Wɔsa ni Awula Wɔ Koni Wɔtsɔɔ Mɛi Krokomɛi Anii
1 Beni ahala Mose akɛ Yehowa najiaŋdamɔlɔ lɛ, enuuu he akɛ eji mɔ ni sa akɛ ejajeɔ Nyɔŋmɔ wiemɔ lɛ etsɔɔ Farao. (2 Mose 4:10; 6:12) Yeremia jie hekɛnɔfɔɔ ni ebɛ yɛ emli akɛ eeenyɛ esɔmɔ akɛ Yehowa gbalɔ lɛ kpo etsɔɔ, ni ekɛɛ Nyɔŋmɔ akɛ eleee wiemɔ. (Yer. 1:6) Yɛ hekɛnɔfɔɔ ni nakai gbalɔi enyɔ lɛ bɛ yɛ amɛmli kɛjɛ shishijee lɛ fɛɛ sɛɛ lɛ, amɛbatsɔmɔ Yehowa Odasefoi ni sheee gbeyei. Nyɔŋmɔ ha amɛfee mɛi ni sa jogbaŋŋ.
2 Ŋmɛnɛ, shidaa aha Yehowa akɛ wɔyɛ nɔ ni he hiaa wɔ ni baaha wɔkɛ hekɛnɔfɔɔ atsu wɔ sɔɔmɔ nitsumɔ lɛ he nii lɛ. (2 Kor. 3:4, 5; 2 Tim. 3:17) Taakɛ tsɔnesaalɔ ni he esa, ni hiɛ nitsumɔ dadei lɛ fɛɛ ji lɛ, awula wɔ jogbaŋŋ koni wɔkɛ hesaa atsu sɔɔmɔ nitsumɔ ni akɛwo wɔdɛŋ lɛ he nii. Wɔkɛ wolo fɛɛ wolo ni hiɛ baafai 192 ni akala dani 1984 shɛ ni ekolɛ asafo lɛ yɔɔ eko lɛ baatsu nii yɛ January mli. Eyɛ mli akɛ nɛkɛ mumɔŋ dɛŋdadei nɛɛ jeee ehee moŋ, shi amɛ saneyitsei ni jɛ Ŋmalɛ mli lɛ yɛ ebe naa lolo, ni nɛkɛ woji nɛɛ baaye abua mɛi koni amɛkase anɔkwale lɛ. Abaanyɛ atsake shiɛmɔ wiemɔi ni akɛha ni nyiɛ sɛɛ nɛɛ amli kɛha wolo fɛɛ wolo ni akɛbaatsu nii.
3 Abaanyɛ akɛ wolo-kasemɔ afee saneyitso koni akɛtee miishɛɛ shi yɛ Nyɔŋmɔ Wiemɔ lɛ mli. Obaanyɛ oje sanegbaa shishi kɛtsɔ enɛ kɛɛmɔ nɔ:
◼ “Aama bɔ ni ehe hiaa ni ana wolo-kasemɔ kpakpa lɛ nɔ mi waa ŋmɛnɛ. Yɛ ojwɛŋmɔ naa lɛ, mɛɛ wolo-kasemɔ nɛkɛ esa akɛ mɔ ko atiu sɛɛ koni ekwɛ ni ena miishɛɛ kɛ omanyeyeli ni fe fɛɛ yɛ shihilɛ mli? [Ŋmɛɛ gbɛ ni ewie.] Mɛi ni náa Nyɔŋmɔ he nilee lɛ baanyɛ aná sɛɛnamɔi kɛya naanɔ. [Kanemɔ Abɛi 9:10, 11.] Biblia lɛ nɔ adamɔ aŋma nɛkɛ wolo bibioo [tsɔɔmɔ wolo ni okɛhaa lɛ gbɛi] nɛɛ. Etsɔɔ he kome too pɛ ni abaana nilee ni baanyɛ ekɛ mɔ aya naanɔ wala mli lɛ kɛbaajɛ.” Okɛ wolo lɛ mli nɔkwɛmɔ nɔ pɔtɛɛ ko atsɔɔ. Okɛ wolo lɛ aha ni oto gbɛjianɔ kɛha sɛɛsaramɔ.
4 Kɛ ooku osɛɛ oya shiatsɛ ni okɛ lɛ gba bɔ ni Biblia mli nikasemɔ he hiaa ha lɛ he sane lɛ ŋɔɔ lɛ, obaanyɛ okɛɛ akɛ:
◼ “Beni mibasara bo nyɛsɛɛ nɛɛ lɛ, wɔgba sane ni tsɔɔ akɛ Biblia lɛ ji he ni abaana nikasemɔ ni baanyɛ aha wɔna naanɔ wɔsɛɛ shihilɛ kɛjɛ lɛ he sane. Shi kɛlɛ, ebiɔ mɔdɛŋbɔɔ koni wɔkɛkase nɔ ni ehe hiaa ni wɔle kɛjɛ Ŋmalɛi lɛ amli lɛ. [Kanemɔ Abɛi 2:1-5.] Ewaa kɛhaa mɛi babaoo akɛ amɛaanu Biblia lɛ hei komɛi ashishi. Masumɔ ni mafee gbɛ ni wɔkɛtsu nii babaoo ni wɔkɛye wɔbua mɛi koni amɛkase Biblia mli shishijee tsɔɔmɔi lɛ ahe nii babaoo lɛ he nɔkwɛmɔ nɔ kuku ko matsɔɔ bo.” Okɛ wolo ni oshi lɛ atsu nii, koni ogbele he ko ni sa, koni ofee Biblia mli nikasemɔ he nɔkwɛmɔ nɔ kuku. Kɛ shiatsɛ lɛ miisumɔ ni akɛ lɛ akase nii daa lɛ, tsɔɔmɔ mli akɛ, obaaku osɛɛ oba kɛ wɔ wolo ni akɛkaseɔ nii, ni ji Nilee Ni Kɛ Mɔ Yaa Naanɔ Wala Mli lɛ.
5 Amanehulu ni gbekɛbii akpekpei abɔ ni yɔɔ je lɛŋ lɛ naa lɛ gbaa mɛi babaoo naa. Ekolɛ obaanyɛ oye obua shiatsɛ lɛ koni ena bɔ ni Nyɔŋmɔ susuɔ jaramɔ shihilɛ nɛɛ he ehaa, kɛtsɔ enɛ kɛɛmɔ nɔ:
◼ “Ŋwanejee ko bɛ he akɛ onu gbekɛbii ni yɔɔ je lɛŋ fɛɛ ni hɔmɔ yeɔ amɛ, amɛhe yeɔ, ni akpoo amɛ lɛ ahe amaniɛbɔi ahe sane yɛ adafitswaa mli. Mɛni hewɔ gbɛjianɔtoi ni enɛ kɔɔ amɛhe lɛ nyɛko asaa shihilɛ lɛ? [Ŋmɛɛ gbɛ ni ewie.] Nɔ ni hi fe fɛɛ lɛ pɛ Nyɔŋmɔ taoɔ kɛha adesai. Kadimɔ shiwoo ni ekɛha gbekɛbii kɛ onukpai, taakɛ aŋma yɛ Biblia lɛ mli lɛ. [Kanemɔ Kpojiemɔ 21:4.] Nɛkɛ wolo [tsɔɔmɔ gbɛi lɛ] nɛɛ kɛ jeŋ ko ni Nyɔŋmɔ kɛbaaba, hé ni amanehulu sɛɛ baafo yɛ lɛ mlitsɔɔmɔ fitsofitso haa.” Kɛ eeehi lɛ, gbelemɔ he ko ni feɔ Paradeiso he mfoniri, koni nyɛgba he sane. Okɛ wolo lɛ aha, ni oto gbɛjianɔ koni obasara lɛ ekoŋŋ.
6 Kɛ owie amanehulu ni gbekɛbii naa lɛ he kɛjɛ shishijee lɛ, obaanyɛ otsa sanegbaa lɛ nɔ, beni otee oyaasara lɛ ekoŋŋ lɛ kɛtsɔ enɛ kɛɛmɔ nɔ:
◼ “Beni miba biɛ nyɛsɛɛ nɛɛ lɛ, otsɔɔ bɔ ni jaramɔ shihilɛ ni gbekɛbii ni naa amanehulu yɔɔ mli yɛ shiai ni mli egbala, hɔmɔ, hela, kɛ awuiyeli hewɔ lɛ gbaa onaa ehaa. Eji miishɛjemɔ akɛ oookane jeŋ ko ni gbekɛbii loo onukpai ahe yeŋ, amɛpíŋ, loo amɛgboiŋ yɛ mli lɛ he sane yɛ Biblia lɛ mli. Gbalɛ ko ni yɔɔ Yesaia wolo lɛ mli lɛ tsɔɔ shihilɛ kpakpa ni baaba shikpɔŋ nɔ lɛ he sane.” Kanemɔ Yesaia 65:20-25 koni nyɛgba he sane. Tsɔ no nɔ okɛ Nilee wolo lɛ afee Biblia mli nikasemɔ yɛ sɛɛ mli.
7 Akɛni mɛi ni sumɔɔ jamɔ lɛ sumɔɔ sɔlemɔ waa hewɔ lɛ, obaanyɛ okɛ saneyitso nɛɛ aje sanegbaa shishi kɛtsɔ enɛ kɛɛmɔ nɔ:
◼ “Wɔteŋ mɛi babaoo ená naagbai yɛ wɔ shihilɛ mli pɛŋ, ni enɛ tsirɛ wɔ ni wɔsɔle wɔbi Nyɔŋmɔ dɛŋ yelikɛbuamɔ. Ni kɛlɛ, mɛi babaoo nuɔ he akɛ abooo amɛ sɔlemɔi atoi. Etamɔ nɔ ni abooo jamɔŋ hiɛnyiɛlɔi ni sɔleɔ yɛ maŋ koni toiŋjɔlɛ aba lɛ asɔlemɔi atoi po. Wɔmiikɛɛ nakai ejaakɛ ta kɛ awuiyeli miiya nɔ eehao adesai. Ani Nyɔŋmɔ boɔ sɔlemɔi atoi lɛlɛŋ? Kɛ eboɔ toi lɛ, mɛni hewɔ etamɔ nɔ ni abooo sɔlemɔi babaoo ni asɔleɔ lɛ atoi lɛ? [Ŋmɛɛ gbɛ ni ewie.] Lala 145:18 tsɔɔ nɔ ni abiɔ, kɛ aaabo wɔ sɔlemɔi atoi. [Kanemɔ ŋmalɛ lɛ.] Nɔ kome ji akɛ, esa akɛ sɔlemɔi ni asɔleɔ akɛhaa Nyɔŋmɔ lɛ ajɛ anɔkwayeli mli ni ekɛ anɔkwale ni anaa yɛ e-Wiemɔ, Biblia lɛ mli lɛ akpa gbee.” Okɛ wolo ni okɛhaa lɛ atsɔɔ, ni otsɔɔ lɛ nɔ ni ekɛɔ yɛ bɔ ni sɔlemɔ he yɔɔ sɛɛnamɔ ha lɛ he.
8 Kɛ oodi sane ko ni nyɛgba yɛ sɔlemɔ he nyɛsɛɛ nɛɛ lɛ sɛɛ lɛ, obaanyɛ oka gbɛ ni tamɔ nɛkɛ okwɛ:
◼ “Miná sɔlemɔ he sane ni wɔgba lɛ he miishɛɛ waa. Ŋwanejee ko bɛ he akɛ obaana akɛ, Yesu susumɔi ni tsɔɔ nɔ ni esa akɛ asɔle akɛbi lɛ ji gbɛtsɔɔmɔ ni yeɔ ebuaa.” Kanemɔ Mateo 6:9, 10, ni otsɔɔ nibii ni he hiaa fe fɛɛ ni Yesu tsĩ tã yɛ esɔlemɔ he nɔkwɛmɔ nɔ lɛ mli. Okɛ yitso 16 ni ji, “Bɔ ni Ooofee Otsi Obɛŋkɛ Nyɔŋmɔ,” ni yɔɔ Nilee wolo lɛ mli lɛ atsɔɔ, ni obi kɛji obaanyɛ ofee bɔ ni afeɔ akaseɔ nii lɛ he nɔkwɛmɔ nɔ.
9 Kɛ eba lɛ akɛ akɛ Nyɔŋmɔ he nilee miiha mɛi krokomɛi lɛ, ekolɛ wɔbaanyɛ wɔbi akɛ, “Namɔ sa jogbaŋŋ kɛha enɛɛmɛi?” Ŋmalɛi lɛ haa hetoo akɛ: “Wɔji mɛi ni sa.”—2 Kor. 2:16, 17, NW.