Ni Owekumɛi Hu?
1 Wɔteŋ mɛi pii yɛ wekumɛi babaoo ni bɛ anɔkwale lɛ mli. Kwɛ bɔni wɔshweɔ ni mɛi ni wɔsumɔɔ nɛɛ afata wɔhe yɛ wala gbɛ lɛ nɔ! Ekolɛ amɛ wɔsɛɛ naanɔ shihilɛ lɛ he ni wɔsusuɔ lɛ mli baawa waa, kɛ amɛkɛ wɔ yɛ shia kome mli. Eyɛ mli akɛ wɔkɛ afii pii ebɔ mɔdɛŋ akɛ wɔɔha amɛná anɔkwale lɛ he miishɛɛ moŋ, shi esaaa akɛ wɔmuɔ sane naa akɛ anyɛŋ nɔ ko afee yɛ shihilɛ lɛ he.
2 Beni Yesu shiɛ lɛ, “enyɛmimɛi lɛ tete heee enɔ yeee.” (Yoh. 7:5) Be ko shɛ ni ewekumɛi lɛ susu akɛ eye sɛkɛ. (Mar. 3:21) Kɛlɛ, Yesu eŋmɛɛɛ amɛhe. Yɛ be ni sa mli lɛ, enyɛmimɛi hii lɛ kpɛlɛ anɔkwale lɛ nɔ. (Bɔf. 1:14) Enyɛmi nuu Yakobo batsɔ akulashiŋ yɛ Kristofoi asafo lɛ mli. (Gal. 1:18, 19; 2:9) Kɛji akɛ ooosumɔ ni oná miishɛɛ akɛ oona ni owekumɛi emɔ anɔkwale lɛ mli lɛ, no lɛ, kaakpa mɔdɛŋ ni obɔɔ akɛ okɛ Maŋtsɛyeli he sanekpakpa lɛ aaaha amɛ lɛ.
3 Feemɔ Mɔ ni Haa Mɔ He Jɔɔ Lɛ, Jeee Mɔ ni Nyɛɔ Mɔ Nɔ: Beni Yesu shiɛ etsɔɔ mɛi krokomɛi lɛ, etoibolɔi lɛ ahe jɔ amɛ, amɛtsui efãaa. (Mat. 11:28, 29) Ekɛ tsɔɔmɔi ni amɛnyɛŋ amɛnu shishi enyɛɛɛ amɛnɔ. Kɛ okɛ anɔkwale lɛ nui aaaha owekumɛi ahe ajɔ amɛ lɛ, okɛha amɛ fiofio yɛ kpulu mli, shi jeee yɛ goga obɔ mli! Nɔkwɛlɔ gbɛfalɔ ko yɔse akɛ: “Mɛi ni teeɔ nibii ni amɛ wekumɛi taoɔ ale lɛ ashi fiofio kɛtsɔɔ odaseyeli nɔ lɛ anine shɛɔ nɔ ni hi fe fɛɛ nɔ.” Yɛ nɛkɛ gbɛ nɔ lɛ, ekolɛ shitee-kɛ-wolɔi po baaje sanebimɔi ashishi, ni yɛ naagbee lɛ, anɔkwale lɛ he kumai baaye amɛ.—1 Pet. 2:2; okɛto 1 Korintobii 3:1, 2 he.
4 Kristofoi pii ni ebote gbalashihilɛ mli eye amɛ hefatalɔi ni heee yeee lɛ odase ni mɔɔ shi kɛtsɔ Biblia kasemɔ woji ni amɛgbeleɔ he ni ekolɛ sane ni amɛbaana he miishɛɛ lɛ yɔɔ lɛ amɛfɔɔ shi lɛ nɔ. Nyɛmi yoo ko ni fee nakai lɛ hu kɛ ebii lɛ kase nii bɔ ni ewu lɛ aaanu, ni ekɛ sane mlitsɔɔmɔ ni ebaana he sɛɛ ha. Bei komɛi lɛ ebiɔ lɛ akɛ: “Mikase nɛkɛ kɛ nɛkɛ yɛ minikasemɔ lɛ mli ŋmɛnɛ. Te osusuɔ tɛŋŋ?” Yɛ naagbee lɛ, ewu lɛ kpɛlɛ anɔkwale lɛ nɔ.
5 Okɛ Bulɛ Aha, Jeee Mɔ ni Bɛ Tsui: Shiɛlɔ ko tsɔɔ mli akɛ, “wekumɛi po yɛ hegbɛ ni amɛkɛtsɔɔ amɛ diɛŋtsɛ amɛjwɛŋmɔi kɛ amɛsusumɔi.” No hewɔ lɛ, esa akɛ wɔjie bulɛ kpo wɔtsɔɔ kɛ amɛtsɔɔ amɛsusumɔi loo amɛkɛɛ diɛŋtsɛ akɛ amɛsumɔɔɔ ni wɔkɛ amɛ wieɔ anɔkwale lɛ he lɛ. (Jaj. 3:7; 1 Pet. 3:15) Wɔbaanyɛ wɔtao be ni sa jogbaŋŋ koni wɔye odase nigii kɛ wɔŋmɛ wɔtsui shi, ni wɔsumɔ amɛ, ni wɔfee toibolɔi kpakpai. Tsuishitoo ni tamɔ nɛkɛ baanyɛ afee nɔ ni sɛɛnamɔ diɛŋtsɛ yɔɔ he, taakɛ anaa yɛ wu Kristofonyo ko ni ŋmɛ etsui shi yɛ eŋa ni heee yeee ni fee lɛ niseniianii afii 20 sɔŋŋ lɛ sane lɛ mli lɛ. Beni ebɔi tsakemɔ nɔŋŋ pɛ ni ekɛɛ: “Kwɛ bɔ ni midaa Yehowa shi akɛ eye ebua mi ni mito mitsui shi, ejaakɛ, minyɛ mina nɔ ni ejɛ mli eba lɛ agbɛnɛ: Miŋa ebɔi wala gbɛ lɛ nɔ nyiɛmɔ!”
6 Ni owekumɛi hu? Ekolɛ, kɛtsɔ Kristofoi ajeŋba kpakpa ni oyɔɔ kɛ sɔlemɔi ni osɔleɔ ohaa amɛ lɛ nɔ lɛ, “onine baashɛ amɛnɔ oha Yehowa.”—1 Pet. 3:1, 2, NW shishigbɛ niŋmaa.