Mɛni Hewɔ Amɛtsuɔ?
1 Agba afɔ shi yɛ Kristo lɛ he akɛ, ‘Nyɔŋmɔ we lɛ he hiɛdɔɔ lɛ baaye lɛ.’ (Lala 69:10) Ekãa ni Yesu yɔɔ kɛha Yehowa anɔkwale jamɔ lɛ tsirɛ lɛ ni ekɛ sɔɔmɔ nitsumɔ lɛ ye klɛŋklɛŋ gbɛhe. (Luka 4:43; Yoh. 18:37) Nɛkɛ ekãa ni akɛaaye anɔkwale lɛ he odase nɛɛ nɔŋŋ jeɔ kpo ŋmɛnɛ yɛ Yehowa Odasefoi asɔɔmɔ nitsumɔ lɛ mli. Yɛ nyɛsɛɛ sɔɔmɔ afi lɛ mli lɛ, kɛ aja mli lɛ, gbɔmɛi 645,509 na gbɛgbamɔ sɔɔmɔ nitsumɔ lɛ fã ko mli gbɛfaŋnɔ yɛ nyɔŋ fɛɛ nyɔŋ nɔ yɛ jeŋ fɛɛ. Yɛ wɔhe nɔ ni wɔjɔɔ wɔha Nyɔŋmɔ lɛ hewɔ lɛ, esa akɛ wɔteŋ mɔ fɛɛ mɔ kɛ sɔlemɔ asusu kɛji akɛ wɔbaanyɛ wɔto wɔ shihilɛi ahe gbɛjianɔ bɔni afee ni wɔsɔmɔ akɛ gbɛgbalɔi awalɔ loo daa gbɛgbalɔ lɛ he.—Lala 110:3; Jaj. 12:1; Rom. 12:1.
2 Akɛni nibii agbɛjianɔtoo ni kɛ pɛsɛmkunya diɔ heloonaa ninamɔ sɛɛ mli wɔyɔɔ hewɔ lɛ, ewa kɛha mɛi pii ni yɔɔ je lɛŋ lɛ akɛ amɛaanu nɔ hewɔ ni mɔ ko baatsu nii waa yɛ sɔɔmɔ nitsumɔ ni kɛ shika gbɛfaŋ sɛɛnamɔ ko loo hiɛnyamwoo ko kwraa baaa lɛ mli lɛ shishi. Mɛni hewɔ gbɛgbalɔi lɛ tsuɔ? Gbɛgbalɔi le akɛ, amɛkɛ amɛhe ewo yiwalaheremɔ nitsumɔ ko mli. Akɛni suɔmɔ ni mli kwɔ ni amɛyɔɔ kɛha Yehowa kɛ amɛnaanyo gbɔmɔ lɛ tsirɛɔ amɛ hewɔ lɛ, amɛ diɛŋtsɛ amɛnuɔ he waa akɛ sɔ̃ kã amɛnɔ akɛ amɛye amɛbua ni akɛhere gbɔmɛi ayiwala. (Rom. 1:14-16; 1 Tim. 2:4; 4:16) Gbalashihilɛ mli hefatalɔi gbɛgbalɔi ko mu sane naa jogbaŋŋ amɛkɛɛ akɛ: “Mɛni hewɔ wɔtsuɔ gbɛgbamɔ nitsumɔ lɛ? Ani wɔbaanyɛ wɔkɛ wiemɔ ko ajie wɔnaa yɛ Yehowa hiɛ gbi ko kɛ wɔtsuuu?”
3 Nyɛmi yoo kroko ŋma enɛ ni ekɛtsɔɔ eyiŋ ni ekpɛ akɛ ebaaje gbɛgbamɔ nitsumɔ lɛ shishi lɛ mli: “Miwu kɛ mi to gbɛjianɔ koni wɔhi shi yɛ nitsumɔ mli nyɔmɔwoo kome nɔ, ni tsɔɔ akɛ, wɔbaaŋmɛɛ nibii fɛɛ ni he ehiaaa lɛ ahe. Kɛlɛ, Yehowa jɔɔ wɔ babaoo, ni eshiii wɔ ni wɔye ohia loo ni nɔ ko he ahia wɔ. . . . Mina anɔkwa yiŋtoo ni yɔɔ shihilɛ mli—akɛ aye abua mɛi ni ehia amɛ yɛ mumɔŋ lɛ, ni amɛbale akɛ, Yehowa, anɔkwa Nyɔŋmɔ lɛ, kɛ mɛi ni taoɔ esɛɛ gbɛ lɛ ateŋ jɛkɛɛɛ.” Akɛni gbɛgbalɔi naa bɔ ni bei nɛɛ ahe hiaa hewɔ lɛ, yɛ be mli ni gbɛgbalɔi amii shɛɔ amɛhe yɛ shihilɛ mli nibii ni he hiaa ni amɛyɔɔ lɛ he lɛ, amɛkɛ ekãa taoɔ ni amɛná mumɔŋ jwetrii ni baahi shi kɛya naanɔ.—1 Tim. 6:8, 18, 19.
4 Kɛ oshihilɛi baaŋmɛ bo gbɛ lɛ, mɛni hewɔ ofataaa onyɛmimɛi hii kɛ yei akpei ohai abɔ ni yɔɔ jeŋ fɛɛ ni tsuɔ gbɛgbamɔ nitsumɔ lɛ ahe? Yɛ nakai gbɛ nɔ lɛ, obaana niiashikpamɔ ni amɛnáa lɛ nɔŋŋ eko.