lɛ gbalamɔ ejwɛŋmɔ kɛya nɔ ni Nyɔŋmɔ Wiemɔ lɛ kɛɔ yɛ sane lɛ he lɛ nɔ. Kɛji ona akɛ mɔ lɛ nuuu sane shishi lɛ, kaanyɛ enɔ doo akɛ ekpɛlɛ nɔ ni okɛɔ lɛ nɔ. Shi moŋ, okɛ wiemɔ ko ni ooowie yɛ naanyobɔɔ su mli agbe sanegbaa lɛ naa, ni egbele gbɛ eha wɔsɛɛ be kroko ni okɛ sanekpakpa lɛ aba eŋɔɔ ekoŋŋ.—Abɛi 12:8, 18.
7 Mɛi komɛi yɛ ni kɛ okɛ amɛ kpe trukaa lɛ, amɛsumɔɔ ni okɛ amɛ agba sane. Kaashashao shi akɛ okɛ mɛi ni okɛkpeɔ yɛ gbɛjegbɛi anɔ aloo mɛi ni miitsu amɛshiai amli nii loo amɛmiijɔɔ amɛhe lɛ aaaje sanegbaa shishi. Ekolɛ ebaaŋɔɔ amɛnaa akɛ oyɛ nɔ ni amɛfeɔ lɛ he miishɛɛ, ni obaanyɛ otsa sanegbaa lɛ nɔ kɛyabote shiwoo ni Biblia lɛ kɛhaa akɛ etsɛŋ ni shikpɔŋ lɛ baatsɔ paradeiso lɛ he sanegbaa mli. Kɛ oje sanegbaa ko shishi lɛ, bɔɔ mɔdɛŋ ni oha efee niiashikpamɔ ko ni shiatsɛ lɛ baana he miishɛɛ. Shii abɔ ni eka bo onɔ lɛ, bɔɔ mɔdɛŋ ni oshi mɔ lɛ akɛ mɔ ko ni yɔɔ Nyɔŋmɔ, e-Wiemɔ lɛ, kɛ etsuji ahe miishɛɛ babaoo. Yɛ nɛkɛ gbɛ nɔ lɛ, kɛji oyeee omanye yɛ shishijee mii yɛ etsui he ni oooshɛ lɛ po mli lɛ. be kroko ni Odasefonyo ko aaaba eŋɔɔ lɛ eeebo lɛ toi jogbaŋŋ.