Ani Okɛ Nyɔŋmɔ Wiemɔ lɛ Miitsu Nii yɛ Gbɛ ni Ja Nɔ?
1 Yesu Kristo ji tsɔɔlɔ ni fe fɛɛ ni ehi shi pɛŋ yɛ shikpɔŋ nɔ. Gbɛ ni etsɔ nɔ ewie lɛ ta gbɔmɛi atsuiiaŋ, ekanya amɛ henumɔi, ni etsirɛ amɛ koni amɛtsu nitsumɔi kpakpai. (Mat. 7:28, 29) Ekɛ Nyɔŋmɔ Wiemɔ lɛ tsu nii be fɛɛ be akɛ nɔ ni enitsɔɔmɔ lɛ damɔ nɔ. (Luka 24:44, 45) Ekɛ nɔ fɛɛ nɔ ni ele ni enyɛ ekɛtsɔɔ nii lɛ he yijiemɔ ha Yehowa Nyɔŋmɔ. (Yoh. 7:16) Yesu fee nɔkwɛmɔ nɔ ni ekaaa efɔ shi eha esɛɛnyiɛlɔi lɛ kɛtsɔ Nyɔŋmɔ Wiemɔ lɛ ni ekɛtsu nii yɛ gbɛ ni ja nɔ lɛ nɔ.—2 Tim. 2:15.
2 Bɔfo Paulo hu fee nɔkwɛmɔ nɔ ni nɔ bɛ, kɛtsɔ Nyɔŋmɔ Wiemɔ lɛ ni ekɛtsu nii yɛ gbɛ ni ja nɔ kɛmɔ shi lɛ nɔ. Efee babaoo fe Ŋmalɛi lɛ ni ekane etsɔɔ mɛi krokomɛi lɛ kɛkɛ; etsɔɔ nɔ ni ekane lɛ mli ni ekɛto saji ahe, ni ekɛ odaseyeli ni jɛ Nyɔŋmɔ Wiemɔ lɛ mli lɛ tsu nii ni ekɛtsɔɔ akɛ Yesu ji Kristo lɛ. (Bɔf. 17:2-4) Nakai nɔŋŋ hu Apolo ni naa tse lɛ ‘le Ŋmalɛi lɛ jogbaŋŋ’ ni ekɛtsu nii yɛ gbɛ ni ja nɔ ni ekɛ anɔkwale lɛ he shiɛmɔ wiemɔ ha kɛ ekãa.—Bɔf. 18:24, 28.
3 Feemɔ Ohe Nyɔŋmɔ Wiemɔ lɛ he Tsɔɔlɔ: Ŋmɛnɛŋmɛnɛ beaŋ Maŋtsɛyeli jajelɔi ená omanye ni nɔ bɛ, ni ayeɔ yɛ gbɔmɛi anɔkwafoi anitsɔɔmɔ mli, kɛtsɔ Biblia lɛ ni amɛtsɛɔ sane sɛɛ kɛjɛɔ mli ni amɛkɛsusuɔ saji ahe lɛ nɔ lɛ mli ŋɔɔmɔ. Yɛ shihilɛ ko mli lɛ, nyɛmi nuu ko nyɛ́ ekɛ Ezekiel 18:4 kɛ ŋmalɛi ni kɔɔ he lɛ hu tsu nii ni ekɛ osɔfo ko kɛ esɔlemɔ lɛ mli bii etɛ susu nɔ ni baaba mɛi fɔji kɛ jalɔi anɔ lɛ he. Nɔ ni jɛ mli ba ji, sɔlemɔ lɛ mli bii lɛ ekomɛi bɔi nikasemɔ, ni yɛ naagbee lɛ amɛteŋ mɔ kome kpɛlɛ anɔkwale lɛ nɔ. Yɛ shihilɛ kroko mli lɛ, abi koni nyɛmi yoo ko atsɔɔ nɔ hewɔ ni Yehowa Odasefoi yeee Blonya kɛ fɔmɔgbii lɛ mli eha mɔ ko ni yɔɔ wiemɔ lɛ he miishɛɛ lɛ wu ni teɔ shi woɔ lɛ lɛ. Beni ekane Ŋmalɛ naa hetooi lɛ tɛɛ kɛjɛ Reasoning wolo lɛ mli lɛ, nuu lɛ tsɔɔ akɛ ekpɛlɛɔ nɔ. Eŋa lɛ mii shɛ ehe waa yɛ nii ni ekpɛlɛ nɔ lɛ hewɔ aahu akɛ ekɛɛ: “Wɔbaaba nyɛ kpeei lɛ.” Ni wu lɛ kpɛlɛ nɔ!—yb87 bf. 28-9.
4 Okɛ Yelikɛbuamɔ ni Yɔɔ lɛ Atsu Nii: Wɔ Maŋtsɛyeli Sɔɔmɔ lɛ kɛ Sɔɔmɔ Kpee he gbɛjianɔtoo lɛ kɛ gbɛtsɔɔmɔ kpakpa haa koni eye ebua wɔ yɛ Nyɔŋmɔ Wiemɔ lɛ kɛ nitsumɔ mli. Shiɛlɔi babaoo etsɔɔ bɔ ni amɛhiɛ esɔ shiɛmɔ wiemɔi sɔrɔtoi ni akɛha, ni aŋmala ni afee he nɔkwɛmɔ nii kɛha wɔ sɛɛnamɔ, ní efee nɔ ni yɔɔ ebe naa pɛpɛɛpɛ ni emɔɔ shi jogbaŋŋ lɛ. Sane hesusumɔi babaoo ni tsɔɔ bɔ ni aaafee atsɔɔ saneyitsei wuji fe 70, ni awie he yɛ Nyɔŋmɔ Wiemɔ lɛ mli lɛ mli aha lɛ, yɛ Reasoning From the Scriptures lɛ mli. Nilee Ni Kɛ Mɔ Yaa Naanɔ Wala Mli lɛ kɛ Biblia mli shishijee tsɔɔmɔi, ni yɔɔ tɛɛ ni afee lɛ kukuji, ni ehe hiaa ni mɛi heei anu shishi lɛ haa. Nikasemɔi 24 kɛ 25 ni yɔɔ Theocratic Ministry School Guidebook lɛ mli lɛ tsɔɔ wɔ bɔ ni tsɔɔlɔi ni he esa lɛ kpáa ŋmalɛi ahiɛ yɛ gbɛ ni sa nɔ, ni amɛkaneɔ, ni amɛkɛtsuɔ nii jogbaŋŋ lɛ. Esa akɛ wɔkɛ yelikɛbuamɔ ni wɔyɔɔ nɛɛ fɛɛ atsu nii jogbaŋŋ.
5 Kɛ wɔkɛ Nyɔŋmɔ Wiemɔ lɛ tsu nii yɛ gbɛ ni ja nɔ lɛ, wɔbaana akɛ ‘ehiɛ kã ni eyɛ hewalɛ . . . ni eji’ mɛi ni wɔshiɛɔ wɔtsɔɔ amɛ lɛ ‘atsuiiaŋ susumɔi kɛ jwɛŋmɔi lɛ akojolɔ.’ (Heb. 4:12) Omanye ni wɔyeɔ yɛ ekɛ nitsumɔ mli lɛ baatsirɛ wɔ koni wɔkɛ ekãa babaoo awie anɔkwale lɛ daa!—Bɔf. 4:31.