Too Wolo Tɛtrɛɛ lɛ Kɛhamɔ He Shiɛmɔ Wiemɔ He Gbɛjianɔ Oha Ohe
1 Wɔhiɛ sɔɔ Buu-Mɔɔ kɛ Awake! woji tɛtrɛbii lɛ, yɛ amɛmli saji ni yɔɔ ebe naa pɛpɛɛpɛ, ni tsɔɔ mɔ nii ni wieɔ nɔ fɛɛ nɔ he kɛjɛɔ je lɛŋ saji anɔ aahu kɛyashiɔ “Nyɔŋmɔ nibii ni mli kwɔlɔ” lɛ anɔ lɛ hewɔ. (1 Kor. 2:10) Wɔ fɛɛ wɔkaiɔ nibii heei babaoo ni tswaa mɔ emaa shi ni wɔkane kɛjɛ nɛkɛ woji ni Yehowa kɛtsuɔ nii ni ekɛjieɔ anɔkwale lɛ kpo fiofio nɛɛ amli lɛ. (Abɛi 4:18) Wɔmiisumɔ ni wɔkɛ ekãa aja babaoo bɔ ni wɔɔnyɛ kɛtsɔ mɛi ni wɔɔha amɛshɛ lɛ nɔ.
2 Kwɛmɔ Bɔ ni Oshikpɔŋkuku lɛ Yɔɔ: Mɛɛ gbɔmɛi nɛkɛ yɔɔ okutso lɛ mli? Kɛ amɛyeɔ oyai waa yɛ shihilɛ mli lɛ, ekolɛ ehe baahia ni ofee shiɛmɔ wiemɔ kuku ni baaya lɛ tɛ̃ɛ. Kɛ oyɛ shikpɔŋkuku ni ayeee oyai yɛ shihilɛ mli tsɔ̃ lɛ, ekolɛ obaasumɔ ni owie babaoo. Kɛ mɛi ni yɔɔ shia lɛ mli lɛ ateŋ mɛi babaoo tsuɔ nii yɛ gbi lɛ mli lɛ, ekolɛ obaaye omanye babaoo yɛ be mli ni oyaa amɛ shiai beni je miihe ana loo beni jeŋ ebɔi namɔ lɛ. Obaanyɛ oya mɛi komɛi aŋɔɔ shwane kɛtsɔ gbɛjegbɛ nɔ odaseyeli loo shwapoi anaa nitsumɔ nɔ. Shiɛlɔi komɛi yeɔ omanye babaoo kɛtsɔɔ mɛi ni amɛbɛŋkɛɔ trukaa yɛ tsɔnei adaamɔ hei kɛ shwɛmɔ hei lɛ nɔ.
3 Lé Woji Tɛtrɛbii lɛ Amli Saji Jogbaŋŋ Bo Diɛŋtsɛ: Kanemɔ eko fɛɛ eko ni onine aaashɛ nɔ lɛ amrɔ nɔŋŋ. Halamɔ saji ni osusuɔ akɛ mɛi ni yɔɔ oshikpɔŋkuku lɛ mli lɛ baanya he lɛ. Mɛɛ saji kɔɔ amɛhe? Taomɔ sane oti pɔtɛɛ ko ni obaanyɛ otsɛ sɛɛ kɛjɛ emli sane ko ni oto akɛ obaawie he lɛ mli. Susumɔ sanebimɔ ko ni obaanyɛ otee lɛ shi ni okɛkanya miishɛɛ lɛ he. Halamɔ ŋmalɛ ko ni yɔɔ ebe naa koni okane otsɔɔ shiatsɛ lɛ, kɛ ona hegbɛ akɛ ooofee nakai. Susumɔ nɔ ni obaanyɛ okɛɛ koni okɛtsĩ wolo-shɛɛ he gbɛjianɔ ni ato lɛ tã kɛ bɔ ni ooonyɛ oto shishi kpakpa kɛha sɛɛsaramɔ lɛ he.
4 Too Nɔ ni Obaawie Kɛje Shishi lɛ He Gbɛjianɔ: Halamɔ wiemɔi ni oto akɛ okɛbaatsu nii koni okɛjie ohe kpo otsɔɔ, koni okɛje sanegbaa shishi lɛ amli jogbaŋŋ. Mɛi komɛi eye omanye yɛ wiemɔ nɛɛ ni akɛjeɔ shishi lɛ hewɔ: “Mikane sane ko ni yɔɔ miishɛɛ waa yɛ wolo tɛtrɛɛ nɛɛ mli, ni miisumɔ ni mikɛ mɛi krokomɛi agba he sane.” Mɛi babaoo kɛ sanebimɔ ni gbalaa jwɛŋmɔ kɛyaa wiemɔ titri ni amɛto akɛ amɛkɛaatsu nii lɛ nɔ lɛ jeɔ shishi. Akɛ nɔkwɛmɔ nɔ lɛ:
5 Kɛ ooma sane ko ni tsɔɔ bɔ ni awuiyeli egbɛ eshwa lɛ nɔ mi lɛ, obaanyɛ obi akɛ:
◼ “Mɛni ebaabi koni wɔnyɛ wɔwɔ gbɛkɛ, ni wɔsheee gbeyei akɛ abaaju wɔ nibii loo ni aaaye wɔ awui?” Tsɔɔmɔ mli akɛ oyɛ sane ko ni wieɔ naagba nɛɛ he tsabaa he. Etsɛŋ ni enaa tsabaa lɛ baajie shihilɛ mli basabasa-feemɔi krokomɛi fɛɛ hu kɛya. Wiemɔ wolo tɛtrɛɛ lɛ mli nɔ ko ni kɛ hiɛnɔkamɔ ni tamɔ nɛkɛ haa lɛ he. Tsĩi wolo-shɛɛ he gbɛjianɔ ni ato lɛ tã otsɔɔ. Kɛ oba ekoŋŋ lɛ, obaanyɛ ogbala shiatsɛ lɛ jwɛŋmɔ kɛya Nilee wolo lɛ yitso 1 lɛ nɔ.
6 Kɛ okɛ sane ko ni wieɔ weku shihilɛ he lɛ miiha lɛ, obaanyɛ okɛɛ nɛkɛ:
◼ “Fɔlɔi babaoo naa akɛ eji kaa diɛŋtsɛ akɛ aaakwɛ weku nɔ yɛ nɛkɛ gbii nɛɛ amli. Aŋmala woji babaoo yɛ sane lɛ he, shi mɛi ni ekase he nii waa lɛ po kɛ nomɛi kpaaa gbee. Ani mɔ ko yɛ ni baanyɛ ekɛ gbɛtsɔɔmɔ ni akɛ he fɔɔ nɔ aha?” Jiemɔ wolo tɛtrɛɛ lɛ mli sane pɔtɛɛ ko ni awie ni tsɔɔ ŋaawoo ni nilee yɔɔ mli ni yɔɔ Biblia lɛ mli lɛ kpo otsɔɔ lɛ. Fɔɔ nine otsɛ shiatsɛ lɛ koni eshɛ. Kɛ ofee sɛɛsaramɔ lɛ, okɛ lɛ agba Ŋmalɛ mli saji ni asusuɔ he ni kɔɔ gbekɛbii atsɔsemɔ he, ní awie he yɛ Nilee wolo lɛ baafai 145-8 lɛ he sane.
7 Beni owieɔ sane ko ni kɔɔ shihilɛ mli naagba he lɛ, obaanyɛ okɛɛ:
◼ “Mɛi babaoo nuɔ he akɛ amɛbaje nɔnyɛɛ shishi yɛ haomɔ bei amli ni wɔyɔɔ nɛɛ hewɔ. Ani osusuɔ akɛ Nyɔŋmɔ to eyiŋ akɛ wɔhi shi nɛkɛ?” Okɛ sane ko ni tsɔɔ bɔ ni aaafee adamɔ ŋmɛnɛŋmɛnɛ naagbai anaa, aloo ni haa anaa yiŋtoi ni aaadamɔ nɔ akpa wɔsɛɛ shihilɛ ni yeyeeye feemɔ bɛ mli gbɛ lɛ atsɔɔ. Kɛɛmɔ lɛ ni eshɛ koni okɛba naagbee. Kɛ oba be kroko lɛ, nyɛgbaa mfoniri ni atɛŋ kɛ mfoniri he niŋmaa ni yɔɔ Nilee wolo lɛ baafai 4-5 lɛ he sane, koni no sɛɛ lɛ nyɛkɛtsua nii tɛɛ kɛyaa shia Biblia mli nikasemɔ nɔ.
8 Okɛ Ohe Awo Shiatsɛ lɛ Shihilɛ Mli: Okɛ gbɔmɛi ni esoro nibii ni amɛnyaa he, ni amɛjɛ shihilɛi sɔrɔtoi amli lɛ baakpe. Feemɔ shiɛmɔ wiemɔ ni obaanyɛ odamɔ nɔ otsake mli oha shiatsɛ fɛɛ shiatsɛ. Ha nɔ ni ekolɛ obaakɛɛ ni obaatsake mli oha nuu, yoo, mɔ ni eda, loo gbekɛ lɛ ahi ojwɛŋmɔ mli. Awoko mlai ni yɔɔ kpɛŋŋ yɛ nɔ ni esa akɛ okɛɛ lɛ he. Okɛ nɔ fɛɛ nɔ ni baahi aha bo atsu nii koni yibiiwoo ajɛ mli aba. Shi kɛlɛ, feemɔ kɛ miishɛɛ, wiemɔ kɛjɛ otsui mli, ni ofee toibolɔ kpakpa. Mɛi ni “hiɛ jwɛŋmɔ kpakpa” lɛ baayɔse onɔkwayeli lɛ ni amɛbaahere nɔ jogbaŋŋ.—Bɔf. 13:48, NW.
9 Nyɛyea Nyɛbuaa Nyɛhe: Kɛ wɔkɛ wɔhe susu saji ahe lɛ, wɔkaseɔ gbɛi heei ni wɔɔtsɔ nɔ wɔwie. Wɔ shiɛmɔ wiemɔi lɛ ni wɔɔto he gbɛjianɔ ni wɔfee wɔtsɔɔ wɔhe lɛ haa wɔnaa niiashikpamɔ kɛ hekɛnɔfɔɔ. (Abɛi 27:17) Kɛ otĩ nɔ ni obaakɛɛ lɛ mli shii abɔ lɛ, ofeŋ yeyeeye yɛ shinaa naa. Ehe miihia ni fɔlɔi ana be koni amɛye amɛbua amɛbii lɛ ni amɛsaa amɛhe, amɛbo amɛ shiɛmɔ wiemɔi ni amɛtĩɔ mli amɛfeɔ amɛtsɔɔ amɛhe lɛ toi, ni amɛkɛ ŋaawoo ni baaha amɛya hiɛ lɛ aha. Mɛi heei baanyɛ ana shiɛlɔi ni yɔɔ niiashikpamɔ ni amɛkɛ amɛ aaatsu nii lɛ he sɛɛ.
10 Ehe ehiaaa ni wolo tɛtrɛɛ he shiɛmɔ wiemɔ ni bo diɛŋtsɛ otoɔ he gbɛjianɔ lɛ waa kɛhaa bo. No kɛkɛ ji, ni oooha nɔ ko pɔtɛɛ ni obaawie he lɛ ahi ojwɛŋmɔ mli, koni no sɛɛ lɛ owie yɛ gbɛ ni baaha ana he miishɛɛ lɛ nɔ. Kɛ okɛ bo diɛŋtsɛ ojwɛŋmɔ tsu nii ni osusu sane he kɛtsɔ hiɛ lɛ, obaanyɛ ofee shiɛmɔ wiemɔ kpakpa ni baaha akpɛlɛ nɔ jogbaŋŋ.
11 Woji tɛtrɛbii ajaa ji gbɛi titrii ni wɔtsɔɔ nɔ wɔgbɛɔ Maŋtsɛyeli shɛɛ sane lɛ wɔshwaa jeŋ fɛɛ. Kɛ obaanyɛ oha Buu-Mɔɔ kɛ Awake! lɛ ashɛ anɔkwafoi adɛŋ lɛ, woji tɛtrɛbii lɛ baanyɛ awie aha amɛhe. Kaimɔ sɛɛnamɔ ni yɔɔ amɛhe lɛ daa, kɛ bɔ ni amɛ shɛɛ sane lɛ baanyɛ ahere mɔ yiwala lɛ. Nɛkɛ ‘ejurɔ ni afeɔ kɛ mɛi krokomɛi ni akɛ amɛ naa nii amli gbɛfaŋnɔ’ nɛɛ saa Yehowa hiɛ waa diɛŋtsɛ.—Heb. 13:16.