Okɛ Ohe Awo Nitsumɔ ni Akuŋ Sɛɛ Atsuŋ Dɔŋŋ lɛ Mli
1 Yɛ bei sɔrɔtoi amli yɛ adesai ayinɔsane fɛɛ mli lɛ, ehe bahiaa ni Yehowa kɛ fɔbuu kojomɔ aba ehenyɛlɔi anɔ. Shi kɛlɛ, yɛ emusuŋtsɔlɛ hewɔ lɛ, ekɛ hegbɛ haa, koni mɛi ni hiɛ tsui ni ja lɛ ana yibaamɔ. (Lala 103:13) Bɔ ni amɛhere nɔ amɛha lɛ tsɔɔ nɔ ni ba amɛnɔ yɛ naagbee mli.
2 Akɛ nɔkwɛmɔ nɔ lɛ, dani Nu Afua lɛ ba yɛ afii 2370 D.Ŋ.B. lɛ, no mli lɛ, ‘Noa ji jalɛ shiɛlɔ.’ Mɛi ni ku amɛhiɛ amɛfɔ ŋwɛi kɔkɔbɔɔ nɔ lɛ ji mɛi ni hiɛ kpata. (2 Pet. 2:5; Heb. 11:7) Dani Yerusalem hiɛkpatamɔ lɛ ba yɛ afii 70 Ŋ.B. lɛ, Yesu tsɔɔ nɔ ni he baahia ni mɔ fɛɛ mɔ afee, koni eje hiɛkpatamɔ ni baaba maŋ lɛ nɔ lɛ mli lɛ mli faŋŋ. Mɛi fɛɛ ni kpoo ekɔkɔbɔɔ he shɛɛ sane lɛ piŋ yɛ amanehulu ni jɛ mli ba lɛ hewɔ. (Luka 21:20-24) Atĩ ŋwɛi kɔkɔbɔi kɛ kojomɔi ni tamɔ enɛɛmɛi amli shii abɔ yɛ yinɔsane fɛɛ mli.
3 Ŋmɛnɛŋmɛnɛ Beaŋ Kɔkɔbɔɔ He Nitsumɔ: Yehowa ejaje jeeŋmɔ beebe akɛ ebaafɔse emlifu lɛ eshwie ŋmɛnɛŋmɛnɛ nibii agbɛjianɔtoo fɔŋ lɛ nɔ, ni ákɛ, heshibalɔi pɛ abaahere amɛyiwala. (Zef. 2:2, 3; 3:8) Be ni akɛbaashiɛ kɔkɔbɔɔ he shɛɛ sane nɛɛ miiba naagbee oyayaayai! “Amanehulu kpeteŋkpele” lɛ kã wɔhiɛ nɔŋŋ, ni aabua heshibalɔi anaa bianɛ. Lɛlɛŋ, ‘ŋmɔ̃ji lɛ egba futaa momo ni sa kpamɔ.’ No hewɔ lɛ, anyɛŋ akɛ nitsumɔ ko kwraa ato bɔ ni enɛ he hiaa ha kɛ oyaiyeli ni esa akɛ akɛtsu lɛ he.—Mat. 24:14, 21, 22; Yoh. 4:35.
4 “Amɛbo toi jio, amɛbooo toi jio,” esa akɛ wɔna gbɛfaŋnɔ yɛ ŋmɛnɛŋmɛnɛ beaŋ kɔkɔ ni abɔɔ mɛi krokomɛi lɛ mli. Enɛ ji nitsumɔ ni Nyɔŋmɔ kɛha ni esaaa akɛ wɔkuɔ wɔhiɛ wɔshwieɔ nɔ. (Ezek. 2:4, 5; 3:17, 18) Wɔhe ni wɔkɛaawo nitsumɔ nɛɛ mli kɛmɔ shi lɛ tsɔɔ suɔmɔ ni mli kwɔ ni wɔyɔɔ kɛha Nyɔŋmɔ, wɔ nanemɛi ahe ni wɔsusuɔ yɛ anɔkwale mli, kɛ hemɔkɛyeli ni hosooo ni wɔyɔɔ yɛ wɔ Yiwalaherelɔ, Yesu Kristo mli.
5 Be ni Akɛaafee he Nɔ ko lɛ Nɛ: Yɛ kojomɔi ni Yehowa kɛha yɛ be ko ni eho lɛ fɛɛ sɛɛ lɛ, efɔŋ feemɔ teɔ shi ekoŋŋ be fɛɛ be, ejaakɛ no mli lɛ Satan kɛ edaimonioi lɛ yɛ hewalɛ lolo. Shi kɛlɛ, ebaafee sɔrɔto yɛ be nɛɛ mli. Abaajie Satan hewalɛ ni enaa yɛ mɛi anɔ lɛ kɛya kwraa. Ni je muu fɛɛ kɔkɔbɔɔ ko ni kɔɔ “amanehulu kpeteŋkpele” ko ni miiba he ebahiaŋ dɔŋŋ. (Kpoj. 7:14; Rom. 16:20) Wɔna hegbɛ krɛdɛɛ akɛ wɔɔná nitsumɔ ni akuŋ sɛɛ atsuŋ dɔŋŋ lɛ mli gbɛfaŋnɔ. Be ni wɔkɛ hegbɛ ni wɔná nɛɛ aaatsu nii jogbaŋŋ kɛmɔ shi lɛ nɛ.
6 Bɔfo Paulo wie kɛkɔ eshiɛmɔ nitsumɔ lɛ he kɛ hemɔkɛyeli kɛ ekãa akɛ: “Miyeee nyɛteŋ mɔ ko mɔ ko lá yi sɔ̃.” (Bɔf. 20:26) Enuuu láyisɔyeli he akɛ ehako anu kɔkɔbɔɔ lɛ. Mɛni hewɔ enuuu he nakai? Ejaakɛ enyɛ ewie esɔɔmɔ nitsumɔ lɛ he akɛ: “No he deŋme migboɔ ni mipeleɔ yɛ.” (Kol. 1:29) Nyɛhaa wɔnáa tsui ni nyɔɔ mɔ mli tamɔ nakai nɔŋŋ mli ŋɔɔmɔ, yɛ nitsumɔ ni akuŋ sɛɛ atsuŋ dɔŋŋ ni wɔnáa mli gbɛfaŋnɔ kɛmɔɔ shi bɔ ni wɔɔnyɛ lɛ hewɔ!—2 Tim. 2:15.