Sanebimɔ He

◼ Ani eja gbɛ akɛ akɛ shika aaaye abua kɛha mɛi krokomɛi atsɔne ni ataa mli lɛ?

Wɔteŋ mɛi komɛi yɛ shihilɛi komɛi ni biɔ ni wɔkɛ wɔhe afɔ mɛi krokomɛi anɔ kɛha yelikɛbuamɔ yɛ kpeei ni ayaa daa kɛ shiɛmɔ nitsumɔ ni akɛ he woɔ mli lɛ mli. Nyɛmimɛi hii kɛ yei babaoo kɛ mlihilɛ bɔɔ mɔdɛŋ ni amɛkɛ amɛbe, tsɔnei, kɛ nibii krokomɛi tsuɔ nii yɛ suɔmɔ mli koni amɛha wɔna tsɔne ni wɔɔta mli. Eyɛ mli akɛ ekolɛ ehe baahia ni amɛfee klalo mra fe bɔ ni kulɛ amɛaafee, loo ahaa amɛ tsɛɔ dani amɛyashɛɔ shia moŋ, shi amɛjɛɔ amɛsuɔmɔ mli amɛkɛ amɛ tsɔnei holeɔ wɔ.

Taakɛ eji yɛ wɔ Kristofoi asɔɔmɔ nitsumɔ lɛ eko fɛɛ eko mli lɛ, shishitoo mla ni yɔɔ Galatabii 6:5 lɛ kɔɔ enɛ hu he, akɛ: “Mɔ fɛɛ mɔ aaatere lɛ diɛŋtsɛ ejatsu.” No hewɔ lɛ, kɛ mɔ ko haa wɔtaa etsɔne mli daa lɛ, esa akɛ wɔtsɔɔ akɛ wɔhiɛ esɔ, jeee kɛtsɔ wɔ wiemɔi anɔ kɛkɛ, shi kɛ wɔɔnyɛ lɛ kɛtsɔ shika fioo ni wɔkɛaaye wɔbua ni akɛtsu shikafitemɔ ni fata he lɛ he nii hu nɔ.—Mat. 7:12; 1 Kor. 10:24.

Kɛ mɔ ni haa wɔtaa etsɔne mli lɛ biii shika yelikɛbuamɔ, ni etamɔ nɔ ni nɔ ko tamɔ nakai he ehiaaa lɛ po lɛ, hiɛ baasɔ shika ni akɛyeɔ abuaa yɛ anɔkwayeli mli lɛ daa. Ekolɛ tsɔne kudɔlɔ lɛ ekpɛlɛŋ nɔ ko ni akɛhaa lɛ lɛ nɔ; ni kɛlɛ, lɛ ji mɔ ni sa akɛ ekpɛ eyiŋ yɛ nakai gbɛ nɔ. Shi esa jogbaŋŋ akɛ okɛ nii lɛ aaaha. Kɛ onyɛŋ okɛ nɔ ko aye abua yɛ nakai be lɛ mli lɛ, obaanyɛ oha ehi ojwɛŋmɔ mli; ekolɛ obaanyɛ okɛ nɔ ko fioo aha be kroko ni obaata tsɔne lɛ mli lɛ.—Luka 6:38.

Eji suɔmɔ nifeemɔ jogbaŋŋ akɛ mɛi ni yɔɔ tsɔnei lɛ aaaha mɛi krokomɛi ni kulɛ amɛnyɛŋ amɛya kpeei loo ni amɛnaŋ shiɛmɔ nitsumɔ lɛ mli gbɛfaŋnɔ lɛ atara amɛtsɔnei lɛ amli. (Abɛi 3:27) Yɛ nakai beaŋ nɔŋŋ lɛ, eji suɔmɔ nifeemɔ hu akɛ mɛi ni naa mlihilɛ ni tamɔ nɛkɛ he sɛɛ lɛ aaada shi kɛtsɔ shika ni amɛkɛaaye amɛbua yɛ amɛ shihilɛi lɛ anaa lɛ nɔ.—Kol. 3:15.