Jiemɔ Bulɛ Kpo yɛ He ni Ajaa Yehowa yɛ Lɛ

¹ Kɛ wɔji gbɔi yɛ mɔ ko shia lɛ, wɔjieɔ bulɛ kpo wɔhaa nakai mɔ lɛ nibii ni eyɔɔ lɛ, ni wɔfeee nɔ ko ni wɔkɛfite nibii lɛ, ni wɔfiteee gbɛjianɔtoo kpakpa ni yɔɔ shia lɛ. Belɛ kwɛ bɔ ni esa akɛ enɛ afee anɔkwale babaoo yɛ be mli ni wɔji Yehowa gbɔi lɛ! Esa akɛ wɔle bɔ ni wɔbaa wɔjeŋ wɔhaa yɛ ewe lɛ. (Lala 15:​1; 1 Tim. 3:15) Kɛ́ wɔfeɔ Kristofoi akpee yɛ Maŋtsɛyeli Asa lɛ nɔ, mɔ ko shia, aloo maŋbii lɛ atsũ ko mli jio, wɔteŋ mɛi babaoo jieɔ bulɛ kpo wɔhaa he ni wɔjaa yɛ lɛ, tamɔ oookɛɛ eji Yehowa we, mɔ ni “enunyam lɛ teke shikpɔŋ kɛ ŋwɛi fɛɛ” lɛ.​—⁠Lala 148:⁠13.

² Shi kɛlɛ, nyɛmimɛi komɛi ejieee bulɛ kpo yɛ kpeei lɛ ashishi, ni amɛbolɔɔ aloo amɛfeɔ amɛnii tamɔ nɔ ni saji ni awieɔ lɛ ahe ehiaaa. Mɛi ni edara lɛ ateŋ mɛi fioo ko yaa nɔ amɛgbaa saji ni he ehiaaa yɛ agbo lɛ naa, asa bibioo ni kã tsũ lɛ hiɛ lɛ nɔ, yɛ shamɔhe kɛ wamɔhe lɛ aloo yɛ Maŋtsɛyeli Asa lɛ sɛɛ yɛ be mli ni kpee lɛ miiya nɔ. Kɛ́ ashi gbekɛ bibioo ko aha gbekɛ ko ni hiɛ efa saŋŋ koni ekwɛ lɛ lɛ, bei komɛi lɛ amɛyi enyɔ lɛ jeɔ shishi amɛshwɛɔ, ni amɛnaaa gbɛjianɔtoo lɛ he sɛɛ tsɔ. Beni akpa kpee lɛ, anaa gbekɛbii komɛi ni amɛmiishwɛ, ni amɛmiibolɔ waa, ni amɛmiinɔ karat po yɛ Maŋtsɛyeli Asa lɛ sɛɛ. Bei komɛi lɛ, amɛjoɔ foi kɛyatutuaa mɛi krokomɛi, ni amɛgbaa akutsoŋ bii lɛ anaa, loo amɛgbaa tsɔnekudɔlɔi anaa yɛ gbɛjegbɛi anɔ.

³ Bɔ ni Wɔɔfee Wɔkwa Bulɛ ni Abɛ: Ŋwanejee ko bɛ he akɛ hiɛsɔɔ kpo ni wɔɔjie wɔtsɔɔ bulɛ kɛ krɔŋkrɔŋ ni wɔjamɔ lɛ ji lɛ haŋ wɔjie gbɔmɛi krokomɛi ajwɛŋmɔ kɛjɛ nɔ kɛtsɔ ablɛbi wiemɔ, niyeli, chewing gum taa, woji agbelemɔ kɛ gbɛɛmɔ, shamɔhe kɛ wamɔhe lɛ yaa ni esaaa, aloo ni wɔɔkpe sɛɛ kɛba kpee daa lɛ anɔ. Fɔlɔi ni jieɔ bulɛ kɛ hiɛsɔɔ kpo lɛ eŋmɛŋ gbɛ koni amɛbii lɛ awo kapɛt ni akɛha shikpɔŋ lɛ, sɛi, aloo gbogboi ni yɔɔ Maŋtsɛyeli Asa loo shia ni afeɔ woloŋ nikasemɔ lɛ yɛ lɛ anɔ muji. Ni eka shi faŋŋ akɛ wɔ fɛɛ wɔkpɛlɛɔ nɔ akɛ, esaaa akɛ aŋmɛɔ hiɛgbejianii ko, kwashiai awiemɔ, loo yakayaka wiemɔi agbɛ yɛ wɔ kpeei ashishi.​—⁠Efe. 5:⁠4.

⁴ Kɛ wɔkai yiŋtoo ni yɔɔ wɔ Kristofoi akpeei lɛ sɛɛ daa lɛ, wɔbaakwɛ jogbaŋŋ koni wɔ kɛ wɔbii ajie bulɛ kpo yɛ he ni wɔjaa Yehowa yɛ ni ‘wɔsumɔɔ akɛ wɔkã’ lɛ.​—⁠Lala 84:⁠11. Ga Bible