Jiemɔ Anɔkwa Miishɛɛ Kpo yɛ Mɛi Fɛɛ ni Yɔɔ Wiemɔ lɛ he Miishɛɛ lɛ Ahe
1 Etsɛŋ ni jeŋ muu fɛɛ Maŋtsɛyeli sane jajemɔ lɛ baaba naagbee, ni no sɛɛ lɛ abaakpãta mɛi fɛɛ ni “leee Nyɔŋmɔ” lɛ ahiɛ. (2 Tes. 1:7-9) No hewɔ lɛ, anɔkwa miishɛɛ ni ayɔɔ kɛha mɛi krokomɛi awala lɛ miitsirɛ Yehowa webii koni amɛkɛ Maŋtsɛyeli shɛɛ sane lɛ aya mɛi babaoo aŋɔɔ bɔ ni amɛaanyɛ.—Zef. 2:3.
2 Daa nyɔŋ nɔ lɛ, akɛ ŋmɛlɛtswai akpekpei abɔ tsuɔ nii kɛtaoɔ mɛi ni sumɔɔ ni amɛnu “nɔ ko kpakpa he sanekpakpa” lɛ. (Yes. 52:7, NW) Yɛ woji ni wɔkɛtsuɔ nii amrɔ nɛɛ nɔkpɛlɛmɔ mli lɛ, mɛi babaoo ekpɛlɛ woji tɛtrɛbii lɛ ashɛɛ aloo Buu-Mɔɔ kɛ Awake! lɛ aloo Mɛni Nyɔŋmɔ Taoɔ yɛ Wɔdɛŋ? wolo bibioo lɛ nɔ. Esa akɛ anɔkwa miishɛɛ ni wɔyɔɔ yɛ nɛkɛ gbɔmɛi nɛɛ ahe lɛ atsirɛ wɔ koni wɔtiu mɛi fɛɛ ni yɔɔ wiemɔ lɛ he miishɛɛ lɛ asɛɛ.—Abɛi 3:27.
3 Ŋmalamɔ Mɔ lɛ he Saji ni Ja: Obaanyɛ otsu babaoo kɛji akɛ oŋmala saji ni kɔɔ miishɛɛ ni ajieɔ lɛ kpo kɛ woji ni ohaa lɛ ahe lɛ he saji ni ja oshwie shi. Saji tamɔ shiatsɛ lɛ gbɛi kɛ eshia, gbi kɛ be ni otee eŋɔɔ, wolo ni oha lɛ, kɛ sane ni nyɛsusu he lɛ baaye abua bo koni osɛɛsaramɔ lɛ afee nɔ ni mɔɔ shi. Agbɛnɛ hu, kɛji akɛ oŋmala saji ni shiatsɛ lɛ wie yɛ nyɛ klɛŋklɛŋ sanegbaa lɛ mli lɛ ekomɛi oshwie shi lɛ, obaanyɛ otsɛ enɛɛmɛi ayisɛɛ kɛje osanegbaa lɛ shishi yɛ osɛɛsaramɔ be lɛ mli yɛ gbɛ ni mɔɔ shi nɔ.
4 Ohe Afee Oya yɛ Sɛɛsaramɔ Feemɔi Amli: Mɛi ni hé woji yɛ oŋɔɔ yɛ nyɛsɛɛ nyɔŋ lɛ nɔ lɛ ateŋ mɛi enyiɛ obɔ mɔdɛŋ oyasara ekoŋŋ? Ani otsii abɔ eho ni onyɛko ona amɛ? Esa akɛ anɔkwa miishɛɛ ni oyɔɔ yɛ amɛ naanɔ shihilɛ kpakpa namɔ he lɛ atsirɛ bo koni oku osɛɛ oyasara amɛ amrɔ nɔŋŋ kɛ eeehi, kɛ hoo lɛ yɛ gbii fioo komɛi asɛɛ, bɔni afee ni sanegbaa lɛ afee ehee yɛ amɛ jwɛŋmɔ mli daa. Kɛ́ oku osɛɛ otee amɛŋɔɔ mra koni oha miishɛɛ ni amɛná lɛ aya hiɛ lɛ, no lɛ, obaanyɛ otsĩ Satan mɔdɛŋbɔɔ naa dani eba ‘ni ebashara wiemɔ lɛ ni adũ yɛ amɛtsuiiaŋ lɛ.’—Mar. 4:15.
5 Hesaamɔ He Miihia: Bɔ ni osɛɛsaramɔi mɔɔ shi ehaa lɛ damɔ bɔ ni osaa ohe ojogbaŋŋ ohaa lɛ nɔ. Susumɔ ohiɛkpamɔ wiemɔ lɛ he dani oya. April 1997 Wɔ Maŋtsɛyeli Sɔɔmɔ lɛ sɛɛgbɛ baafa lɛ etsɔɔ hiɛkpamɔ wiemɔi babaoo ni obaanyɛ okɛtsu nii yɛ omanyeyeli mli kɛji akɛ okɛ woji tɛtrɛbii lɛ, aloo Taoɔ wolo bibioo lɛ eko eha. Nɔ ni nyiɛ sɛɛ ji ni otao nɔ ko ni okɛ lɛ baasusu he kɛ otee sɛɛsaramɔ lɛ. Mɛni obaanyɛ okɛɛ kɛ otee sɛɛsaramɔ feemɔ? Mɛɛ gbɛ nɔ obaatsɔ oje Biblia mli nikasemɔ shishi?
6 Kɛ́ oku osɛɛ otee ni okɛ lɛ miisusu nɔ ni ebiɔ ni afee koni eha shikpɔŋ lɛ nɔ atse ni efee he ko ni sa kɛha shihilɛ lɛ he lɛ, obaanyɛ okɛɛ akɛ:
◼ “Beni mibasara bo nyɛsɛɛ ko lɛ, wɔba gbeekpamɔ akɛ dani shikpɔŋ lɛ baanyɛ atsɔ toiŋjɔlɛ paradeiso lɛ, ehe miihia ni afee nibii krɛdɛɛi komɛi amrɔ nɔŋŋ. Ani osusuɔ akɛ adesai yɛ taomɔ nii ni akɛbaatsu nitsumɔ nɛɛ? [Ŋmɛɛ gbɛ ni ewie.] Ofainɛ kadimɔ nɔ hewɔ ni ehe baahia ni Nyɔŋmɔ kɛ ehe awo adesai asaji amli lɛ.” Kanemɔ Lala 37:38. Agbɛnɛ gbelemɔ Taoɔ wolo bibioo lɛ nikasemɔ 5 lɛ, ni okɛ kukuji 4-5 lɛ fãi ni ohala yɛ jɛmɛ lɛ atsu nii ni otsɔɔ lɛ gbɛ ni Nyɔŋmɔ baatsɔ nɔ aha gbalɛ nɛɛ aba mli. Kuu osɛɛ ni oya ni nyɛje Biblia mli nikasemɔ shishi kɛjɛ wolo bibioo nɛɛ mli.
7 Kɛ́ ogba lɛ Nyɔŋmɔ Maŋtsɛyeli lɛ he sane ni oha lɛ “Taoɔ” wolo bibioo lɛ eko yɛ oklɛŋklɛŋ saramɔ lɛ mli lɛ, kɛ́ oku osɛɛ otee eŋɔɔ lɛ, obaanyɛ okɛɛ lɛ akɛ:
◼ “Beni wɔwie nyɛsɛɛ lɛ, wɔyɔse akɛ Nyɔŋmɔ Maŋtsɛyeli lɛ ji nɔyeli diɛŋtsɛ ni baaye jeŋ muu lɛ fɛɛ nɔ. Biblia lɛ tsɔɔ akɛ Yesu Kristo baafee enɔyelɔ. Ani obaanyɛ osusu sɛɛnamɔi komɛi ni abaaná yɛ nɔyeli kɛ enɔyelɔ ni tamɔ nɛkɛ mli lɛ he?” Ŋmɛɛ gbɛ ni ewie. Gbelemɔ Taoɔ wolo bibioo lɛ nikasemɔ 6 lɛ. Beni okɛ otii ni ohala yɛ kukuji 6-7 lɛ kɛ mfoniri ni yɔɔ baafa 13 lɛ tsuɔ nii lɛ, tsɔɔmɔ nɔ ni Nyɔŋmɔ Maŋtsɛyeli lɛ baafee aha adesai wɔsɛɛ. Kanemɔ Daniel 2:44, ni kɛ eeehi lɛ, jiemɔ Nilee wolo lɛ yi oha lɛ ni okɛɛ lɛ akɛ okɛ lɛ baafee Biblia mli nikasemɔ.
8 Kɛ́ ona mɔ ko ni tsɔɔ akɛ je lɛŋ jamɔi lɛ etée naagbai ashi eha adesai aweku lɛ, obaanyɛ obi enɛ yɛ osɛɛsaramɔ lɛ mli akɛ:
◼ “Ani osusu bɔ ni wɔɔfee wɔle jamɔ ni Nyɔŋmɔ kpɛlɛɔ nɔ lɛ he pɛŋ? [Ŋmɛɛ gbɛ ni ewie.] Nɛkɛ wolo bibioo, Mɛni Nyɔŋmɔ Taoɔ yɛ Wɔdɛŋ? nɛɛ kɛ anɔkwale jamɔ kadimɔ nii lɛ haa.” Gbelemɔ kɛya nikasemɔ 13 lɛ, ni nyɛsusu otii enumɔ ni akadi yɛ kukuji 3-7 lɛ he. Obaanyɛ oya nɔ okɛɛ akɛ: “Nɔ ni fata anɔkwale jamɔ ni wɔɔtao lɛ he ji akɛ, esa akɛ wɔle nɔ ni Nyɔŋmɔ taoɔ yɛ wɔdɛŋ aŋkroaŋkro.” Kanemɔ Yohane 4:23, 24. Kɛɛmɔ lɛ akɛ obaasumɔ ni okɛ lɛ asusu he kɛya hiɛ. Gbelemɔ wolo bibioo lɛ nikasemɔ 1 lɛ, ni ofee bɔ ni wɔkaseɔ nii lɛ he nɔkwɛmɔ nɔ otsɔɔ lɛ.
9 Kɛ́ oku osɛɛ koni nyɛtsa sanegbaa ni kɔɔ weku miishɛɛ namɔ he lɛ nɔ lɛ, obaanyɛ owie nɔ ko ni tamɔ nɔ ni nyiɛ sɛɛ nɛɛ:
◼ “Beni wɔkpe klɛŋklɛŋ lɛ, mikɛ bo susu nɔ pɔtɛɛ ni kɛ weku miishɛɛ baa, ni ji ŋaawoo ni yɔɔ Nyɔŋmɔ Wiemɔ, Biblia lɛ mli, ni wɔkɛaatsu nii lɛ he. Kɛji eba lɛ akɛ aasusu ŋmɛnɛŋmɛnɛ beaŋ weku lɛ hiamɔ nii ahe lɛ, ani oheɔ oyeɔ akɛ Biblia lɛ be eho aloo ebe hoko?” Ŋmɛɛ gbɛ ni eha hetoo. Ha lɛ Nilee wolo lɛ. Gbelemɔ kɛya yitso 2 lɛ, ni okane wiemɔi ni atsɛ́ yisɛɛ yɛ kuku 13 lɛ. Okɛ otii ni yɔɔ kuku 3 lɛ atsu nii, ni okɛɛ lɛ akɛ obaasumɔ ni okɛ lɛ afee weku Biblia mli nikasemɔ.
10 Kɛ wɔŋmala amɛhe saji ni ja, ni wɔsaa wɔhe jogbaŋŋ, ni wɔtee amɛ ŋɔɔ oya koni wɔha amɛ miishɛɛ lɛ aya hiɛ lɛ, wɔbaanyɛ wɔjie naanyo suɔmɔ ni baagbala amɛ kɛba yiwalaheremɔ gbɛ lɛ nɔ lɛ kpo.—Mat. 22:39; Gal. 6:10.