Ná Nɔ ni Hi Fe Fɛɛ Kɛjɛ Skulyaa Mli
1 Afi lɛ mli be ni obalahii kɛ obalayei babaoo biɔ akɛ: “Ani be eshɛ ni esa akɛ maku misɛɛ kɛya skul ekoŋŋ?” lɛ nɛ. Eyɛ mli akɛ, ekolɛ ni aaaku sɛɛ kɛaaya skul ekoŋŋ lɛ kɛ kaai kɛ yeyeeyefeemɔi komɛi baa moŋ, shi sɛɛnamɔi babaoo hu yɛ ni obalahii kɛ obalayei ni kɛ amɛhe haa lɛ baanyɛ aná bɔni afee ni amɛná nɔ ni hi fe fɛɛ kɛjɛ amɛ wolo-kasemɔ lɛ mli.
2 Wolo-kasemɔ shishitoo kpakpa baanyɛ aye abua mɔ ko mumɔŋ shweremɔ. Nɔ ni mɔ ko feɔ beni eji gbekɛ lɛ, náa nɔ ni ebaanyɛ efee beni etsɔ onukpa wɔsɛɛ lɛ nɔ hewalɛ waa. Yɛ skulyaa mli po lɛ, “nɔ pɛ ni gbɔmɔ duɔ lɛ, no nɔŋŋ ebaakpa hu.” (Gal. 6:7) Obalahii kɛ obalayei ni kaseɔ amɛskul nikasemɔi jogbaŋŋ lɛ baanyɛ aná hesaai ni baaha amɛhe aba sɛɛnamɔ babaoo kɛha Yehowa.
3 Ebiɔ ni mɔ asusu nii ahe jogbaŋŋ kɛtsɔ hiɛ kɛji akɛ eehala skul nikasemɔi ni ja. Esa akɛ fɔlɔi aye abua amɛbii lɛ koni amɛhala nikasemɔi ni baanyɛ ekɛ tsɔsemɔ ni anyɛɔ atsuɔ he nii fe fɛɛ lɛ aha koni amɛnyɛ amɛshɛ mumɔŋ otii ahe yɛ shihilɛ mli. Kɛtsɔ amɛhesaai ni amɛaaha eya hiɛ lɛ nɔ lɛ, obalahii kɛ obalayei baanyɛ akwɛ amɛ diɛŋtsɛ amɛhe yɛ gbɛgbamɔ nitsumɔ lɛ mli. Esa akɛ amɛshishijee wolo-kasemɔ lɛ aye abua amɛ koni amɛjie Yehowa yi, ekɔɔɔ he eko he ni amɛaasɔmɔ yɛ.
4 Obalahii kɛ obalayei, nyɛbɔa mɔdɛŋ koni nyɛnáa nɔ ni hi fe fɛɛ yɛ nyɛskulyaa afii lɛ amli. Yɛ enɛ feemɔ mli lɛ, nyɛhaa nyɛjwɛŋmɔ ahia sɔɔmɔ krɔŋkrɔŋ nɔ, moŋ fe ni nyɛaatiu je lɛŋ nitsumɔi asɛɛ. Nyɛbɔa mɔdɛŋ ni nyɛkɛ nyɛwala atsua nii yɛ Yehowa suɔmɔnaa nifeemɔ mli. Kɛtsɔ no nɔ lɛ, nyɛbaaha nyɛgbɛi aja, kɛha Yehowa yijiemɔ.—Lala 1:3.